ઓટોમોબાઈલ કંપની મારુતિ સુઝુકી ઇન્ડિયાએ નાણાકીય વર્ષ 2025-26 ના ચોથા ક્વાર્ટરમાં 52,946 કરોડ રૂપિયાની કુલ કમાણી કરી. આ ગયા વર્ષની સરખામણીમાં 25% વધી છે. ગયા વર્ષના સમાન ક્વાર્ટરમાં કંપનીએ 42,431 કરોડ રૂપિયાની કમાણી કરી હતી. આ જ ક્વાર્ટરમાં કંપનીએ 6.76 લાખ કાર વેચી.

કુલ કમાણીમાંથી પગાર, ટેક્સ, કાચા માલની કિંમત જેવા ખર્ચાઓ બાદ કરીએ તો કંપની પાસે 3,659 કરોડ રૂપિયાનો ચોખ્ખો નફો (નેટ પ્રોફિટ) બચ્યો. આ 2025 ના જાન્યુઆરી-માર્ચ ક્વાર્ટર કરતાં 6.44% ઓછો રહ્યો છે. ગયા વર્ષે કંપનીને 3,911 કરોડ રૂપિયાનો નફો થયો હતો.

રોકાણકારોને ₹140 ડિવિડન્ડ આપશે કંપની

આ ઉપરાંત કંપનીએ તેના રોકાણકારોને 140 રૂપિયાનું ડિવિડન્ડ આપવાની પણ જાહેરાત કરી છે. કંપનીઓ તેમના નફાનો અમુક હિસ્સો તેમના શેરધારકોને આપે છે, જેને ડિવિડન્ડ કહેવાય છે.

રેવન્યુ 28.20% વધીને ₹52,462 કરોડ રહી

ચોથા ક્વાર્ટરમાં કંપનીને પ્રોડક્ટ અને સર્વિસ વેચીને 52,462 કરોડ રૂપિયાની આવક એટલે કે રેવન્યુ પ્રાપ્ત થઈ. વાર્ષિક ધોરણે આ 28.20% વધી છે. જાન્યુઆરી-માર્ચ 2025માં કંપનીએ 40,920 કરોડ રૂપિયાની આવક જનરેટ કરી હતી.

ચોથા ક્વાર્ટરમાં વાહનોનું વેચાણ 11.8% વધ્યું

ચોથા ક્વાર્ટરમાં મારુતિ સુઝુકીએ કુલ 6,76,209 વાહનો વેચ્યા. ઘરેલું બજારમાં કંપનીનું વેચાણ આ સમયગાળા દરમિયાન વાર્ષિક ધોરણે 3.7% વધ્યું, જ્યારે નિકાસ 61.3% વધુ રહી.

તેના કારણે કંપનીની વાર્ષિક ધોરણે એકંદર વેચાણ વૃદ્ધિ 11.8% રહી. ઘરેલું બજારમાં કંપનીએ 5,38,994 વાહનો વેચ્યા, જ્યારે 1,37,215 વાહનોની નિકાસ કરી. આ કંપનીની ઓલ-ટાઇમ હાઈ નિકાસ છે.

મારુતિનો શેર એક વર્ષમાં 9% વધ્યો

ચોથા ક્વાર્ટરના પરિણામો પછી, મારુતિ સુઝુકીનો શેર આજે 2.51% ઘટીને 12,890 રૂપિયા પર રહ્યો છે. છેલ્લા 6 મહિનામાં કંપનીનો શેર 21% ઘટ્યો છે.

જ્યારે, આ વર્ષે એટલે કે 1 જાન્યુઆરીથી અત્યાર સુધીમાં કંપનીનો શેર 23% ઘટ્યો છે. જ્યારે છેલ્લા એક વર્ષમાં કંપનીનો શેર 9% વધ્યો છે. મારુતિ સુઝુકીનું માર્કેટ કેપ 4.05 લાખ કરોડ રૂપિયા છે.

1982 માં મારુતિ સુઝુકી ઇન્ડિયાની સ્થાપના થઈ હતી

મારુતિ સુઝુકીની સ્થાપના 24 ફેબ્રુઆરી 1981ના રોજ ભારત સરકારની માલિકી હેઠળ મારુતિ ઇન્ડસ્ટ્રીઝ લિમિટેડ તરીકે થઈ હતી. 1982માં કંપનીએ જાપાનની સુઝુકી કોર્પોરેશન સાથે મળીને સંયુક્ત સાહસ ‘મારુતિ સુઝુકી ઇન્ડિયા લિમિટેડ’ની રચના કરી.

ભારતીયો માટે પ્રથમ બજેટ કાર 1983માં મારુતિ 800 લોન્ચ થઈ. 47,500 રૂપિયાની એક્સ-શોરૂમ કિંમતે કંપનીએ દેશના એક મોટા વર્ગને કાર ખરીદવા સક્ષમ બનાવ્યો હતો. મારુતિ સુઝુકી છેલ્લા 40 વર્ષમાં દેશમાં 3 કરોડથી વધુ વાહનો વેચી ચૂકી છે.

દિવ્ય ભાસ્કરને Google પર મનપસંદ સોર્સ બનાવો