જો તમે iPhone વાપરો છો, તો તમારા ઇનબોક્સમાં આવતા દરેક ઇમેઇલ પર ભરોસો કરવો જોખમી સાબિત થઈ શકે છે. સાયબર હુમલાખોરો હાલમાં iPhone વપરાશકર્તાઓના અંગત ડેટા, પાસવર્ડ અને બેંકિંગ વિગતો ચોરવા માટે એક અત્યંત ચાલાકીભર્યું કૌભાંડ ચલાવી રહ્યા છે, જેને ‘iCloud સ્ટોરેજ સ્કેમ’ તરીકે ઓળખવામાં આવે છે.

કૌભાંડની મોડસ ઓપરેન્ડી (કાર્યપદ્ધતિ)

આ કૌભાંડની શરૂઆત એક ઇમેઇલથી થાય છે, જે દેખાવમાં બિલકુલ એપલ (Apple) ના સત્તાવાર મેઇલ જેવો જ લાગે છે. આ ઇમેઇલમાં વપરાશકર્તાને ડરાવવામાં આવે છે કે તેમનું iCloud સ્ટોરેજ સંપૂર્ણ ભરાઈ ગયું છે. વધુમાં, એવી ધમકી આપવામાં આવે છે કે જો આગામી ૪૮ કલાકમાં સ્ટોરેજ અપગ્રેડ કરવામાં નહીં આવે, તો તમારા કિંમતી ફોટા, વિડિયો અને બેકઅપ ફાઇલો કાયમ માટે કાઢી નાખવામાં આવશે. આ ભયના કારણે વપરાશકર્તા ઉતાવળમાં ઇમેઇલમાં આપેલી ‘અપગ્રેડ’ લિંક પર ક્લિક કરી બેસે છે.

ફિશિંગ વેબસાઇટની જાળ

જેવા તમે તે લિંક પર ક્લિક કરો છો, તે તમને એપલની નકલી વેબસાઇટ પર લઈ જાય છે. અહીં તમારી પાસે એપલ આઈડી (Apple ID) અને પાસવર્ડ માંગવામાં આવે છે. જો તમે ત્યાં તમારી વિગતો દાખલ કરો છો, તો તે સીધી જ હેકર્સ પાસે પહોંચી જાય છે. ઘણીવાર આ સ્કેમર્સ પેમેન્ટની વિગતો પણ માંગે છે, જેનાથી તમારા બેંક ખાતામાંથી પૈસાની ચોરી થઈ શકે છે.

સ્કેમર્સની દબાણ કરવાની પદ્ધતિ

નિષ્ણાતોના જણાવ્યા મુજબ, સ્કેમર્સ ‘અર્જન્સી’ (તાકીદ) ઊભી કરે છે. વારંવાર ઇમેઇલ મોકલીને વપરાશકર્તાને એવું વિચારવા મજબૂર કરે છે કે તેમની પાસે સમય ઓછો છે. તેઓ લોગો, બ્રાન્ડિંગ અને ભાષા એવી વાપરે છે કે સામાન્ય વપરાશકર્તાને તે અસલી લાગે.

બચવા માટે શું કરવું?

1. સેટિંગ્સ તપાસો: ઇમેઇલની લિંક પર ક્લિક કરવાને બદલે તમારા iPhone ના ‘સેટિંગ્સ’માં જઈને ‘iCloud’ વિકલ્પમાં સ્ટોરેજ સ્ટેટસ જાતે તપાસો.

2. સેન્ડરનું એડ્રેસ ચકાસો: ઇમેઇલ મોકલનારનું સરનામું ધ્યાનથી જુઓ. સત્તાવાર ઇમેઇલ હંમેશા @apple.com ડોમેન પરથી જ આવે છે.

3. શંકાસ્પદ લિંક્સથી બચો: અજાણ્યા ઇમેઇલમાં આપેલી કોઈ પણ લિંક પર ક્લિક ન કરો કે પેમેન્ટની વિગતો ન આપો.

4. ટુ-ફેક્ટર ઓથેન્ટિકેશન: તમારા Apple ID પર ટુ-ફેક્ટર ઓથેન્ટિકેશન (2FA) હંમેશા ચાલુ રાખો જેથી પાસવર્ડ ચોરાય તો પણ તમારું એકાઉન્ટ સુરક્ષિત રહે.

આ પણ વાંચોઃ Lifestyle: અનિદ્રાની સમસ્યાને કહો બાય-બાય! સારી ઊંઘ માટે આજે જ બદલી લો આ 4 આદતો