આજના ડિજિટલ યુગમાં UPI પેમેન્ટ અનિવાર્ય બની ગયું છે, પરંતુ બાળકો કે વૃદ્ધો જેમની પાસે પોતાનું બેંક ખાતું નથી, તેમને ઘણીવાર મુશ્કેલી પડતી હોય છે. આ સમસ્યાના ઉકેલ રૂપે Google Pay એ NPCI ની ‘UPI સર્કલ’ ટેકનોલોજી પર આધારિત ‘પોકેટ મની’ સુવિધા શરૂ કરી છે. આ સુવિધા દ્વારા પરિવારનો મુખ્ય સભ્ય પોતાના એક જ બેંક ખાતા સાથે પરિવારના અન્ય સભ્યોને જોડી શકે છે.

શું છે આ પોકેટ મની સુવિધા?

આ સુવિધાનો મુખ્ય ઉદ્દેશ્ય એવા લોકોને ડિજિટલ પેમેન્ટ સાથે જોડવાનો છે જેમની પાસે પોતાનું પર્સનલ બેંક એકાઉન્ટ નથી. મુખ્ય વપરાશકર્તા (Primary User) પોતાના એકાઉન્ટમાં પરિવારના મહત્તમ પાંચ સભ્યોને ઉમેરી શકે છે. આ ગૌણ વપરાશકર્તાઓ (Secondary Users) મુખ્ય સભ્યના ખાતામાંથી જ નાની ચૂકવણીઓ કરી શકશે, જે બિલકુલ બાળકોને અપાતા ‘પોકેટ મની’ જેવું જ કાર્ય કરે છે.

પેમેન્ટ પર રહેશે સંપૂર્ણ નિયંત્રણ

સુરક્ષા અને બજેટને ધ્યાનમાં રાખીને, Google Pay એ મુખ્ય સભ્યને બે પ્રકારના વિકલ્પો આપ્યા છે:

૧. માસિક મર્યાદા (Monthly Limit): જેમાં તમે દર મહિને એક નિશ્ચિત રકમ સેટ કરી શકો છો, જેમાંથી ગૌણ સભ્ય ખર્ચ કરી શકશે.

૨. દરેક ચુકવણીની મંજૂરી (Approve Every Payment): જેમાં ગૌણ સભ્ય જ્યારે પણ પેમેન્ટ કરશે, ત્યારે મુખ્ય સભ્યના ફોન પર નોટિફિકેશન આવશે અને તેમની મંજૂરી બાદ જ પેમેન્ટ સફળ થશે.

કઈ રીતે સેટ કરશો આ સુવિધા?

1. સૌ પ્રથમ તમારા ફોનમાં Google Pay એપ ઓપન કરો અને પ્રોફાઇલ સેક્શનમાં જાઓ.

2. ત્યાં તમને ‘UPI સર્કલ’ અથવા ‘પોકેટ મની’ નો વિકલ્પ જોવા મળશે, તેના પર ટેપ કરો.

3. જે સભ્યને ઉમેરવા માંગતા હોવ તેમનો નંબર પસંદ કરો અથવા તેમનો QR કોડ સ્કેન કરો.

4. ત્યારબાદ માસિક મર્યાદા અથવા ચુકવણી મંજૂરીનો વિકલ્પ પસંદ કરો.

5. સુરક્ષા માટે ગૌણ સભ્યની જરૂરી ઓળખ વિગતો અને તમારો આધાર નંબર દાખલ કરો (આ વિગતો બેંક રેકોર્ડ માટે જરૂરી છે).

6. અંતે UPI પિન નાખીને આમંત્રણ મોકલો. સામેની વ્યક્તિ આમંત્રણ સ્વીકારતા જ સેવા શરૂ થઈ જશે.