આયર્લેન્ડ અને ઇંગ્લેન્ડના પ્રવાસ પર ભારતીય ટીમની નબળી કામગીરી બાદ BCCIએ સમીક્ષા બેઠક બોલાવી છે. હેડ કોચ ગૌતમ ગંભીર, ચીફ સિલેક્ટર અજીત અગરકર અને સેન્ટર ઓફ એક્સેલન્સના હેડ વીવીએસ લક્ષ્મણ ગુરુવારે મુંબઈ સ્થિત બોર્ડના મુખ્યાલયમાં બેઠકમાં ભાગ લેશે.

આમાં વિદેશી પ્રવાસો પર ટીમના પ્રદર્શનની સમીક્ષા સાથે 2027 વન-ડે વર્લ્ડ કપને ધ્યાનમાં રાખીને આગળની રણનીતિ પર ચર્ચા થશે. ખેલાડીઓની ઈજા, IPLના વર્કલોડ અને ટીમ મેનેજમેન્ટ, CoE અને પસંદગી સમિતિ વચ્ચે સંચાર પણ બેઠકના મુખ્ય મુદ્દા હશે.

16 સિરીઝ બાદ આયર્લેન્ડ સામે હાર, ઇંગ્લેન્ડમાં પણ નબળું પ્રદર્શન

ભારતને જૂનમાં આયર્લેન્ડ સામે 2 મેચની T20I સિરીઝમાં 0-2થી હાર મળી હતી. T20 વર્લ્ડ કપ જીત્યા પછી આ ભારતની લગભગ 3 વર્ષમાં 16 સિરીઝ પછી પ્રથમ T20I સિરીઝ હાર હતી. આ પછી ઇંગ્લેન્ડ પ્રવાસ પર 5 મેચની T20I સિરીઝમાં ભારત 0-4થી હારી ગયું. નોટિંગહામમાં ટીમને 125 રનથી હાર મળી હતી. વન-ડે સિરીઝમાં ભારતે પ્રથમ મેચ જીતી, પરંતુ સિરીઝ 1-2થી ગુમાવી દીધી.

BCCI સેક્રેટરી દેવાજીત સૈકિયાએ આ પરિણામો બાદ ટીમના પ્રદર્શનની સમીક્ષા કરવાની વાત કહી હતી. હવે આ બેઠક બોલાવવામાં આવી છે.

બુમરાહની ફિટનેસની જાણકારી પસંદગી સમિતિ સુધી પહોંચી નહોતી

બેઠકમાં ખેલાડીઓની ઈજા અને CoEની ભૂમિકા પર પણ ચર્ચા થશે. રિપોર્ટ અનુસાર, ખેલાડીઓ, CoE અને પસંદગી સમિતિ વચ્ચેના સંચારને લઈને સવાલો ઉભા થયા છે. એક કિસ્સામાં, ઝડપી બોલર જસપ્રીત બુમરાહ ફિટ ન હોવાની જાણકારી પસંદગી સમિતિને સમયસર મળી ન હતી. વોશિંગ્ટન સુંદરની ઈજા અને સાઈ સુદર્શનની રિકવરીમાં અપેક્ષા કરતાં વધુ સમય લાગવા પર પણ ચર્ચા થશે.

બુમરાહ શ્રીલંકા પ્રવાસની ટીમમાં સામેલ હતો, પરંતુ ફિટનેસ ક્લિયરન્સ ન મળવાને કારણે તેને બહાર થવું પડ્યું.

9 સપ્ટેમ્બરે 4 ખેલાડીઓનો ફિટનેસ ટેસ્ટ

IPLના વર્કલોડની ખેલાડીઓની ફિટનેસ પર અસર પણ બેઠકનો મુખ્ય મુદ્દો હશે. અફઘાનિસ્તાન સામેની T20I સિરીઝ માટે પસંદ કરાયેલા જસપ્રીત બુમરાહ, વોશિંગ્ટન સુંદર, નીતિશ રેડ્ડી અને હર્ષિત રાણાની ઉપલબ્ધતા ફિટનેસ પર નિર્ભર છે. ચારેય ખેલાડીઓનો 9 સપ્ટેમ્બરે ફિટનેસ ટેસ્ટ થશે.

ન્યૂઝીલેન્ડ પ્રવાસને ધ્યાનમાં રાખીને BCCI ઝડપી બોલરોના પૂલને ફિટ રાખવા અને ખેલાડીઓ વચ્ચે ઈજાની સમસ્યા ઘટાડવાના ઉપાયો પર પણ ચર્ચા કરશે.

હાર્દિક પંડ્યા IPL 2026 સમાપ્ત થયા પછી ઈજાને કારણે ભારતીય ટીમમાંથી બહાર છે.

2027 વર્લ્ડ કપ માટે હાર્દિકની ફિટનેસ પણ મહત્વની છે

બેઠકમાં ઓલરાઉન્ડર હાર્દિક પંડ્યાની ફિટનેસ અને રિકવરી પર પણ ચર્ચા થશે. પસંદગી સમિતિ તેને 2027 વન-ડે વર્લ્ડ કપ માટે ટીમમાં જોવા માગે છે. હાલમાં હાર્દિક વન-ડેમાં 5થી 6 ઓવરથી વધુ બોલિંગ કરી શકતો નથી. BCCI અને ટીમ મેનેજમેન્ટ તેની ફિટનેસને લાંબા સમય સુધી જાળવી રાખવાની યોજના પર ચર્ચા કરશે.

દિવ્ય ભાસ્કરને Google પર મનપસંદ સોર્સ બનાવો