ગાંધીનગર મ્યુનિસિપલ કોર્પોરેશનની ચૂંટણીના મતદાનને હવે માત્ર ગણતરીના દિવસો બાકી રહ્યા છે, ત્યારે પાટનગરનો આ મહત્વપૂર્ણ ગઢ જીતવા માટે ભારતીય જનતા પાર્ટી અને કોંગ્રેસ બંને પક્ષોએ પોતાની સંપૂર્ણ તાકાત મેદાનમાં ઝોંકી દીધી છે. માત્ર ઉપરચટ્ટિયા દાવા કરવાના બદલે આ વખતે બંને પક્ષો દ્વારા ગ્રાઉન્ડ લેવલ પર અત્યંત ચોકસાઈપૂર્વકનું ‘માઇક્રો પ્લાનિંગ’ કરવામાં આવી રહ્યું છે, જેના કારણે રાજકીય પારો ચરમસીમાએ પહોંચ્યો છે.

ભાજપનું માઇક્રો મેનેજમેન્ટ અને ‘મકાન દીઠ આયોજન’

સત્તા જાળવી રાખવા માટે ભાજપે પોતાના કેડર-બેઝ્ડ સંગઠન અને બહારના કાર્યકરોના નેટવર્ક દ્વારા ‘મકાન દીઠ જનસંપર્ક’ અભિયાન શરૂ કર્યું છે. અમદાવાદથી વિધાનસભા દીઠ અનુભવી કાર્યકરો અને કોર્પોરેટરોની ફોજ ગાંધીનગરમાં ઉતારવામાં આવી છે, જ્યાં પ્રત્યેક વોર્ડમાં 70થી વધુ બહારના સંગઠનાત્મક કાર્યકરો સઘન પ્રચાર ચલાવી રહ્યા છે. પ્રથમ નવરાત્રીના દિવસે જ મતદાન હોવાથી ભાજપે મતદારોને આકર્ષવા માટે ‘પહેલા મતદાન, પછી નવરાત્રી’નું નવું રાજકીય સૂત્ર પણ આપ્યું છે.

ભાજપનો વ્યૂહ

• મકાન દીઠ આયોજન
• બહારના કાર્યકરોની ફોજ
• 12 ધારાસભ્યો મેદાનમાં
• વોર્ડ દીઠ 70 કાર્યકરોની ફોજ 
• મંત્રીઓની જનસભા અને ઝંઝાવતી પ્રચાર

કોંગ્રેસના જ્ઞાતિ સમીકરણો અને સેક્ટર વાઇઝ પેટા કાર્યાલયો

બીજી તરફ, કોંગ્રેસે પોતાની વોટબેંકને મજબૂત કરવા માટે પબ્લિક રિલેશન્સ અને કાસ્ટ ઇક્વેશન પર વિશેષ ભાર મૂક્યો છે. પક્ષ દ્વારા 5 સામાન્ય સીટો પર દલિત સમાજના ઉમેદવારોને મેદાનમાં ઉતારવામાં આવ્યા છે. પ્રચારને વેગ આપવા પ્રદેશના અગ્રણીઓ, 12 ધારાસભ્યો અને 1 સાંસદને સીધા મેદાનમાં ઉતારાયા છે. આ ઉપરાંત, પ્રત્યેક વોર્ડ અને સેક્ટરની અંદર નાના-મોટા વિસ્તારોને આવરી લેતા પેટા કાર્યાલયો ખોલવામાં આવ્યા છે જેથી કાર્યકરો અને આગેવાનોને કામગીરીમાં સરળતા રહે.

કોંગ્રેસનો વ્યૂહ

• જ્ઞાતિ સમીકરણો
• 5 જનરલ સીટ પર દલિત ઉમેદવાર
• સેક્ટર વાઇઝ પેટા કાર્યાલયો
• 12 ધારાસભ્યો અને 1 સાંસદને જવાબદારી
• 4 કાર્યકારી અધ્યક્ષ અને પ્રદેશ નેતા ગાંધીનગરમાં

સેક્ટર અને વોર્ડ કક્ષાએ મકાન દીઠ આયોજન કરીને ભાજપે પોતાના શક્તિશાળી સંગઠન માળખાને મેદાનમાં ઉતારી દીધું છે. બહારના જિલ્લાઓના અનુભવી નેતાઓ અને કોર્પોરેટરોને ગાંધીનગરમાં ઉતારીને ભાજપે એ બતાવી દીધું છે કે તે એકપણ સીટ ગુમાવવાના મૂડમાં નથી.
https://x.com/sandeshnews/status/2107154387370172785?ref_src=twsrc%5Etfw%7Ctwcamp%5Etweetembed%7Ctwterm%5E2107154387370172785%7Ctwgr%5E%7Ctwcon%5Es1_c10&ref_url=

ગાંધીનગર મનપા ચૂંટણી હવે માત્ર રાજકીય દાવપેચ પૂરતી મર્યાદિત નથી રહી, પરંતુ તે બંને પક્ષો માટે તેમના માઇક્રો મેનેજમેન્ટ અને નેટવર્કની કસોટી સમાન બની ગઈ છે. એક તરફ ભાજપ પોતાની કેડર અને મકાન દીઠ આયોજનના બળે સત્તા ટકાવી રાખવા મક્કમ છે, તો બીજી તરફ કોંગ્રેસ જ્ઞાતિ સમીકરણો અને સેક્ટર વાઇઝ સઘન પ્રચારથી ભાજપના ગઢમાં સંધિશાળવા માંગે છે. ત્યારે જોવાનું એ રહેશે કે ગાંધીનગરના પ્રબુદ્ધ મતદારો કોના માઇક્રો પ્લાનિંગ પર મોહર લગાવે છે. 5 દિવસ પછી થનારા મતદાનમાં ગાંધીનગરના મતદારો કોના પક્ષમાં કમળ કે પંજો ખીલવે છે તે જોવું રસપ્રદ રહેશે.

આ પણ વાંચો: Gandhinagar News: મનપાની ચૂંટણીમાં અપક્ષ ઉમેદવારના પોસ્ટર ફાડ્યા, વોર્ડ 11માં ચૂંટણી બહિષ્કારની જાહેરાત