‘સંબંધો નિભાવવા કરતાં તેમને સમજવા વધુ જરૂરી છે’ – આ જ વિચાર ‘મેક્સ, મિન એન્ડ મ્યાઉઝાકી’ ફિલ્મની વાર્તાના કેન્દ્રમાં છે. આ ફિલ્મ પ્રેમ અને વિરહની સાથે માનસિક સ્વાસ્થ્ય, એકલતા, સંબંધોમાં સંવાદ, પ્રતિબદ્ધતા અને પોતાની જાત સાથે જોડાવા જેવા વિષયો પર વાત કરે છે.

ડિરેક્ટર પદ્મકુમાર નરસિમ્હામૂર્તિ, એક્ટર સિદ્ધાર્થ મેનન અને એક્ટ્રેસ વિધાત્રી બંદીએ દિવ્ય ભાસ્કર સાથેની વાતચીતમાં ફિલ્મ, સંબંધોના પડકારો, થેરાપી અને રિજેક્શન વચ્ચે માનસિક સંતુલન પર વાત કરી.

ડિરેક્ટર પદ્મકુમાર નરસિમ્હામૂર્તિ કહે છે કે, ‘હિટ ફિલ્મ નહીં, પણ અર્થપૂર્ણ વાર્તા બનાવવાનો હેતુ હતો.’

પ્રશ્ન: તમારી ફિલ્મ સંબંધોના ભાવનાત્મક ઉતાર-ચઢાવ અને એકલતાને સંવેદનશીલ રીતે દર્શાવે છે. આ વાર્તા સુધી પહોંચવાની સફર કેવી રહી?

પદ્મકુમાર: આ ફિલ્મની સૌથી મોટી વિશેષતા એ રહી કે મને વાર્તા કહેવાની સંપૂર્ણ સ્વતંત્રતા મળી. નિર્માતાએ કોઈ દબાણ કર્યું નહીં. તેમણે વિશ્વાસ વ્યક્ત કર્યો કે, હું જેવી વાર્તા કહેવા માંગુ છું, તેને તે જ સ્વરૂપમાં પડદા પર લાવું. કદાચ આ જ કારણથી ફિલ્મ તેની મૂળ ભાવના સાથે દર્શકો સુધી પહોંચી શકી.

પ્રશ્ન: આજે જ્યારે મોટાભાગની ફિલ્મો ટ્રેન્ડને ધ્યાનમાં રાખીને બને છે, ત્યારે તમે અલગ રસ્તો શા માટે પસંદ કર્યો?

પદ્મકુમાર: જાહેરાત જગતમાં લાંબા સમય સુધી કામ કર્યા પછી મને અહેસાસ થયો કે, ફિલ્મ માત્ર મનોરંજનનું માધ્યમ ન હોવી જોઈએ. હું એવી વાર્તાઓ કહેવા માંગુ છું, જે જોયા પછી લોકોના મનમાં કંઈક છોડી જાય. મારા માટે ફિલ્મની અસર તેની કમાણી કરતાં વધુ મહત્વપૂર્ણ છે.

એક્ટર સિદ્ધાર્થ મેનન કહે છે કે ફિલ્મની વાર્તાએ તેને એક સારા માણસ બનવાનો અહેસાસ કરાવ્યો.

પ્રશ્ન: આ વાર્તાએ તમને કલાકાર તરીકે સૌથી વધુ કઈ વાતથી પ્રભાવિત કર્યા?

સિદ્ધાર્થ: જ્યારે મેં આખી સ્ક્રિપ્ટ સાંભળી, ત્યારે લાગ્યું કે આ માત્ર એક ફિલ્મ નથી, પણ એક અનુભવ છે. વાર્તા સાંભળતા જ મને લાગ્યું કે તે વ્યક્તિને અંદરથી વધુ સારા બનવા પ્રેરિત કરે છે. સારી વાર્તાઓ હંમેશા વ્યક્તિ સાથે લાંબા સમય સુધી રહે છે.

પ્રશ્ન: તમે આ ફિલ્મ સાથે જોડાવાનો નિર્ણય કઈ વાત પરથી કર્યો?

વિધાત્રી: પાત્રનો નાનો પરિચય વાંચતા જ મેં નક્કી કરી લીધું હતું કે, જો તક મળશે તો આ ફિલ્મ ચોક્કસ કરીશ. પછી આખી વાર્તા સાંભળતી વખતે હું ભાવુક થઈ ગઈ. મને લાગ્યું કે આ ફિલ્મ લોકોને તેમના સંબંધો અને પોતાના વિશે વિચારવા મજબૂર કરશે.

પ્રશ્ન: તમારા મતે સંબંધો તૂટવાનું સૌથી મોટું કારણ શું હોય છે?

સિદ્ધાર્થ: મારા મતે, સંબંધનો અંત આવવો ખોટું નથી, પરંતુ મહત્વ એ છે કે તમે તેમાંથી કેવી રીતે બહાર આવો છો. સંબંધમાં બંને લોકોનો વિકાસ એટલો જ જરૂરી છે, જેટલો સાથે રહેવું. જરૂર પડે તો વાતચીત કરો, થેરાપી લો અને જો અલગ થવું પડે, તો સન્માન સાથે અલગ થાઓ.

પ્રશ્ન: આજકાલ ‘સિચ્યુએશનશિપ’ અને ‘બેન્ચિંગ’ જેવા શબ્દો સામાન્ય બની ગયા છે. શું નવી પેઢી પ્રતિબદ્ધતા (કમિટમેન્ટ)થી દૂર ભાગે છે?

વિધાત્રી: મને એવું નથી લાગતું. આજના યુવાનો પહેલા પોતાને સમજવા માંગે છે. જ્યારે તેમને પોતાના વિશે સ્પષ્ટતા મળે છે, ત્યારે તેઓ સંબંધોમાં વધુ પ્રામાણિકતાથી આવે છે. જો સંબંધ સાચો લાગે તો કમિટમેન્ટ કરવામાં કોઈ ડર ન હોવો જોઈએ.

પ્રશ્ન: શું તમે પણ માનો છો કે આજના યુવાનો સંબંધોથી ભાગી રહ્યા છે?

સિદ્ધાર્થ: બિલકુલ નહીં. મેં નાની ઉંમરે લગ્ન કરનારા અને લાંબા સંબંધો પછી અલગ થનારા પણ જોયા છે. કોઈ એક અનુભવના આધારે આખી પેઢીને જજ કરી શકાય નહીં. મહત્વનું એ છે કે સંબંધ પૂરો થયા પછી પણ સન્માન જળવાઈ રહે.

ફિલ્મ ‘મેક્સ, મિન અને મ્યાઉઝાકી’ 24 જુલાઈ 2026ના રોજ સિનેમાઘરોમાં રિલીઝ થશે.

પ્રશ્ન: વિદેશોમાં ફિલ્મ બતાવતી વખતે કઈ પ્રતિક્રિયા તમારા માટે સૌથી યાદગાર રહી?

પદ્મકુમાર: ઘણા લોકોએ કહ્યું કે, આ તે પસંદગીની ભારતીય ફિલ્મોમાંની એક છે, જેમાં પુરુષ પાત્રો પોતાની ભાવનાઓને દબાવતા નથી. તેઓ સંવેદનશીલ છે અને પોતાની નબળાઈ સ્વીકારવાથી ડરતા નથી. આ પ્રતિક્રિયા મારા માટે ખૂબ જ ખાસ રહી.

પ્રશ્ન: શું આ વિચાર પાછળ તમારો કોઈ અંગત અનુભવ પણ રહ્યો?

પદ્મકુમાર: થોડા સમય પહેલા મેં મારા એક ખૂબ જ નજીકના મિત્રને ગુમાવ્યો. બહારથી તે હંમેશા ખુશ દેખાતા હતા, પરંતુ અંદર કેટલું દર્દ હતું, તેનો કોઈને અંદાજ નહોતો. ત્યારે મને લાગ્યું કે પુરુષોએ પણ પોતાની લાગણીઓ ખુલ્લેઆમ વ્યક્ત કરવી જોઈએ.

પ્રશ્ન: આજના સમયમાં સંવેદનશીલ વાર્તાઓ કેટલી જરૂરી છે?

પદ્મકુમાર: દુનિયામાં નફરત અને હિંસા વધી રહી છે. આવા સમયમાં ફિલ્મોની જવાબદારી માત્ર મનોરંજન પૂરતી સીમિત ન રહેવી જોઈએ. વાર્તાઓ લોકોને માનવતા, કરુણા અને એકબીજા પ્રત્યે સંવેદનશીલ બનવાની યાદ અપાવી શકે છે.

પ્રશ્ન: મુશ્કેલ સમયમાંથી બહાર આવવામાં સ્વજનોનો સાથ કેટલો મહત્વનો છે?

પદ્મકુમાર: મજબૂત સપોર્ટ સિસ્ટમ ખૂબ જ જરૂરી છે. એવા લોકો હોવા જોઈએ, જેમની સાથે તમે ખુલ્લેઆમ વાત કરી શકો. સાથે જ, જીવનને સકારાત્મક દૃષ્ટિકોણથી સ્વીકારવું પણ જરૂરી છે. સારા સંબંધો જ મનુષ્યની સૌથી મોટી તાકાત હોય છે.

વિધાત્રી બંદી જોન અબ્રાહમની સાથે ‘ડિપ્લોમેટ’માં જોવા મળી હતી.

પ્રશ્ન: સતત મળતા રિજેક્શન વચ્ચે માનસિક સંતુલન કેવી રીતે જાળવી રાખો છો?

વિધાત્રી: આ ઇન્ડસ્ટ્રીમાં રિજેક્શન રોજનો ભાગ છે. આવા સમયે પરિવાર અને મિત્રોનો સાથ ખૂબ જ જરૂરી બની જાય છે. સમય જતાં મેં શીખ્યું છે કે દરેકને પોતાના જીવનમાં સ્થાન આપવું જરૂરી નથી. પોતાની માનસિક શાંતિનું રક્ષણ કરવું પણ એટલું જ મહત્વનું છે.

પ્રશ્ન: શું તમે ક્યારેય પ્રોફેશનલ મદદ એટલે કે થેરાપી લીધી છે?

સિદ્ધાર્થ: હા, મેં થેરાપી લીધી છે અને તેનો ફાયદો પણ અનુભવ્યો છે. માનસિક સ્વાસ્થ્યની સંભાળ એટલી જ જરૂરી છે, જેટલી શારીરિક સ્વાસ્થ્યની.

પ્રશ્ન: દર્શકો માટે તમારો અંતિમ સંદેશ?

પદ્મકુમાર: અમારો પ્રયાસ માત્ર એક ફિલ્મ બનાવવાનો ન હતો, પરંતુ એવી વાર્તા કહેવાનો હતો, જે લોકોના દિલ સુધી પહોંચે અને તેમને થોડા સારા માણસ બનવાની પ્રેરણા આપે.

_______________________________________

આ ઇન્ટરવ્યુ પણ વાંચો..

‘ધુરંધર’ જેવી ફિલ્મો પર રાજકીય દબાણ દેખાય છે’:નફીસાએ કહ્યું- યુવાનો બદલાતા સિનેમાની રાજનીતિ સમજે, નાસરે કહ્યું- બ્રેકઅપ જીવનનો અંત નથી

શું બ્રેકઅપ પછી જીવન સમાપ્ત થઈ જાય છે? શું હિંસક સંબંધને માત્ર એટલા માટે જ નિભાવતા રહેવું જોઈએ કારણ કે તે સંબંધ છે? આવા પ્રશ્નો પર એક્ટર નાસર અને એક્ટ્રેસ તથા સામાજિક કાર્યકર નફીસા અલીએ ફિલ્મ ‘મેક્સ, મિન ઔર મ્યાઉઝાકી’ના પ્રમોશન દરમિયાન દિવ્ય ભાસ્કર સાથે વાત કરી. સંપૂર્ણ સમાચાર વાંચો…

દિવ્ય ભાસ્કરને Google પર મનપસંદ સોર્સ બનાવો