2027 ODI વર્લ્ડ કપ સાઉથ આફ્રિકા, ઝિમ્બાબ્વે અને નામિબિયા દ્વારા સંયુક્ત રીતે યોજાશે.

આગામી મેન્સ વન-ડે વર્લ્ડ કપની તારીખો નક્કી થઈ ગઈ છે. ટુર્નામેન્ટ આવતા વર્ષે 4 ઓક્ટોબરથી 21 નવેમ્બર સુધી સાઉથ આફ્રિકા, ઝિમ્બાબ્વે અને નામિબિયામાં રમાશે. ક્રિકેટ વેબસાઇટ ક્રિકઇન્ફોના રિપોર્ટ મુજબ, અમદાવાદમાં ગયા મહિને યોજાયેલી ICC બોર્ડની બેઠકમાં તારીખો પર સહમતિ બની છે. તેની સત્તાવાર જાહેરાત જુલાઈમાં એડિનબર્ગમાં ICCની વાર્ષિક સામાન્ય સભામાં થશે.

2023 વન-ડે વર્લ્ડ કપ: ઓસ્ટ્રેલિયાએ ફાઈનલમાં યજમાન ભારતને 6 વિકેટે હરાવીને ટાઇટલ જીત્યું હતું.

સાઉથ આફ્રિકામાં ઓછામાં ઓછી 41 મેચ રમાશે

વર્લ્ડ કપની મોટાભાગની મેચ સાઉથ આફ્રિકાના 8 સ્થળોએ રમાશે. ટુર્નામેન્ટની કુલ 54 મેચમાંથી ઓછામાં ઓછી 41 મેચ સાઉથ આફ્રિકા હોસ્ટ કરી શકે છે. ઝિમ્બાબ્વે 8 થી 10 અને નામિબિયા 3 મેચ હોસ્ટ કરશે.

સાઉથ આફ્રિકાનું જોહાનિસબર્ગ સ્ટેડિયમ.

24 વર્ષ પછી આફ્રિકા વન-ડે વર્લ્ડ કપ હોસ્ટ કરશે

2003 પછી પહેલીવાર આફ્રિકામાં વન-ડે વર્લ્ડ કપ યોજાશે. 2003 મેન્સ વર્લ્ડ કપ ઉપરાંત, સાઉથ આફ્રિકા 2007 T20 વર્લ્ડ કપ, 2009 ચેમ્પિયન્સ ટ્રોફી અને 2023 મહિલા T20 વર્લ્ડ કપ હોસ્ટ કરી ચૂક્યું છે. ઝિમ્બાબ્વે અને નામિબિયાએ તાજેતરમાં U-19 વર્લ્ડ કપનું સહ-આયોજન કર્યું હતું.

2007 T20 વર્લ્ડ કપ સાઉથ આફ્રિકામાં રમાયો હતો. ભારત ચેમ્પિયન બન્યું હતું.

ટુર્નામેન્ટમાં 14 ટીમ ભાગ લેશે

2027ની ટુર્નામેન્ટ 14 ટીમ વચ્ચે રમાશે. તેમાં 7-7 ટીમને બે ગ્રુપમાં વહેંચવામાં આવશે. દરેક ગ્રુપમાંથી ટૉપ-3 ટીમ સુપર સિક્સમાં જશે. ફુલ મેમ્બર ટીમ હોવાને કારણે સાઉથ આફ્રિકા અને ઝિમ્બાબ્વે સીધા ક્વોલિફાય કરી ચૂક્યા છે. જ્યારે નામિબિયાને ક્વોલિફિકેશન પ્રક્રિયામાંથી પસાર થવું પડશે.

ICC FTPની પહેલી ઇવેન્ટ હશે

આ વર્લ્ડ કપ 2027-31 ફ્યુચર ટૂર્સ પ્રોગ્રામ (FTP)ની પહેલી ICC ઇવેન્ટ હશે. FTPની વિગતો આ વર્ષે હોંગકોંગમાં ICC મિટિંગમાં ફાઈનલ થશે. વર્લ્ડ ટેસ્ટ ચેમ્પિયનશિપના સ્ટ્રક્ચર અને તેના વિસ્તરણને લઈને ચર્ચા ચાલી રહી છે.

આ ઉપરાંત ICC ટૂંક સમયમાં નિર્ણય લેશે કે શું 12 પૂર્ણ સભ્ય રાષ્ટ્રો ઝિમ્બાબ્વે, આયર્લેન્ડ અને અફઘાનિસ્તાન, વર્લ્ડ ટેસ્ટ ચેમ્પિયનશિપ (WTC)માં સામેલ થશે કે નહીં. તેમના માટે એક-એક ટેસ્ટ WTC શેડ્યૂલમાં રાખી શકાય છે. આ નિર્ણય જુલાઈમાં એડિનબર્ગ AGMમાં થઈ શકે છે.

દિવ્ય ભાસ્કરને Google પર મનપસંદ સોર્સ બનાવો