ફિલ્મ ‘બજરંગી ભાઈજાન’ના સેટ સાથે જોડાયેલો એક કિસ્સો એક્ટર મનોજ બક્ષીએ તાજેતરમાં શેર કર્યો. તેમણે જણાવ્યું કે, શૂટિંગ દરમિયાન ચાઈલ્ડ આર્ટિસ્ટ હર્ષાલી મલ્હોત્રાને સીનની જરૂરિયાતને કારણે ઘણી વાર સલમાન ખાનના હાથ પર થૂંકવું પડ્યું. મનોજે જણાવ્યું કે, સલમાને કોઈ પણ ખચકાટ વગર લગભગ 20 વાર પોતાનો હાથ આગળ કર્યો.

મનોજ બક્ષીએ ‘ધ વી ટી શો’ પોડકાસ્ટમાં ‘બજરંગી ભાઈજાન’ના શૂટિંગનો એક અનુભવ શેર કર્યો. તેમણે જણાવ્યું કે, તે દરમિયાન તેમને અહેસાસ થયો કે સુપરસ્ટાર હોવા છતાં સલમાન ખાનનો વ્યવહાર ખૂબ જ સહજ અને વિનમ્ર છે.

મનોજ બક્ષીએ ‘બજરંગી ભાઈજાન’માં પાકિસ્તાની પોલીસ ઇન્સપેક્ટર ઇકબાલ કુરેશીની ભૂમિકા ભજવી હતી.

હર્ષાલીને નોનવેજ ખાતી હોય તેવો સીન કરવાનો હતો

મનોજ અનુસાર, ‘ફિલ્મના એક સીનમાં મુન્નીનું પાત્ર ભજવી રહેલી હર્ષાલી મલ્હોત્રાને કેમેરા તરફ જોઈને નોન-વેજ ખાતા બતાવવાનું હતું. ડિરેક્ટર કબીર ખાનના નિર્દેશ મુજબ તેને ચાવી-ચાવીને ખાવાનું હતું, પરંતુ ઘણીવાર તેમના મોંમાં મોટો ટુકડો આવી જતો હતો, જેને તે ચાવી શકતી ન હતી.’

‘આવી સ્થિતિમાં શૂટિંગ રોકવાને બદલે સલમાન ખાને પોતાનો હાથ આગળ ધરીને હર્ષાલીને કહ્યું હતું કે તે તેમાં થૂંકી દે.’ મનોજ બક્ષીના મતે, ‘સીન દરમિયાન આવું લગભગ 20 વાર થયું અને સલમાને એકવાર પણ અસહજતા ન દર્શાવી.’

મનોજે જણાવ્યું કે, આ જોઈને તેમણે સલમાનને કહ્યું કે, તે બીજાના બાળક માટે આવું શા માટે કરી રહ્યા છે? આના પર સલમાને જવાબ આપ્યો કે, તે આવો જ છે.

‘બજરંગી ભાઈજાન’માં હર્ષાલી મલ્હોત્રાએ ‘મુન્ની’ (શાહિદા)નું પાત્ર ભજવ્યું હતું.

‘બજરંગી ભાઈજાન’ વર્ષ 2015માં રિલીઝ થઈ હતી. ફિલ્મમાં સલમાન ખાન અને હર્ષાલી મલ્હોત્રાની બોન્ડિંગને દર્શકોએ ખૂબ પસંદ કરી હતી અને આ ફિલ્મ બોક્સ ઓફિસ પર મોટી સફળતા સાબિત થઈ હતી.

મનોજ બક્ષી ‘જબ તક હૈ જાન’, ‘દિલ્હી બેલી’, ‘મદારી’, ‘નો વન કિલ્ડ જેસિકા’, ‘ગદર 2’ અને અન્ય ફિલ્મોમાં પણ જોવા મળ્યા છે.

તે જ સમયે, હર્ષાલી મલ્હોત્રાને ‘બજરંગી ભાઈજાન’ માટે લગભગ 5,000 છોકરીઓના ઓડિશન પછી પસંદ કરવામાં આવી હતી. ફિલ્મના સમયે તે છ વર્ષની હતી અને હવે 18 વર્ષની થઈ ગઈ છે. તે દક્ષિણ ભારતીય ફિલ્મોમાં પણ કામ કરી રહી છે.

હર્ષાલી મલ્હોત્રાએ ફિલ્મ ‘અખંડ 2: થાંડવમ’ થી તેલુગુ ફિલ્મોમાં ડેબ્યૂ કર્યું છે.

દિવ્ય ભાસ્કરને Google પર મનપસંદ સોર્સ બનાવો