ભારત અને ઇંગ્લેન્ડ વચ્ચે બીજી T20 મેચ શનિવારે માન્ચેસ્ટરના ઓલ્ડ ટ્રેફર્ડ ખાતે રમાશે. દાવ પર માત્ર સિરીઝની લીડ નથી, પરંતુ ટીમ ઈન્ડિયાની અંદર વધી રહેલી હરીફાઈ પણ હશે. મેદાન પર મુકાબલો ઇંગ્લેન્ડ સામે હશે, પરંતુ ડ્રેસિંગ રૂમમાં સૌથી વધુ ચર્ચા 15 વર્ષના વૈભવ સૂર્યવંશીની છે. તેણે હજુ સુધી ભારત માટે એક પણ મેચ રમી નથી, પરંતુ તેની હાજરીએ ટીમના કેટલાક બેટર્સ પર ચોક્કસથી દબાણ ઘણું વધારી દીધું છે.

ટીમ મેનેજમેન્ટ સતત કહી રહ્યું છે કે વૈભવને ઉતાવળમાં રમાડવામાં નહીં આવે. પરંતુ ક્રિકેટમાં ઇંતેજાર એટલો જ લાંબો હોય છે, જેટલો સિનિયર ખેલાડીઓ પોતાના પ્રદર્શનથી તેને લાંબો બનાવે. આ જ કારણ છે કે માન્ચેસ્ટર T20માં સૌથી વધુ દબાણ બે બેટર્સ પર છે; સંજુ સેમસન અને વાઇસ કેપ્ટન તિલક વર્મા પર હશે.

ટીમ ઈન્ડિયાના ફોટો શૂટ દરમિયાન વૈભવ સૂર્યવંશી.

સ્ટાઇલમાં દેખાયો વૈભવ, મેન ઇન બ્લુ!; VIDEO

ભારત અને ઇંગ્લેન્ડ વચ્ચે આવતીકાલે 4 જુલાઈએ બીજી T20 મેચ શનિવારે માન્ચેસ્ટરમાં રમાશે. ટીમ ઈન્ડિયા ખુબ જ સ્ટાઇલમાં એક લક્ઝરી બસથી ડરહામથી માન્ચેસ્ટર પહોંચતી જોવા મળી છે. BCCIએ ટીમ ઈન્ડિયાનો ડરહામથી માન્ચેસ્ટર જતો મેન ઇન બ્લુનો ખુબ જ સ્ટાઇલિશ વીડિયો સોશિયલ મીડિયા પર પોસ્ટ કર્યો છે. આ વીડિયોની શરૂઆતમાં વૈભવ સૂર્યવંશી ખુબ જ સ્ટાઇલથી સનગ્લાસ અથવા ગોગલ્સ પહેરતો જોવા મળી રહ્યો છે. અગાઉની હારને ભૂલીને આ ખેલાડીઓ આગળ વધી ચૂક્યા છે. કેપ્ટન શ્રેયસ અય્યર ટીમના શાંત અને સમજદાર લીડરની જેમ દબાણથી મુક્ત દેખાઈ રહ્યો છે.

સંજુ માટે હવે દરેક ઇનિંગ ‘ઓડિશન’ જેવી

સંજુ સેમસન માટે આ માત્ર વધુ એક T20 મેચ નથી. પહેલી મેચમાં તે 7 બોલમાં માત્ર 1 રન બનાવીને આઉટ થયો હતો. આ પહેલા પણ તેની કરિયર એક મોટી ઇનિંગ અને સતત નિષ્ફળતાઓ વચ્ચે ઝૂલતી રહી છે.

T20 વર્લ્ડ કપમાં સતત મેચ વિનિંગ ઇનિંગ્સ રમ્યા બાદ તે મજબૂત સ્થિતિમાં જરૂર પહોંચ્યો હતો, પરંતુ ભારતીય ક્રિકેટમાં નવી પ્રતિભા આવ્યા પછી જૂની સિદ્ધિઓ બહુ લાંબા સમય સુધી સુરક્ષા કવચ નથી બનતી.

ઇંગ્લેન્ડની સીમ અને સ્વિંગ વાળી પરિસ્થિતિઓ હંમેશા સંજુની પરીક્ષા લેતી રહી છે. જો માન્ચેસ્ટરમાં પણ તેનું બેટ નહીં ચાલે, તો સવાલ માત્ર તેના ફોર્મનો નહીં, પરંતુ તેની જગ્યાનો પણ ઊભો થશે.

તિલક વર્મા પણ સુરક્ષિત નથી

તિલક વર્માનો કિસ્સો થોડો અલગ છે. તે સતત ટીમનો ભાગ છે, પરંતુ તેની પાસેથી જે પ્રકારની આક્રમક બેટિંગની અપેક્ષા રાખવામાં આવે છે, તે અત્યાર સુધી જોવા મળી નથી. મિડલ ઓવર્સમાં સ્પિનરો સામે તેનો સ્ટ્રાઇક રેટ ચિંતાનો વિષય રહ્યો છે. 2026માં રમાયેલી 12 T20 ઇન્ટરનેશનલ મેચમાં તેના બેટથી માત્ર 12 સિક્સર નીકળી છે. એટલે કે સરેરાશ એક મેચમાં એક સિક્સર. T20 ક્રિકેટમાં જ્યાં મેચ થોડી ઓવરોમાં પલટાઈ જાય છે, ત્યાં આવા આંકડા પસંદગીકારોની નજરથી બચી શકતા નથી.

આ જ કારણ છે કે દરેક મેચ પછી સોશિયલ મીડિયાથી લઈને ક્રિકેટ નિષ્ણાતો સુધી એક જ સવાલ ગુંજી રહ્યો છે કે, ‘વૈભવને તક ક્યારે મળશે?’

અભિષેકે પોતાની જગ્યા પાક્કી કરી લીધી

અભિષેક શર્માએ સતત આક્રમક બેટિંગ કરીને પોતાની જગ્યા લગભગ પાક્કી કરી લીધી છે. છેલ્લી ત્રણ T20 મેચોમાં તેણે 49 અને 59 રનની ઇનિંગ્સ રમી છે. આવા સમયમાં જો ટૉપ ઓર્ડરમાં ફેરફાર થાય છે, તો સૌથી પહેલા નજર એવા ખેલાડીઓ પર જશે જેઓ સતત અપેક્ષાઓ પર ખરા નથી ઉતરી રહ્યા.

અભિષેક શર્માએ ઇંગ્લેન્ડ સામેની પહેલી T20માં ફિફ્ટી ફટકારી.

બોલિંગમાં ફેરફાર મુશ્કેલ

ભારતીય બોલિંગમાં ફેરફારની શક્યતા ઓછી છે. ઓલ્ડ ટ્રેફર્ડની પીચ સ્પિનર્સને પણ મદદ કરે છે, તેથી રવિ બિશ્નોઈ અને વરુણ ચક્રવર્તી મહત્વની ભૂમિકા ભજવી શકે છે. બીજી તરફ ઇંગ્લેન્ડ પાસે હેરી બ્રુક, જોસ બટલર, ફિલ સોલ્ટ અને ટોમ બેન્ટન જેવા વિસ્ફોટક બેટ્સમેનો છે, જે કોઈપણ બોલિંગ આક્રમણની પરીક્ષા લઈ શકે છે.

શું માન્ચેસ્ટરમાં બદલાશે ટીમ ઈન્ડિયાનું ભવિષ્ય?

એવું બની શકે કે વૈભવ સૂર્યવંશી આ મેચમાં પણ પ્લેઇંગ-11નો ભાગ ન હોય. પરંતુ એ પણ સાચું છે કે તેની હાજરીએ ટીમ ઈન્ડિયામાં હરીફાઈનું સ્તર બદલી નાખ્યું છે. માન્ચેસ્ટરમાં જો સંજુ સેમસન અને તિલક વર્મા મોટી ઇનિંગ્સ રમશે તો વૈભવની રાહ થોડી વધુ લાંબી થઈ શકે છે. પરંતુ જો બંને ફરીથી નિષ્ફળ જશે, તો પસંદગીકારો માટે આગળનો નિર્ણય લેવો સરળ બની જશે.

વૈભવ કેમ બન્યો સૌથી મોટો ખતરો?

વૈભવ માત્ર એક યુવા ખેલાડી નથી, પરંતુ ભારતીય ક્રિકેટનો આગામી મોટો સ્ટાર માનવામાં આવી રહ્યો છે. 15 વર્ષની ઉંમરે નેશનલ ટીમ સુધી પહોંચવું જ દર્શાવે છે કે પસંદગીકારો તેને કેટલી ગંભીરતાથી જોઈ રહ્યા છે. તેણે ડોમેસ્ટિક ક્રિકેટ અને IPLમાં જે નીડર અંદાજમાં બેટિંગ કરી, તેણે સાફ કરી દીધું કે તે માત્ર ભવિષ્યનું ઇન્વેસ્ટમેન્ટ નથી, પરંતુ જરૂર પડ્યે વર્તમાનનો વિકલ્પ પણ છે.

દિવ્ય ભાસ્કરને Google પર મનપસંદ સોર્સ બનાવો