પાકિસ્તાનના સાંસદ અને નેશનલ એસેમ્બલીના પૂર્વ સ્પીકર અસદ કૈસરે UAEમાં પાકિસ્તાની મુસાફરો સાથે ભેદભાવનો આરોપ લગાવ્યો છે. તેમણે મંગળવારે સંસદમાં જણાવ્યું કે ફ્લાઇટ રદ થયા બાદ હોટલમાં રોકાણ દરમિયાન ભારતીય અને અમેરિકી નાગરિકોને રૂમ આપવામાં આવ્યા, જ્યારે પાકિસ્તાની મુસાફરોને રહેવાની સુવિધા મળી નહીં. કૈસરે દાવો કર્યો કે તેઓ પોતે આ ઘટના દરમિયાન ત્યાં હાજર હતા. તેમના મતે, ફ્લાઇટ રદ થયા બાદ મુસાફરોને હોટલમાં રોકાવાની વ્યવસ્થા કરવામાં આવી રહી હતી. સાંસદ બોલ્યા- UAE સરકાર સમક્ષ પાકિસ્તાન આ મામલો ઉઠાવે કૈસરે પાકિસ્તાનના વિદેશ મંત્રાલય અને વિદેશ મંત્રીને આ મામલો UAE અધિકારીઓ સમક્ષ ઉઠાવવાની માંગ કરી. તેમણે કહ્યું કે પાકિસ્તાન અને UAE વચ્ચે ગાઢ સંબંધો છે અને આવી ઘટનાઓથી બંને દેશોના સંબંધો પર અસર થવી ન જોઈએ. તેમણે UAEને પાકિસ્તાનનો ‘ઇસ્લામિક ભાઈ દેશ’ ગણાવતા કહ્યું કે UAEના વિકાસમાં પાકિસ્તાનીઓનું પણ યોગદાન રહ્યું છે. કૈસરે એવો પણ દાવો કર્યો હતો કે એક પ્રતિનિધિમંડળે તેમને મળીને UAEમાં આવા જ વર્તનની ફરિયાદ કરી હતી. જોકે, તેમણે પોતાના દાવાના સમર્થનમાં હોટલનું નામ, મુસાફરોની સંખ્યા કે કોઈ દસ્તાવેજ જાહેર કર્યો નથી. PAK સંસદમાં કૈસરનું પૂરું સાંભળો… UAEમાં ફ્લાઇટ રદ થવા પર શું નિયમો છે? UAEના જનરલ સિવિલ એવિએશન ઓથોરિટી (GCAA) ના પેસેન્જર વેલફેર પ્રોગ્રામ હેઠળ, ફ્લાઇટ રદ થવા અથવા લાંબા સમય સુધી વિલંબ થવા પર એરલાઇનને મુસાફરોની જરૂરિયાત મુજબ સહાય પૂરી પાડવી પડે છે. જો મુસાફરોને 8 કલાકથી વધુ રાહ જોવી પડે, તો નિયમો હેઠળ હોટેલ, ભોજન-પાણી, સંચાર અને એરપોર્ટથી હોટેલ સુધી આવવા-જવાની સુવિધાની જોગવાઈ છે. કનેક્ટિંગ ફ્લાઇટ છૂટી જવા અને આગામી સંભવિત ફ્લાઇટ 8 કલાકથી વધુ સમય પછી હોવા છતાં પણ હોટેલની વ્યવસ્થા કરી શકાય છે. પાસપોર્ટના આધારે અલગ સુવિધાનો નિયમ નથી GCAA ના નિયમોમાં હોટેલ અને અન્ય મુસાફર સુવિધાઓને ફ્લાઇટના વિલંબ, રદ્દીકરણ અને કનેક્શનની સ્થિતિ સાથે જોડવામાં આવી છે. ભારતીય, અમેરિકન કે પાકિસ્તાની પાસપોર્ટના આધારે અલગ-અલગ હોટેલ સુવિધા આપવાનો કોઈ સામાન્ય નિયમ નથી. એટલે જો વર્તમાન કિસ્સામાં પાસપોર્ટના આધારે મુસાફરોને અલગ સુવિધા આપવામાં આવી, તો તે સામાન્ય મુસાફર-સહાયતા નિયમોથી અલગ કિસ્સો હશે. જોકે, હાલમાં મળતી માહિતીના આધારે આ સ્વતંત્ર રીતે પુષ્ટિ કરી શકાતી નથી કે હોટેલે ખરેખર પાસપોર્ટના આધારે જ મુસાફરોને રૂમ આપ્યા હતા.