ફેશન રિટેલર્સે આ વર્ષે વેચાણ વધારવા માટે સમય પહેલા જ મોટા ડિસ્કાઉન્ટનો સહારો લેવાનું શરૂ કરી દીધું છે. ઘણી કંપનીઓ અને રિટેલર્સે મિડ-સીઝન સેલ લોન્ચ કરી દીધી છે. સામાન્ય રીતે આવી સેલ જુલાઈમાં શરૂ થાય છે. વધતી મોંઘવારી, વૈશ્વિક અનિશ્ચિતતાઓ અને ગ્રાહકોની સાવચેતીભરી ખરીદી વચ્ચે સ્ટોક ખાલી કરવો અને નબળી માંગનો સામનો કરવો એ આ રણનીતિનો લક્ષ્ય છે.

ઇન્ડસ્ટ્રી ડેટા મુજબ છેલ્લા બે મહિનામાં ફેશન સેક્ટરનું વેચાણ લગભગ 30% ઓછું થઈ ગયું છે. પેટ્રોલ-ડીઝલ, સીએનજી, એલપીજી અને રોજિંદી જરૂરિયાતો પર વધતા ખર્ચને કારણે મોટાભાગના ગ્રાહકો કપડાં અને લાઇફસ્ટાઇલ પ્રોડક્ટ્સ પર ખર્ચ ઘટાડવા લાગ્યા છે. આ ઘરેલું બજેટ સંતુલિત રાખવાના પ્રયાસનો એક ભાગ છે. આને જોતા વેચાણ વધારવા માટે અડધો ડઝન બ્રાન્ડ્સ અને મિંત્રા, નાયકા ફેશન, ફ્લિપકાર્ટ જેવા ઓનલાઈન પ્લેટફોર્મ પસંદગીના પ્રોડક્ટ્સ પર 40% સુધીની છૂટ આપી રહ્યા છે.

નિષ્ણાતોનું કહેવું છે કે રિટેલર્સ હવે પરંપરાગત ‘એન્ડ-ઓફ-સીઝન સેલ’ની રાહ જોવાને બદલે સીઝનની વચ્ચે જ ઇન્વેન્ટરી કાઢવાની રણનીતિ અપનાવી રહ્યા છે. આ એ વાતનો સંકેત છે કે ગ્રાહકો હવે ખર્ચ કરતા પહેલા કિંમત અને વેલ્યુને લઈને પહેલા કરતા વધુ સાવચેત બન્યા છે.

પડકાર – બિન-જરૂરી ખર્ચમાં વધારાની સાવચેતી રાખી રહ્યા છે સામાન્ય ભારતીયો

– છેલ્લા 2 મહિનામાં ફેશન પ્રોડક્ટ્સનું વેચાણ લગભગ 30% ઘટ્યું

– ભૂ-રાજકીય તણાવ વચ્ચે ઘરેલું ખર્ચ વધવાથી લોકો ચિંતિત

– બિઝનેસના મામલે સ્પ્રિંગ-સમર સીઝન ખાસો નબળો રહ્યો

– ગ્રાહકો મોટા બિન-જરૂરી ખર્ચમાં વધારાની સાવચેતી રાખી રહ્યા છે

આ વર્ષે માર્ચમાં બિન-જરૂરી વસ્તુઓ ખરીદવાની ઇચ્છા 30% પર આવી ગઈ, પહેલા આ 70% થી ઉપર હતી.

રણનીતિ – ગ્રાહકો સ્ટોર સુધી આવે, તેવી કોશિશ

બ્લેન્કેટ માર્કડાઉન નહીં- ફક્ત પસંદગીના સ્ટોક-કીપિંગ યુનિટ્સ પર ડિસ્કાઉન્ટ આપી રહી છે કંપનીઓ.

બંડલિંગ ઑફ– 1+1, 1+2 જેવી ઑફર્સની મદદથી એક ખરીદી પર વધુ પ્રોડક્ટ્સ વેચવાનો ચાલી રહેલો પ્રયાસ. આમાં એક પ્રોડક્ટની ખરીદી પર એક કે બે પ્રોડક્ટ્સ મફત આપવાની ઓફર કરવામાં આવે છે.

ફૂટફોલ વધારવો– આકર્ષક ઑફર દ્વારા ગ્રાહકોને સ્ટોર સુધી લાવીને તહેવારોની સીઝન પહેલાં ઇન્વેન્ટરી ખાલી કરવી.

માર્જિન સુરક્ષા- કિંમતમાં ઊંડી છૂટને બદલે લક્ષિત ડિસ્કાઉન્ટ, જેથી માર્જિન જળવાઈ રહે.

વૃદ્ધિ: ચાર વર્ષમાં 52% વધ્યો ભારતીય ફેશન/એપેરલ બજાર, 2025માં બજારનું કદ 11 લાખ કરોડને પાર

વર્ષ – બજાર કદ વિશ્લેષણ

2021 – 7.5 કોવિડ પછી રિકવરી; વેચાણમાં 45% વધારો

2022 – 8.5 ફિઝિકલ સ્ટોર્સ ખુલ્યા; 15-20% વૃદ્ધિ

2023 – 9.5 વેચાણ અંદાજ મુજબ

2024 – 10 વેચાણ અંદાજ કરતાં વધુ

2025 – 11.4 14 ટકાની ઝડપી વૃદ્ધિ

(નોંધ: આંકડા લાખ કરોડ રૂપિયામાં, સ્ત્રોત: સ્ટેટિસ્ટા, વઝીર એડવાઇઝર્સ)

‘એન્ડ-ઓફ-સીઝન સેલ’ પણ ટૂંક સમયમાં શરૂ થવાની શક્યતા

પહેલાં: જુલાઈમાં શરૂ થતી હતી અને 15 ઓગસ્ટ સુધી ચાલતી હતી

હવે: જૂનના શરૂઆતી અઠવાડિયામાં શરૂ થઈ ગઈ, જેથી વેચાણ વધે

કલેક્શન: ઓગસ્ટને બદલે મધ્ય-જુલાઈથી જ આવવા લાગશે

ગ્રાહકનો મૂડ: ડેલોયના એક રિપોર્ટ અનુસાર, આ વર્ષે માર્ચ દરમિયાન ભારતમાં મોટી અને બિન-જરૂરી શોપિંગની ઈચ્છા ઘટીને 65% પર આવી ગઈ, જે પહેલા 70% હતી. રિપોર્ટમાં કહેવામાં આવ્યું છે કે, ‘ભારતીય ગ્રાહકો કેલિબ્રેટેડ કન્ઝમ્પ્શનના તબક્કામાં છે. એટલે કે તેઓ આકાંક્ષા અને નાણાકીય અનુશાસન વચ્ચે સંતુલન બનાવવાનો પ્રયાસ કરી રહ્યા છે.’

દિવ્ય ભાસ્કરને Google પર મનપસંદ સોર્સ બનાવો