દુનિયાની સૌથી મોટી ઈ-કોમર્સ કંપની એમેઝોન (Amazon) ફરી એકવાર મોટા પાયે છટણી કરવાની તૈયારી કરી રહી છે, જેના કારણે કોર્પોરેટ જગતમાં ફફડાટ વ્યાપી ગયો છે. પ્રાપ્ત અહેવાલો અનુસાર, આવતા અઠવાડિયાથી કંપની તેના કર્મચારીઓના કાપની બીજી મોટી લહેર શરૂ કરી શકે છે. આ આંકડો અંદાજે 30,000 કર્મચારીઓ સુધી પહોંચવાની શક્યતા છે, જે એમેઝોનના 30 વર્ષના ઈતિહાસની સૌથી મોટી છટણી સાબિત થઈ શકે છે.

સૂત્રોના જણાવ્યા અનુસાર, આ વખતે છટણીની અસર માત્ર વેરહાઉસ પૂરતી મર્યાદિત નહીં રહે, પરંતુ કંપનીના મુખ્ય કોર્પોરેટ વિભાગો પર તેની સીધી અસર પડશે. જેમાં Amazon Web Services (AWS), કંપનીનો રિટેલ બિઝનેસ, Prime Video અને હ્યુમન રિસોર્સ (HR) વિભાગનો સમાવેશ થાય છે. જો આ 30,000 કર્મચારીઓને છૂટા કરવામાં આવે, તો તે એમેઝોનના કુલ કોર્પોરેટ વર્કફોર્સના લગભગ 10 ટકા જેટલો હિસ્સો હશે.

એમેઝોન દ્વારા કરવામાં આવી રહેલા આ ફેરફાર પાછળનું મુખ્ય કારણ આર્ટિફિશિયલ ઇન્ટેલિજન્સ (AI) ને માનવામાં આવે છે. કંપનીનું તર્ક છે કે AI અને ઓટોમેશનના કારણે હવે કામ કરવાની પદ્ધતિઓ બદલાઈ ગઈ છે. જે કામો માટે પહેલા વધુ લોકોની જરૂર પડતી હતી, તે હવે AI મોડલ્સ અને મશીનો દ્વારા ખૂબ જ ઝડપથી અને ઓછા ખર્ચે થઈ રહ્યા છે. ખાસ કરીને કોડિંગ, ડેટા મેનેજમેન્ટ અને રોજિંદા વહીવટી કામોમાં માનવ સંસાધન પરની નિર્ભરતા ઘટી રહી છે.

આ અગાઉ વર્ષ 2022માં પણ એમેઝોને આર્થિક મંદી અને ખર્ચ ઘટાડવાના ભાગરૂપે 27,000 કર્મચારીઓને નોકરીમાંથી કાઢી મૂક્યા હતા. જોકે, આ વખતનો આંકડો તેનાથી પણ વધુ હોઈ શકે છે. એમેઝોન પાસે હાલમાં વૈશ્વિક સ્તરે અંદાજે 15.8 લાખ કર્મચારીઓ છે, જેમાંથી મોટાભાગના વેરહાઉસ અને ડિલિવરી નેટવર્કમાં છે. પરંતુ, ટેકનિકલ અને મેનેજમેન્ટ લેવલ પર થઈ રહેલો આ કાપ કંપનીના ભવિષ્યના મોડલ તરફ ઈશારો કરે છે.