ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC) એ F-35 પર હુમલાના ફૂટેજ જાહેર કર્યા છે, જોકે તેની પુષ્ટિ થઈ શકી નથી.

ઈરાનના હુમલામાં એક અમેરિકી F-35 ફાઈટર જેટને નુકસાન પહોંચ્યાના સમાચાર છે. CNNના રિપોર્ટ અનુસાર, હુમલા બાદ જેટને મિડલ ઈસ્ટના એક અમેરિકી એરબેઝ પર ઈમરજન્સી લેન્ડિંગ કરવી પડી.

અમેરિકી સેન્ટ્રલ કમાન્ડના પ્રવક્તા કેપ્ટન ટિમ હોકિન્સે જણાવ્યું કે આ સ્ટેલ્થ ફાઈટર જેટ ઈરાન ઉપર એક કોમ્બેટ મિશન પર હતું, ત્યારે તેના પર હુમલો થયો. જોકે, વિમાન સુરક્ષિત રીતે ઉતારી લેવામાં આવ્યું અને પાયલટ સંપૂર્ણપણે સુરક્ષિત છે. આ ઘટનાની તપાસ કરવામાં આવી રહી છે.

ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC)એ એક વીડિયો જાહેર કર્યો છે, જેમાં કથિત રીતે અમેરિકી F-35 ફાઈટર જેટને ઈરાન ઉપર નિશાન બનાવતા દર્શાવવામાં આવ્યું છે. જોકે, આ વીડિયોની સ્વતંત્ર રીતે પુષ્ટિ થઈ શકી નથી.

રિપોર્ટ અનુસાર, આ પહેલીવાર હોઈ શકે છે જ્યારે આ યુદ્ધ દરમિયાન ઈરાને કોઈ અમેરિકી સૈન્ય વિમાનને નિશાન બનાવ્યું હોય. F-35 દુનિયાના સૌથી એડવાન્સ લડાકુ વિમાનોમાં ગણાય છે અને તેની કિંમત 100 મિલિયન ડોલરથી વધુ હોય છે.

સાઉદીના વિદેશ મંત્રી ફૈઝલ બિન ફરહાન અલ સઉદે કહ્યું કે ઈરાને હવે તેના હુમલા બંધ કરવા જોઈએ.

અમેરિકા-ઇઝરાયલ અને ઈરાન વચ્ચે ચાલી રહેલા યુદ્ધનો આજે 20મો દિવસ છે. કતારે ગુરુવારે મોટી કાર્યવાહી કરતા ઈરાનના કેટલાક મિલિટરી અને સિક્યુરિટી અધિકારીઓને “અનિચ્છનીય વ્યક્તિ” (Persona Non Grata) જાહેર કર્યા છે અને તેમને 24 કલાકમાં દેશ છોડવા માટે કહ્યું છે.

આ કાર્યવાહી કતારના સૌથી મોટા ગેસ પ્લાન્ટ ‘રાસ લફાન’ પર ઈરાની મિસાઈલ હુમલા બાદ કરવામાં આવી છે. આ હુમલાને કારણે ત્યાં આગ લાગી ગઈ હતી અને મોટું નુકસાન થયું હતું.

આ સમગ્ર મામલો ત્યારે શરૂ થયો જ્યારે ઇઝરાયેલે ઈરાનના ‘પાર્સ’ ગેસ પ્લાન્ટ પર હુમલો કર્યો હતો. તેના જવાબમાં ઈરાને કતાર પર હુમલો કરી દીધો, ત્યારબાદ કતારે ઈરાન પર “રેડ લાઇન પાર કરવાનો” આરોપ લગાવ્યો હતો.

બીજી તરફ, ઈરાનમાં 3 લોકોને ફાંસી આપી દેવામાં આવી છે. આ લોકો પર જાન્યુઆરીમાં થયેલા સરકાર વિરોધી પ્રદર્શનો દરમિયાન 2 પોલીસકર્મીઓની હત્યા કરવાનો આરોપ હતો.

અમેરિકા-ઇઝરાયલ અને ઈરાન યુદ્ધ સંબંધિત અપડેટ્સ માટે નીચે બ્લોગ જુઓ…

લાઈવ અપડેટ્સ

5 મિનિટ પેહલા

• કૉપી લિંક

દક્ષિણ લેબનાનમાં ઈઝરાયેલે નવો હવાઈ હુમલો કર્યો

લેબનાનમાં હાજર અમારા સંવાદદાતાઓ અનુસાર, ઈઝરાયેલી સેનાએ દક્ષિણ લેબનાનના કબ્રિખા કસબા અને મરજાયૂન વિસ્તારના ટૌલીન ક્ષેત્રને નિશાન બનાવ્યું છે.

12 મિનિટ પેહલા

• કૉપી લિંક

સાઉદી અરેબિયાએ ત્રણ ડ્રોન તોડી પાડ્યા, મિસાઈલ પણ નષ્ટ કરી

સાઉદી અરેબિયાના સંરક્ષણ મંત્રાલયે જણાવ્યું કે દેશના પૂર્વી વિસ્તારમાં ત્રણ ડ્રોનને રોકીને નષ્ટ કરવામાં આવ્યા છે.

આ પહેલા આજે એક ડ્રોન યનબૂ (Yanbu) શહેરની સેમરેફ (SAMREF) રિફાઇનરી સાથે અથડાયું હતું. આ ઉપરાંત, યનબૂ પોર્ટ તરફ આવી રહેલી એક બેલેસ્ટિક મિસાઈલને પણ વચ્ચે જ તોડી પાડવામાં આવી હતી.

27 મિનિટ પેહલા

• કૉપી લિંક

ઈઝરાયેલી હુમલાથી દક્ષિણ લેબનાનમાં વીજળી ખોરવાઈ

દક્ષિણ લેબનાનમાં આજે થયેલા ઈઝરાયેલી હુમલાને કારણે એક મુખ્ય વીજળી સબસ્ટેશન બંધ થઈ ગયું છે. લેબનાનની સરકારી વીજ કંપનીએ જણાવ્યું કે આ હુમલો દેશના પાયાના માળખા (ઇન્ફ્રાસ્ટ્રક્ચર) પર વધી રહેલા હુમલાઓનો સંકેત છે.

સરકારી સમાચાર એજન્સીના જણાવ્યા અનુસાર, બિંત જુબૈલ વિસ્તારમાં આવેલા આ સબસ્ટેશનના અનેક ભાગોને નુકસાન થયું છે. જેના કારણે શહેર અને આસપાસના વિસ્તારોમાં વીજ પુરવઠો પ્રભાવિત થયો છે.

45 મિનિટ પેહલા

• કૉપી લિંક

કુવૈતની ઓઇલ કંપની પર ડ્રોન હુમલો

મિડલ ઇસ્ટમાં ચાલી રહેલા યુદ્ધ વચ્ચે કુવૈતમાં ઓઇલ કંપની પર ડ્રોન હુમલો થયો છે. કુવૈતના સંરક્ષણ મંત્રાલય અનુસાર, બે ડ્રોને નેશનલ પેટ્રોલિયમ કંપની સાથે સંકળાયેલા ઓપરેશનલ યુનિટ્સને નિશાન બનાવ્યા, જેના કારણે ત્યાં આગ લાગી ગઈ.

જોકે, આ હુમલામાં કોઈ જાનહાનિના સમાચાર નથી. સંરક્ષણ મંત્રાલયના પ્રવક્તા કર્નલ સઉદ અબ્દુલઅઝીઝ અલ-ઓતૈબીએ જણાવ્યું કે છેલ્લા 24 કલાકમાં કુવૈતના એરસ્પેસમાં 18 શંકાસ્પદ ડ્રોન જોવા મળ્યા, જેમાંથી 13ને એર ડિફેન્સ સિસ્ટમે તોડી પાડ્યા.

46 મિનિટ પેહલા

• કૉપી લિંક

ટ્રમ્પ બોલ્યા- ઓઈલની કિંમતો અપેક્ષા કરતાં ઓછી વધી

યુદ્ધ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે તેમને આશા હતી કે ઈરાન પર હુમલા બાદ ઓઈલની કિંમતોમાં વધુ ઉછાળો આવશે, પરંતુ એવું થયું નહીં.

વ્હાઇટ હાઉસમાં જાપાનના વડાપ્રધાન સાને તાકાઇચી સાથેની બેઠક દરમિયાન ટ્રમ્પે કહ્યું, “મને લાગતું હતું કે ઓઈલની કિંમતો ખૂબ જ વધશે, પરિસ્થિતિ આના કરતાં ઘણી ખરાબ થઈ શકતી હતી, પરંતુ અત્યારે સ્થિતિ એટલી ખરાબ નથી.”

તેમણે એમ પણ કહ્યું કે પરિસ્થિતિઓ જલ્દી જ સામાન્ય થઈ શકે છે. ટ્રમ્પે કહ્યું કે જો જરૂર પડશે તો અમેરિકા ઈરાની ઓઈલ પર લાગેલા પ્રતિબંધોમાં ઢીલ આપી શકે છે, જેથી વૈશ્વિક કિંમતોને કાબૂમાં રાખી શકાય.

ખરેખરમાં, મિડલ ઈસ્ટમાં વધતા તણાવને કારણે વૈશ્વિક ઓઈલ બજારમાં ઉતાર-ચઢાવ જોવા મળી રહ્યો છે. બ્રેન્ટ ક્રૂડની કિંમતો વધીને 115 ડોલર પ્રતિ બેરલ સુધી પહોંચી ગઈ છે.

48 મિનિટ પેહલા

• કૉપી લિંક

ઈરાને F-35 પર હુમલાનો વીડિયો જાહેર કર્યો

ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC)એ એક વીડિયો જાહેર કર્યો છે, જેમાં કથિત રીતે અમેરિકી F-35 ફાઈટર જેટને ઈરાન ઉપર નિશાન બનાવતા દર્શાવવામાં આવ્યું છે. જોકે, આ વીડિયોની સ્વતંત્ર રીતે પુષ્ટિ થઈ શકી નથી.

49 મિનિટ પેહલા

• કૉપી લિંક

ટ્રમ્પ બોલ્યા- મિડલ ઈસ્ટમાં અમેરિકી સૈનિકો મોકલી નથી રહ્યા

અમેરિકા-ઈરાન યુદ્ધ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે સ્પષ્ટ કર્યું છે કે હાલમાં અમેરિકા મિડલ ઈસ્ટમાં પોતાના ગ્રાઉન્ડ ટ્રુપ્સ મોકલી રહ્યું નથી. વ્હાઇટ હાઉસમાં પત્રકારો સાથે વાતચીત દરમિયાન ટ્રમ્પે કહ્યું,

હું ક્યાંય પણ સૈનિકો મોકલી રહ્યો નથી. જો મોકલતો પણ, તો હું તમને જણાવતો નહીં, પરંતુ અમે સૈનિકો મોકલી રહ્યા નથી.

ટ્રમ્પનું આ નિવેદન તે રિપોર્ટ પછી આવ્યું છે જેમાં દાવો કરવામાં આવ્યો હતો કે અમેરિકા હજારો સૈનિકો મિડલ ઈસ્ટ મોકલવા પર વિચાર કરી રહ્યું છે. જોકે વ્હાઇટ હાઉસના એક અધિકારીએ પણ કહ્યું કે હજુ સુધી ગ્રાઉન્ડ ટ્રુપ્સ મોકલવાનો કોઈ નિર્ણય થયો નથી, પરંતુ ટ્રમ્પ બધા વિકલ્પો ખુલ્લા રાખે છે.

આ દરમિયાન સમાચાર છે કે અમેરિકી મરીન યુનિટને પહેલાથી જ મિડલ ઈસ્ટમાં તૈનાત કરવામાં આવ્યું છે, જોકે તે સ્પષ્ટ નથી કે તેનો જમીની યુદ્ધ માટે ઉપયોગ કરવામાં આવશે કે નહીં.

49 મિનિટ પેહલા

• કૉપી લિંક

ઇઝરાયલના હાઇફામાં ઇરાનનો ઓઇલ રિફાઇનરી પર હુમલો

યુદ્ધ વચ્ચે ઇરાને ઇઝરાયેલના મહત્વના ઉર્જા સ્થળ પર મોટો હુમલો કર્યો છે. ગુરુવારે ઇરાને બેલેસ્ટિક મિસાઇલથી ઇઝરાયેલના હાઇફા શહેરમાં એક મુખ્ય ઓઇલ રિફાઇનરી કોમ્પ્લેક્સ પર હુમલો કર્યો.

હુમલા બાદ રિફાઇનરી પરિસરમાં આગ લાગી ગઈ, જેને બુઝાવવા માટે ફાયર બ્રિગેડ અને રાહત ટીમોને તૈનાત કરવામાં આવી છે. ઘટનાસ્થળે સર્ચ ઓપરેશન ચલાવવામાં આવી રહ્યું છે અને સંભવિત ખતરનાક કેમિકલ લીકની પણ તપાસ કરવામાં આવી રહી છે.

જોકે, શરૂઆતની માહિતી મુજબ આ હુમલામાં કોઈના જાનહાનિના સમાચાર નથી. આ રિફાઇનરી ઇઝરાયલના સૌથી મોટા ઉર્જા કેન્દ્રોમાંની એક છે, જ્યાં ઇંધણ અને કેમિકલનું ઉત્પાદન થાય છે.

દિવ્ય ભાસ્કરને Google પર મનપસંદ સોર્સ બનાવો