કેટલીકવાર ફોનની ગેલેરી સાફ કરતી વખતે આપણાથી અજાણતા જ એવો ફોટો ડિલીટ થઈ જતો હોય છે જેને આપણે ક્યારેય ગુમાવવા માંગતા નથી. જો તમારી સાથે પણ આવું બન્યું હોય, તો બિલકુલ ગભરાવાની જરૂર નથી કારણ કે ફોટો ડિલીટ થવાનો અર્થ એ નથી કે તે હંમેશ માટે ગયો છે. એન્ડ્રોઇડ ફોન અને આઇફોન બંનેમાં કેટલાક એવા સરળ વિકલ્પો ઉપલબ્ધ હોય છે જે તાજેતરમાં કાઢી નાખેલા ફોટાને પુનઃપ્રાપ્ત કરવામાં મોટી મદદ કરે છે.

ટ્રેશ અથવા બિન ઓપ્શનમાં મળશે ફોટો

જો તમે ગૂગલ ફોટોઝ ઇન્સ્ટોલ કરેલા એન્ડ્રોઇડ ફોનનો ઉપયોગ કરો છો, તો સૌથી પહેલા એપ ખોલીને તેની લાઇબ્રેરીમાં રહેલા ‘ટ્રેશ’ (Trash) અથવા ‘બિન’ (Bin) ઓપ્શનમાં જવું પડે છે. ત્યાં તાજેતરમાં ડિલીટ થયેલા ફોટા મળી જાય છે, જેને તમે પસંદ કરીને ફરીથી રિસ્ટોર કરી શકો છો. આ ઉપરાંત, સેમસંગ, શાઓમી કે વનપ્લસ જેવા અલગ-અલગ એન્ડ્રોઇડ ફોનની ગેલેરીમાં પણ ‘રિસાયકલ બિન’ કે ‘રીસેન્ટલી ડિલીટેડ’નું ફોલ્ડર હોય છે, જેને ચેક કરી શકાય છે.

‘રીસેન્ટલી ડિલીટેડ’ આલ્બમમાં જઇને તમે રિસ્ટોર કરો

આઇફોન યુઝર્સ માટે પણ આ પ્રક્રિયા ખૂબ જ સરળ છે. આઇફોનમાં ‘ફોટો’ એપ ખોલીને ‘રીસેન્ટલી ડિલીટેડ’ આલ્બમમાં જવાનું રહે છે, જ્યાંથી તમે સરળતાથી ફોટો પસંદ કરી તેને પાછો મેળવી શકો છો. જો ફોટો આ ફોલ્ડર્સમાંથી પણ કાયમ માટે હટી ગયો હોય, તો એન્ડ્રોઇડ અને આઇફોનના ક્લાઉડ બેકઅપ (જેમ કે ગૂગલ ફોટોઝ કે આઇક્લાઉડ) તપાસવા યોગ્ય છે. જો કે, અજાણી અને સુરક્ષિત ન હોય તેવી થર્ડ-પાર્ટી રિકવરી એપ્સ ડાઉનલોડ કરવાનું હંમેશા ટાળવું જોઈએ જેથી તમારી ડેટા પ્રાઈવસી સુરક્ષિત રહી શકે.

આ પણ વાંચોઃ હવે ટ્રેનોમાં નહીં મળે ગુણવત્તા વગરનું ફુડ, પેન્ટ્રી કાર અને કિચનમાં નજર રાખશે AI