FIFA વર્લ્ડ કપમાં આજે રાત્રે અમેરિકાનો મુકાબલો ઓસ્ટ્રેલિયા સામે થશે. આ મેચ રાત્રે 12:30 વાગ્યાથી સિએટલ સ્ટેડિયમમાં રમાશે. ગ્રુપ-Dમાં સામેલ બંને ટીમે પોતાની પહેલી મેચ જીતી હતી. તેમના 3-3 પોઇન્ટ્સ છે. આ મેચ જીતનારી ટીમ ઇટેબલના ટૉપ પર પહોંચશે.

બીજી મેચ 3:30 વાગ્યાથી સ્કોટલેન્ડ અને મોરોક્કો વચ્ચે બોસ્ટન સ્ટેડિયમમાં રમાશે. ત્યારબાદ પાંચ વખતની ચેમ્પિયન બ્રાઝિલ અને હૈતી ફિલાડેલ્ફિયા સ્ટેડિયમમાં સવારે 6 વાગ્યાથી ટકરાશે.

દિવસની છેલ્લી મેચ સવારે 8:30 વાગ્યાથી તુર્કી અને પેરાગ્વે વચ્ચે સાન ફ્રાન્સિસ્કો બે એરિયા સ્ટેડિયમમાં રમાશે. આ તમામ મેચ ભારતીય સમય અનુસાર 19 જૂને રમાશે.

મેચ- 29: અમેરિકા અને ઓસ્ટ્રેલિયા વચ્ચે બરાબરીનો મુકાબલો

અમેરિકા અને ઓસ્ટ્રેલિયા ગ્રુપ-Dમાં સામેલ છે. બંને ટીમ વચ્ચે કુલ 3 આંતરરાષ્ટ્રીય મેચ રમાઈ છે. તેમાંથી બંને ટીમે 1-1 મેચ જીતી છે. જ્યારે 1 મેચ ડ્રો રહી છે. ફિફા વર્લ્ડ કપના ઇતિહાસમાં બંને ટીમ પહેલીવાર આમને-સામને થશે.

અમેરિકાને તેના કેપ્ટન અને સ્ટાર ફોરવર્ડ ક્રિસ્ટિયન પુલિસિક અને ઇન-ફોર્મ સ્ટ્રાઈકર ફોલારિન બાલોગુન પાસેથી ગોલની અપેક્ષા રહેશે. જ્યારે ઓસ્ટ્રેલિયન ટીમને તેના અનુભવી ગોલકીપર મેથ્યુ રાયન અને મિડફિલ્ડર જેક્સન ઇરવિન પાસેથી સારા પ્રદર્શનની અપેક્ષા રહેશે.

બંને ટીમની સંભવિત સ્ટાર્ટિંગ-11:

અમેરિકા: ટર્નર, ડેસ્ટ, રિચાર્ડ્સ, રોબિન્સન, સ્કેલી, એડમ્સ, મેકેની, રેયના, વીહ, બાલોગુન, પુલિસિક.

ઓસ્ટ્રેલિયા: રાયન, ગેરિયા, સૂટર, બર્ગસ, બોસ, લેકી, ઇરવિન, મેટકાફ, ઇરનકુંડા, માબિલ, હ્રુસ્ટિક.

મેચ-30: 1998 વર્લ્ડ કપમાં મોરોક્કોએ સ્કોટલેન્ડને હરાવ્યું હતું

મોરોક્કો અને સ્કોટલેન્ડ ગ્રુપ-Cમાં સામેલ છે. બંને ટીમ બીજી વખત વર્લ્ડ કપમાં ટકરાશે. આ પહેલા 1998ના વર્લ્ડ કપમાં મોરોક્કોએ સ્કોટલેન્ડને 3-0થી હરાવ્યું હતું.

સ્કોટલેન્ડની ટીમનો આધાર મિડફિલ્ડર સ્કોટ મેકટોમિને અને જોન મેકગિન પર રહેશે. જ્યારે મોરોક્કોની નજર રિયલ મેડ્રિડના સ્ટાર વિંગર બ્રાહિમ ડિયાઝ અને PSGના સ્ટાર ડિફેન્ડર અશરફ હકીમીના પ્રદર્શન પર રહેશે.

બંને ટીમની સંભવિત સ્ટાર્ટિંગ-11:

સ્કોટલેન્ડ: ગન, હેનલી, હેન્ડ્રી, પોર્ટિયસ, રોલસ્ટન, મેકટોમિને, ગિલમોર, રોબર્ટસન, મેકગિન, ક્રિસ્ટી, શેન્કલેન્ડ.

મોરોક્કો: બૂનુ, હકીમી, અગુએર્ડ, ડિયોપ, મઝરાઉઇ, અમરાબાત, ઓનાહી, સાયબારી, ડિયાઝ, અલ કાબી, એઝલઝૌલી.

મેચ-31: હૈતી સામે જીતના પંથે પાછું ફરશે બ્રાઝિલ?

બ્રાઝિલ અને હૈતી ગ્રુપ-Cમાં સામેલ છે. બંને ટીમ વચ્ચે 2 આંતરરાષ્ટ્રીય મુકાબલા રમાયા છે. બંને વખત બ્રાઝિલે જીત નોંધાવી છે.

છેલ્લી વખત બંને ટીમ 2016ના કોપા અમેરિકા કપમાં ટકરાઈ હતી, જ્યાં બ્રાઝિલે હૈતીને 7-1ના મોટા અંતરથી હરાવ્યું હતું. વર્લ્ડ કપના ઇતિહાસમાં બંને ટીમ પહેલીવાર આમને-સામને રમશે.

બ્રાઝિલને રિયલ મેડ્રિડના સ્ટાર વિંગર વિનીસિયસ જુનિયર, રાફિન્હા અને ફોરવર્ડ માથિયસ કુન્હા પાસેથી આક્રમક રમતની અપેક્ષા હશે. જ્યારે હૈતીની સંપૂર્ણ આશાઓ તેમના કેપ્ટન અને ગોલકીપર જોની પ્લેસાઇડ અને મિડફિલ્ડર જીન-રિકનર બેલગાર્ડે પર ટકેલી હશે.

બંને ટીમની સંભવિત સ્ટાર્ટિંગ-11:

બ્રાઝિલ: એલિસન, ડેનિલો, માર્વિન્હોસ, ગેબ્રિયલ, એલેક્સ સેન્ડ્રો, ગુઇમારેસ, ફેબિન્હો, રાફિન્હા, વિનિસિયસ જુનિયર, લુઇઝ હેનરિક, માથિયસ કુન્હા.

હૈતી: પ્લેસાઇડ, એક્સપિરિયન્સ, અદે, ડેલક્રિક્સ, આર્કસ, બેલગાર્ડે, જેક્સ, પ્રોવિડન્સ, કેસિમિર, ડીડસન, ઇસિડોર.

મેચ-32: તુર્કી અને પેરાગ્વે માટે કરો યા મરોની સ્થિતિ

તુર્કી અને પેરાગ્વે ગ્રુપ-Dમાં સામેલ છે. બંને ટીમ પોતાની પ્રથમ મેચ હારીને ગ્રુપમાં છેલ્લા બે સ્થાન પર છે. તેમના માટે આ મેચ કરો યા મરોનો હશે.

તુર્કી અને પેરાગ્વે વચ્ચે માત્ર 1 આંતરરાષ્ટ્રીય મેચ રમાઈ છે. આ મુકાબલો ડ્રો રહ્યો હતો. વર્લ્ડ કપના મંચ પર બંને ટીમ પહેલીવાર ટકરાશે.

તુર્કીને કેપ્ટન હાકાન ચાલહાનઓગ્લુ અને યુવા આર્ડા ગુલર પાસેથી સારા પ્રદર્શનની અપેક્ષા હશે. જ્યારે પેરાગ્વેની નજર સ્ટાર વિંગર મિગુએલ અલ્મિરોન અને જુનિયર અલોન્સોના અનુભવ પર ટકેલી હશે.

બંને ટીમની સંભવિત સ્ટાર્ટિંગ-11:

તુર્કી: ચાકિર, ચેલિક, ડેમિરલ, બારદાકચી, કાદિયોગ્લુ, ચાલહાનઓગ્લુ, ઓઝકૈન, યિલમાઝ, ગુલર, યિલદિઝ, અકટુરકોગ્લુ.

પેરાગ્વે: ફર્નાન્ડીઝ, કાસેરેસ, ગોમેઝ, અલોન્સો, આલ્ડરેટે, સોસા, કુબાસ, અલ્મિરોન, ડી. ગોમેઝ, એનસિસિયો, સાનાબ્રિયા.

દિવ્ય ભાસ્કરને Google પર મનપસંદ સોર્સ બનાવો