આર્ટિફિશિયલ ઇન્ટેલિજન્સ (AI) ની દુનિયામાં એક મોટી ક્રાંતિ સર્જાઈ છે, કારણ કે OpenAI દ્વારા તેનું અત્યાધુનિક મોડેલ GPT-6 Astra સત્તાવાર રીતે લોન્ચ કરી દેવામાં આવ્યું છે. આ નવા AI મોડેલને માનવ સમકક્ષ વિચારી શકવાની ક્ષમતા ધરાવતું ગણાવવામાં આવી રહ્યું છે, જેના કારણે ટેક વર્તુળોમાં હવે ‘શું AGI (Artificial General Intelligence) નો યુગ શરૂ થઈ ગયો છે?’ તે અંગે ગરમાગરમ ચર્ચાઓ શરૂ થઈ ગઈ છે. કંપનીના જણાવ્યા અનુસાર, આ મોડેલ AI ની દુનિયામાં સૌથી મોટું ગેમ ચેન્જર સાબિત થઈ શકે છે. સુરક્ષાના જોખમોને ઘટાડવા માટે તેમાં અત્યંત કડક સુરક્ષા પગલાં પણ સામેલ કરવામાં આવ્યા છે.  

કોને મળશે ઍક્સેસ અને તેની કિંમતની વિગતો

શરૂઆતમાં આ મોડેલની પહોંચ OpenAI ના ડેબ્રેક ટેસ્ટિંગ પ્રોગ્રામમાં ભાગ લેનારા વ્યવસાયિક વપરાશકર્તાઓને આપવામાં આવી છે. કંપનીની બ્લોગ પોસ્ટ મુજબ, તે ટૂંક સમયમાં જ તમામ ChatGPT Plus, Pro, Business અને Enterprise સબ્સ્ક્રાઇબર્સ માટે ઉપલબ્ધ થશે. આ ઉપરાંત, ડેવલપર્સ તેને OpenAI API અને Amazon Web Services (AWS) દ્વારા પણ મેળવી શકશે. જોકે, ફ્રી-ટાયર અથવા સૌથી સસ્તા પ્લાનનો ઉપયોગ કરનાર યુઝર્સને હાલમાં આ સુવિધા મળશે નહીં. API દ્વારા એસ્ટ્રાની કિંમત પ્રતિ મિલિયન ઇનપુટ ટોકન્સ $10 અને આઉટપુટ ટોકન્સ $50 રાખવામાં આવી છે.  

સુરક્ષા પ્રાથમિકતા અને એસ્ટ્રાની અદ્ભુત કાર્યો કરવાની ક્ષમતા

કંપનીના પ્રમુખ ગ્રેગ બ્રોકમેને જણાવ્યું હતું કે આ સ્તરની ક્ષમતા માટે સુરક્ષા અમારી સર્વોચ્ચ પ્રાથમિકતા છે. તેને AGI તરફનું એક મહત્વપૂર્ણ પગથિયું માનવામાં આવી રહ્યું છે. OpenAI અનુસાર, એસ્ટ્રા વેબસાઇટ્સ બનાવવા, ડેટાનું વિશ્લેષણ કરવા, કોડિંગ કરવા, રમતો વિકસાવવા અને સાયબર સુરક્ષાના કાર્યો જાતે જ હેન્ડલ કરવામાં સક્ષમ છે. ઉદાહરણ તરીકે, એપાર્ટમેન્ટ શોધવાનું જે કામ પહેલા છ કલાક લેતું હતું, તે એસ્ટ્રાએ માત્ર ૧૦ મિનિટથી ઓછા સમયમાં પૂરું કરી બતાવ્યું છે.  

બેન્ચમાર્ક ટેસ્ટમાં શાનદાર પ્રદર્શન અને સાયબર સુરક્ષા માટે મહત્વ

કંપનીનો દાવો છે કે એસ્ટ્રા તેના અગાઉના મોડેલ કરતા લગભગ ૪૭% ઝડપથી કમ્પ્યુટર-સઘન કાર્યો પૂર્ણ કરે છે. OSWorld 2.0 અને ARC-AGI-3 જેવા બેન્ચમાર્ક ટેસ્ટમાં પણ આ મોડેલે શાનદાર પ્રદર્શન કર્યું છે. કંપનીના CEO સેમ ઓલ્ટમેને જણાવ્યું હતું કે આ પ્રકારના શક્તિશાળી સાધનોની વર્તમાન સમયમાં ખૂબ આવશ્યકતા છે, કારણ કે વિશ્વ સાયબર હુમલાઓ સામે રક્ષણ મેળવવાની દિશામાં મોટા પરિવર્તનની તૈયારી કરી રહ્યું છે.  

આ પણ વાંચોઃ ભારત માટે આવી રહ્યુ છે મોટું સંકટ? અલ નીનોને લઇને WMOએ જાહેર કરી ચેતવણી