બોલિવૂડ અભિનેત્રી કેટરિના કૈફ તાજેતરમાં પતિ વિકી કૌશલ સાથે દિવંગત ફિલ્મ નિર્દેશક કુકુ કોહલીના અંતિમ સંસ્કાર અને પ્રાર્થના સભામાં ઉપસ્થિત રહી હતી. સફેદ આઉટફિટમાં કેટરિના ખૂબ જ સાદગીપૂર્ણ અને સૌમ્ય દેખાઈ રહી હતી. જોકે, ડિલિવરી પછીના વધેલા વજન (પોસ્ટપાર્ટમ વેઇટ)ને લઈને સોશિયલ મીડિયા પર અમુક યુઝર્સે તેને નિર્દયતાથી ટ્રોલ કરવાનું શરૂ કરી દીધું હતું. આ બાબતે હવે બોલિવૂડ અભિનેત્રી શિવાલિકા ઓબેરોય કેટરિનાના સમર્થનમાં આગળ આવી છે અને ટ્રોલર્સની માનસિકતા પર આકરા પ્રહારો કર્યા છે.

શિવાલિકા ઓબેરોયનો ટ્રોલર્સને જડબાતોડ જવાબ

શિવાલિકાએ પોતાના સોશિયલ મીડિયા એકાઉન્ટ પર કેટરિનાની તસવીર શેર કરીને આ પ્રકારની ટિપ્પણીઓ સામે સખત નારાજગી વ્યક્ત કરી છે. તેણે લખ્યું કે, “આખરે લોકોને શું થઈ ગયું છે? આ જ તો માતૃત્વ છે! બાળકના જન્મ પછી મહિલાના શરીરમાં આવા ફેરફારો થવા તદ્દન સામાન્ય બાબત છે. સુંદરતા, સોજો, થાક અને આ બધા વચ્ચે થતા અસંખ્ય શારીરિક ફેરફારો—આ જ સાચી પોસ્ટપાર્ટમ રિકવરી છે.”

ઈન્સ્ટાગ્રામ પરથી લીધેલો સ્ક્રીનશોટ

શિવાલિકાએ વધુમાં અપીલ કરતાં જણાવ્યું કે, લોકોએ માતૃત્વને લઈને બનાવેલી અવાસ્તવિક અપેક્ષાઓ અને છબીઓનો મહિમા ગાવાનું હવે બંધ કરવું જોઈએ, જેનું વાસ્તવિકતા સાથે કોઈ લેવાદેવા નથી.

સોશિયલ મીડિયા પર થઈ હતી અભદ્ર ટિપ્પણીઓ

25 ઑગસ્ટે ફિલ્મમેકર કુકુ કોહલીનું નિધન થયા બાદ 26 ઑગસ્ટે મુંબઈમાં યોજાયેલી શોકસભામાં કેટરિના લાંબા સમય બાદ જાહેરમાં જોવા મળી હતી. આ દરમિયાન સામે આવેલા વીડિયો અને ફોટોઝ પર કેટલાક યુઝર્સે તેના લુક અને વજનને ટાર્ગેટ કર્યું હતું. એક યુઝરે લખ્યું કે ‘કેટરિનાને આ શું થઈ ગયું?’, તો અન્ય એક યુઝરે તેના શરીરની તુલના ‘રસગુલ્લા’ સાથે કરી નાખી. કોઈકે વળી તેની ચાલવાની સ્ટાઈલ બદલાઈ ગઈ હોવાની કમેન્ટ કરી હતી.

જુઓ કેટરિનાની એ તસવીરો, જેના પર સોશિયલ મીડિયામાં થઈ રહી છે બોડીશેમિંગ

નવેમ્બરમાં માતા બની હતી કેટરિના

કેટરિના કૈફે ગયા વર્ષે નવેમ્બર મહિનામાં પુત્ર ‘વિહાન’ને જન્મ આપ્યો હતો. માતા બન્યા પછી કેટરિનાએ જાહેર કાર્યક્રમો અને લાઈમલાઈટથી અંતર જાળવી રાખ્યું છે.

શિવાલિકાની આ પોસ્ટ માત્ર કેટરિનાનો બચાવ નથી કરતી, પરંતુ સમાજમાં બાળકને જન્મ આપ્યા બાદ સ્ત્રીના શરીર પાસેથી રાખવામાં આવતી ગેરવાજબી અપેક્ષાઓ સામે પણ મોટો સવાલ ઊભો કરે છે. બાળકને જન્મ આપ્યા પછી શરીરને પોતાની પ્રાકૃતિક અવસ્થામાં પાછા ફરવા માટે પૂરતો સમય મળવો જોઈએ, નહીં કે બિનજરૂરી ટ્રોલિંગ.

દિવ્ય ભાસ્કરને Google પર મનપસંદ સોર્સ બનાવો