ભારતીય ક્રિકેટના ટાઇટલ સ્પોન્સરના અધિકારોની ડીલ હજુ ફાઇનલ થઈ નથી. BCCIને નિર્ધારિત સમય સુધી એવી કોઈ બોલી મળી નથી, જે તેની અપેક્ષાઓ પર ખરી ઉતરે. હવે બોર્ડ સંભવિત કંપનીઓ સાથે સીધી વાતચીત કરી રહ્યું છે. ગૂગલનો AI બ્રાન્ડ જેમિની, સ્પિની અને SBI લાઇફના નામ આ રેસમાં સામે આવ્યા છે.

BCCIએ બોલી જમા કરવાની છેલ્લી તારીખ 13 ઓગસ્ટ રાખી હતી. ક્રિકબઝ અનુસાર, કાં તો કોઈ બોલી મળી નથી અથવા મળેલી બોલી બોર્ડની અપેક્ષા મુજબની નહોતી. હવે BCCI પાસે સપ્ટેમ્બરમાં ઘરેલું સિઝન શરૂ થાય તે પહેલાં ડીલ ફાઇનલ કરવાનો સમય છે.

IDFC બેંક હાલમાં ભારતીય ટીમ અને ડોમેસ્ટિક ક્રિકેટનો સ્પોન્સર છે.

બેઝ પ્રાઇસ 15.5% વધી

BCCIએ ટાઇટલ સ્પોન્સરશિપ માટે પ્રતિ મેચ 4.85 કરોડ રૂપિયાની બેઝ પ્રાઇસ રાખી છે. આ વર્તમાન ડીલ કરતાં લગભગ 15.5% વધુ છે.

વર્તમાન ટાઇટલ સ્પોન્સર IDFC First Bank દરેક ઘરેલું ઇન્ટરનેશનલ મેચ માટે BCCIને 4.2 કરોડ રૂપિયા આપે છે. બેંકે ત્રણ વર્ષ પહેલાં આ અધિકારો મેળવ્યા હતા.

આ વખતે BCCI અધિકારો માત્ર બે વર્ષ માટે વેચી રહ્યું છે. આ ડીલ 31 માર્ચ 2028 સુધી રહેશે. આ સમયગાળા દરમિયાન લગભગ 35 ઘરેલું ઇન્ટરનેશનલ મેચ થવાની અપેક્ષા છે. જેમાં 10 ટેસ્ટ, 12 વનડે અને 13 T20 ઇન્ટરનેશનલનો સમાવેશ થાય છે.

બેઝ પ્રાઇસ પર ડીલ થઈ તો 171 કરોડ મળશે

અગાઉની ડીલમાં ભારતમાં 55 ઇન્ટરનેશનલ મેચ રમાઈ હતી. IDFC First Bankએ આ માટે લગભગ 231 કરોડ રૂપિયા ખર્ચ કર્યા હતા.

જો નવો સ્પોન્સર પ્રતિ મેચ 4.85 કરોડ રૂપિયાના બેઝ પ્રાઈસ પર ડીલ મેળવે છે, તો BCCIને લગભગ 171 કરોડ રૂપિયા મળશે. આનાથી વધુ બોલી મળવા પર બોર્ડની કમાણી પણ વધી જશે.

27 સપ્ટેમ્બરથી શરૂ થશે ઘરેલું આંતરરાષ્ટ્રીય સિઝન

ભારતમાં ઘરેલું આંતરરાષ્ટ્રીયની આ સિઝનની પ્રથમ મેચ 27 સપ્ટેમ્બરના રોજ રમાશે. આ દિવસે વેસ્ટ ઈન્ડિઝની ટીમ ભારત પ્રવાસે આવશે. આ પહેલા મીડ સપ્ટેમ્બરમાં અફઘાનિસ્તાન સામે ત્રણ મેચની T-20 સિરીઝ પણ રમાશે. જોકે, આ મેચો અફઘાનિસ્તાન ક્રિકેટ બોર્ડની હોમ ગેમ્સ ગણાશે.

એસોસિયેટ પાર્ટનર અધિકારો માટે પણ RFQ

અગાઉની પ્રક્રિયાઓથી અલગ, આ વખતે BCCIએ પોતાના આયોજનોના એસોસિયેટ પાર્ટનર અધિકારો માટે પણ રિક્વેસ્ટ ફોર કોટેશન (RFQ) જારી કર્યું છે. આ માટે બોલી જમા કરાવવાની છેલ્લી તારીખ 25 ઓગસ્ટ છે. એસોસિયેટ પાર્ટનરની પસંદગી ટાઈટલ સ્પોન્સર નક્કી થયા પછી જ કરી શકાય છે. ટાઈટલ સ્પોન્સર અને એસોસિયેટ પાર્ટનર એક જ સેક્ટરના ન હોઈ શકે.

દિવ્ય ભાસ્કરને Google પર મનપસંદ સોર્સ બનાવો