ફિલ્મ ‘7 આવર્સ ટુ ગો’ અને ‘ઘોસ્ટ’ ફેમ એક્ટ્રેસ અનન્યા રાજનું 35 વર્ષની વયે નિધન થયું છે. તેના પરિવારે સોશિયલ મીડિયા પર આ સમાચારની પુષ્ટિ કરી છે.

પરિવારના જણાવ્યા અનુસાર, ‘અનન્યાનું નિધન 15 જુલાઈની સવારે ઊંઘમાં જ થયું હતું. તે છેલ્લા એક વર્ષથી વધુ સમયથી શારીરિક અને માનસિક સ્વાસ્થ્ય સંબંધિત સમસ્યાઓથી ઝઝૂમી રહી હતી.’

પરિવારે ઇન્સ્ટાગ્રામ પર એક પોસ્ટ શેર કરીને તેની આત્માની શાંતિ માટે પ્રાર્થના કરવાની અપીલ કરી છે.

એક્ટ્રેસ અનન્યા રાજ.

પરિવારજનોએ ઇન્સ્ટાગ્રામ પર ભાવુક નોટ શેર કરી અનન્યા રાજના પરિવારે તેના સત્તાવાર ઇન્સ્ટાગ્રામ એકાઉન્ટ પર એક ભાવુક નિવેદન જારી કરીને તેના નિધનની જાણકારી આપી. પરિવારજનોએ લખ્યું કે, તેઓ ખૂબ જ ભારે હૃદયથી જણાવી રહ્યા છે કે 15 જુલાઈના રોજ વહેલી સવારે અનન્યાનું નિધન થયું. તે ઊંઘમાં જ શાંતિથી આ દુનિયાને અલવિદા કહી ગઈ.

પોસ્ટમાં લખવામાં આવ્યું હતું કે, છેલ્લા એક વર્ષથી વધુ સમયથી તે શારીરિક અને માનસિક મુશ્કેલીમાંથી પસાર થઈ રહી હતી અને તેણે એક યોદ્ધાની જેમ તેનો સામનો કર્યો.

2016માં બોલિવૂડમાં એન્ટ્રી કરી હતી મુંબઈમાં ઉછરેલી અનન્યા રાજે હિન્દી અને પ્રાદેશિક સિનેમામાં પોતાની ઓળખ બનાવી હતી. તેણે વર્ષ 2016માં થ્રિલર ફિલ્મ ‘7 અવર્સ ટુ ગો’થી બોલિવૂડમાં ડેબ્યૂ કર્યું હતું.

આ પછી, તે 2017માં આવેલી ફિલ્મ ‘ધ ફાઇનલ એક્ઝિટ’ અને 2019માં વિક્રમ ભટ્ટના ડિરેક્શનમાં બનેલી હોરર ફિલ્મ ‘ઘોસ્ટ’માં જોવા મળી હતી. ફિલ્મો ઉપરાંત, તે ઘણા પ્રખ્યાત મ્યુઝિક વીડિયોનો પણ ભાગ રહી હતી, જેનાથી તેને દર્શકોમાં ઓળખ મળી હતી.

તેલુગુ અને અન્ય પ્રાદેશિક ફિલ્મોમાં પણ કામ કર્યું હિન્દી ફિલ્મો ઉપરાંત અનન્યાએ પ્રાદેશિક સિનેમામાં પણ પોતાનું નસીબ અજમાવ્યું હતું. તેણે વર્ષ 2022માં રિલીઝ થયેલી તેલુગુ સસ્પેન્સ થ્રિલર ફિલ્મ ‘થગડે લે’માં કામ કર્યું હતું.

શ્રીનિવાસ રાજુના ડિરેક્શનમાં બનેલી આ ફિલ્મમાં તે નવીન ચંદ્રા, દિવ્યા પિલ્લઈ અને પી. રવિશંકર સાથે જોવા મળી હતી. આ ઉપરાંત તેણે ત્રિભાષી ફિલ્મ ‘મદ્રાસી ગેંગ’માં પણ મુખ્ય ભૂમિકા ભજવી હતી.

પરિવારે ગોપનીયતા જાળવી રાખવા અપીલ કરી પરિવાર દ્વારા જારી કરાયેલા નિવેદનમાં આગળ કહેવામાં આવ્યું છે કે, અનન્યા મજબૂત ઈરાદાવાળી છોકરી હતી અને રાણીની જેમ જીવતી હતી. પરિવારે લખ્યું કે, તેના ન રહેવાથી જે ખાલીપો આવ્યો છે, તે હંમેશા અનુભવાશે.

આ મુશ્કેલ ઘડીમાં પરિવારે ચાહકો અને મીડિયાને તેમની ગોપનીયતાનું સન્માન કરવા અને એક્ટ્રેસની આત્માની શાંતિ માટે પ્રાર્થના કરવા વિનંતી કરી છે.

દિવ્ય ભાસ્કરને Google પર મનપસંદ સોર્સ બનાવો