હવે ટૂંક સમયમાં તમને ગુટખા, તમાકુ અને પાન મસાલાના પ્લાસ્ટિક પાઉચ જોવા નહીં મળે. ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઇન્ડિયા (FSSAI) એ જણાવ્યું કે પાન મસાલાના પેકિંગમાં ઉપયોગમાં લેવાતા પ્લાસ્ટિક મટીરીયલને હવે કાગળ, પેપરબોર્ડ, સેલ્યુલોઝ અને અન્ય ઇકો-ફ્રેન્ડલી મટીરીયલથી બદલવામાં આવશે.

આ માટે FSSAI એ મંગળવારે ખાદ્ય સુરક્ષા અને ધોરણો (પેકેજિંગ) વિનિયમન 2018′ માં સુધારા માટે એક ડ્રાફ્ટ નોટિફિકેશન બહાર પાડ્યું છે. આ ડ્રાફ્ટ ‘પ્લાસ્ટિક કચરા વ્યવસ્થાપન નિયમ 2026’ પર આગામી 30 દિવસ સુધી હિતધારકો પાસેથી અભિપ્રાયો અને વાંધાઓ મંગાવવામાં આવ્યા છે. ત્યારબાદ આ નિયમને અંતિમ સ્વરૂપ આપવામાં આવશે.

પ્લાસ્ટિક કે વિનાઇલનો કોઈપણ સ્વરૂપમાં ઉપયોગ નહીં થાય

નવા પ્રસ્તાવ અનુસાર, ગુટખા, પાન મસાલા અને તમાકુના કોઈપણ પેકેજમાં કોઈપણ સ્વરૂપમાં પ્લાસ્ટિક મટીરીયલનો ઉપયોગ કરી શકાશે નહીં.

તેમાં ‘વિનાઇલ એસીટેટ-મેલિક એસિડ-વિનાઇલ ક્લોરાઇડ કોપોલિમર’ જેવા કેમિકલયુક્ત મટીરીયલ પર પણ પ્રતિબંધ રહેશે.

કાગળ અને સેલ્યુલોઝથી બનેલા પાઉચનો વિકલ્પ

FSSAI એ સલાહ આપી છે કે હવે પ્લાસ્ટિક પાઉચને બદલે કાગળ, પૂંઠા (પેપરબોર્ડ) અને સેલ્યુલોઝ જેવી કુદરતી સામગ્રીનો ઉપયોગ કરવામાં આવે.

રેગ્યુલેટરનું કહેવું છે કે આ વસ્તુઓ ખાવા-પીવાનો સામાન પેક કરવા માટે સંપૂર્ણપણે સુરક્ષિત છે. સાથે જ, કંપનીઓ માટે પણ આ નવી સામગ્રી અપનાવવી અને તેનો ઉપયોગ કરવો સરળ બનશે.

ટીન અને કાચના કન્ટેનરનો વિકલ્પ યથાવત રહેશે

સ્વાસ્થ્ય મંત્રાલયના એક અધિકારી અનુસાર, જે ઉત્પાદકો પાઉચને બદલે ટીન કે કાચના કન્ટેનરનો ઉપયોગ કરી રહ્યા છે, તેઓ તેને ચાલુ રાખી શકશે. તેનાથી ઉત્પાદકોને તેમની વ્યાપારી જરૂરિયાતો અનુસાર સુગમતા મળશે, જોકે તેઓ રેગ્યુલેટરી ફ્રેમવર્કની અંદર હોય.

દિવ્ય ભાસ્કરને Google પર મનપસંદ સોર્સ બનાવો