મેટા કંપનીએ ફેસબુક, ઇન્સ્ટાગ્રામ અને વોટ્સએપના યુઝર્સ માટે હવે પેઇડ ‘પ્લસ’ (Paid Plus) વર્ઝન લોન્ચ કરવાની સત્તાવાર જાહેરાત કરી છે. આ નવા પ્લસ વર્ઝન હેઠળ યુઝર્સને કેટલાક ખાસ કસ્ટમાઇઝેશન ટૂલ્સ અને પ્રીમિયમ સુવિધાઓ મળશે, પરંતુ આ સુવિધાઓનો લાભ લેવા માટે ગ્રાહકોએ મોબાઈલ રિચાર્જની જેમ દર મહિને નિશ્ચિત ચાર્જ ચૂકવવો પડશે. મેટાના આ આર્થિક પગલાની અસર ભારત સહિત વિશ્વભરના સોશિયલ મીડિયા યુઝર્સ પર સીધી જોવા મળશે.

વાસ્તવમાં, અગાઉ એલોન મસ્કની માલિકીની મેસેજિંગ એપ્લિકેશન ‘X’ (ટ્વિટર) એ પણ આવું જ પેઇડ મોડલ અપનાવ્યું હતું, જેનાથી તેની માસિક આવકમાં ધરખમ વધારો થયો હતો. હવે તે જ રસ્તે ચાલીને મેટા કંપનીએ પણ પોતાની આવકના સ્ત્રોત વધારવા માટે સબ્સ્ક્રિપ્શન પ્લાન રજૂ કર્યા છે. કંપનીએ સ્પષ્ટ કર્યું છે કે જે યુઝર્સ પ્લસ વર્ઝન સબ્સ્ક્રાઇબ કરશે, તેમને જ વિશિષ્ટ ટૂલ્સ અને એડવાન્સ સુવિધાઓ આપવામાં આવશે, જે હવે સામાન્ય કે ફ્રી વર્ઝન વાપરતા લોકોને ઉપલબ્ધ રહેશે નહીં.

કેટલો રહેશે માસિક ખર્ચ?

મેટા દ્વારા જાહેર કરાયેલા સત્તાવાર આંકડા મુજબ, આ એક માસિક સબ્સ્ક્રિપ્શન પ્લાન હશે.

ઇન્સ્ટાગ્રામ પ્લસ અને ફેસબુક પ્લસ: આ બંને પ્લેટફોર્મના પ્રીમિયમ વર્ઝન માટે યુઝર્સે દર મહિને $3.99 (આશરે ₹૩૮૭) ચૂકવવા પડશે.

વોટ્સએપ પ્લસ: આ લોકપ્રિય મેસેજિંગ એપના પ્લસ વર્ઝન માટે માસિક પ્લાન $2.99 (આશરે ₹૨૯૦) નક્કી કરવામાં આવ્યો છે.

જો કે, મેટા કંપનીએ હજુ સુધી ભારતીય બજાર માટે આ માસિક પ્લાનની ચોક્કસ કિંમતો રૂપિયામાં સત્તાવાર રીતે જાહેર કરી નથી, પરંતુ તે ટૂંક સમયમાં રજૂ થાય તેવી શક્યતા છે.

પ્લસ વર્ઝનમાં કઈ ખાસ સુવિધાઓ મળશે?

ટેક અહેવાલો અનુસાર, પેઇડ વર્ઝન ‘વોટ્સએપ પ્લસ’ માં યુઝર્સના વ્યક્તિગત મેસેજિંગ અનુભવને બહેતર બનાવવા પર ખાસ ધ્યાન કેન્દ્રિત કરવામાં આવ્યું છે. આ સબ્સ્ક્રિપ્શન લેનારા ગ્રાહકોને પોતાની ચેટ સ્ક્રીન માટે કસ્ટમાઇઝ્ડ થીમ્સ, દરેક કોન્ટેક્ટ માટે અલગ-અલગ રિંગટોન અને અનન્ય સ્ટીકરો વાપરવાની મંજૂરી મળશે. આ ઉપરાંત, સૌથી મહત્વનો ફેરફાર એ છે કે પ્લસ યુઝર્સ પોતાની એપ્લિકેશનમાં ૩ થી વધુ ચેટ્સને ટોચ પર ‘પિન’ (Pin) કરી શકશે. હાલના ફ્રી વર્ઝનમાં યુઝર્સ માત્ર ત્રણ જ ચેટ પિન કરી શકે છે. એકંદરે, મેટાનું આ નવું પેઇડ મોડલ સોશિયલ મીડિયાના ઉપયોગની રીતને સંપૂર્ણપણે બદલી નાખશે.

આ પણ વાંચોઃ El Nino : આ વર્ષે અલ નીનો મચાવશે ભયંકર તબાહી! અવકાશમાંથી નાસાની ખૌફનાક ચેતવણી