જ્યારે કોઈ પ્રોજેક્ટ સાથે રાજકુમાર હિરાણીનું નામ જોડાય છે, ત્યારે અપેક્ષાઓ વધવી સ્વાભાવિક છે. અરશદ વારસી, વિક્રાંત મેસી, બોમન ઈરાની અને મોના સિંહ જેવા કલાકારો હોય, ત્યારે શ્રેષ્ઠ ક્રાઈમ-કોમેડીની આશા વધુ મજબૂત બને છે. OTT પ્લેટફોર્મ જિયોહોટસ્ટાર પર રિલીઝ થયેલી ‘પ્રીતમ એન્ડ પેડ્રો’ સાયબર ક્રાઈમ જેવા સમકાલીન વિષયને કોમેડી, થ્રિલ અને ઈમોશન સાથે રજૂ કરવાનો પ્રયાસ કરે છે. કોન્સેપ્ટ રસપ્રદ અને સ્ટારકાસ્ટ દમદાર છે, પરંતુ નબળા સ્ક્રીનપ્લે અને ધીમી ગતિને કારણે સિરીઝ તેની સંપૂર્ણ ક્ષમતા સુધી પહોંચી શકતી નથી. 6 એપિસોડની આ સિરીઝને દિવ્ય ભાસ્કરે 5 માંથી 2.5 સ્ટાર આપ્યા છે.

‘પ્રીતમ એન્ડ પેડ્રો’ જિયોહોટસ્ટાર પર સ્ટ્રીમ થઈ રહી છે.

સિરીઝની વાર્તા કેવી છે?

‘પ્રીતમ એન્ડ પેડ્રો’ની વાર્તા ગોવામાં સેટ છે. પેડ્રો ગોન્સાલ્વિસ (અરશદ વારસી) જૂના વિચારો ધરાવતો અનુભવી પોલીસ અધિકારી છે, જે ગુનેગારોને પકડવામાં માહેર છે, પરંતુ ટેકનોલોજી અને સાયબર દુનિયા સાથે તેની ખાસ મિત્રતા નથી. એક ઘટના પછી તેની બદલી સાયબર સેલમાં થાય છે, જ્યાં તેની મુલાકાત યુવા અને ટેક-સેવી અધિકારી પ્રીતમ પાર્કર (વીર હિરાણી) સાથે થાય છે.

બંનેની કાર્યશૈલી બિલકુલ અલગ છે. પેડ્રો અનુભવ અને જમીની તપાસ પર વિશ્વાસ કરે છે, જ્યારે પ્રીતમ ડેટા, હેકિંગ અને ડિજિટલ ટેકનોલોજી દ્વારા ગુનાઓ ઉકેલે છે. આ દરમિયાન તેમને મંત્રીના દીકરાના અપહરણ અને એક હાઈ-પ્રોફાઈલ સાયબર ક્રાઈમની ગુત્થી ઉકેલવાની જવાબદારી મળે છે. તપાસની સાથે ઓનલાઈન ફ્રોડ, હેકિંગ અને ડિજિટલ સ્કેમની પરતો ખુલે છે, ત્યાં જ બંને પાત્રોના અંગત જીવન અને ભાવનાત્મક સંઘર્ષને પણ વાર્તામાં જોડવામાં આવ્યું છે.

સ્ટારકાસ્ટની એક્ટિંગ કેવી છે?

અરશદ વારસી આખી સિરીઝની સૌથી મોટી તાકાત છે. તેનો સહજ અભિનય, શાનદાર કોમિક ટાઈમિંગ અને સ્ક્રીન પ્રેઝન્સ ઘણા નબળા દ્રશ્યોને પણ સંભાળી લે છે.

રાજકુમાર હિરાણીનો દીકરો વીર હિરાણી આ સિરીઝથી લીડ એક્ટર તરીકે ડેબ્યૂ કરી રહ્યો છે. તેણે પ્રામાણિકતાથી પાત્ર ભજવ્યું છે. ઘણા દ્રશ્યોમાં તેનો આત્મવિશ્વાસ દેખાય છે, પરંતુ ભાવનાત્મક ભાગોમાં અનુભવનો અભાવ અનુભવાય છે. શરૂઆતની દ્રષ્ટિએ તેનું પ્રદર્શન સંતોષજનક છે.

વિક્રાંત મેસી મર્યાદિત સ્ક્રીન ટાઈમમાં પણ પ્રભાવ છોડે છે. મોના સિંહ, બોમન ઈરાની, સત્યદીપ મિશ્રા અને શ્રુતિ મરાઠે તેમના પાત્રો સાથે ન્યાય કરે છે, પરંતુ સ્ક્રિપ્ટ તેમને વધુ તકો આપતી નથી.

રાજકુમાર હિરાણીના દીકરા વીર હિરાણીએ ‘પ્રીતમ એન્ડ પેડ્રો’થી એક્ટિંગ ડેબ્યૂ કર્યું છે.

ડિરેક્શન અને ટેકનિકલ પાસું કેવું છે?

ડિરેક્ટર અવિનાશ અરુણે આ પહેલા ‘થ્રી ઓફ અસ’ અને ‘પાતાલ લોક’ જેવી ઉત્તમ કૃતિઓ આપી છે. આવી સ્થિતિમાં તેમની પાસેથી અપેક્ષાઓ વધુ હતી, પરંતુ આ વખતે તેઓ વાર્તાની પકડ જાળવી રાખવામાં સંપૂર્ણપણે સફળ થઈ શક્યા નથી.

ડિરેક્શનમાં રાજકુમાર હિરાણીની ફિલ્મો જેવો હળવો હ્યુમર અને માનવીય સ્પર્શ ચોક્કસ જોવા મળે છે. જોકે, સૌથી મોટી નબળાઈ તેની રાઈટિંગ અને સ્ક્રીનપ્લે છે. રાજકુમાર હિરાણી, અભિજાત જોશી, સુયશ ત્રિવેદી અને અમિત દુબે દ્વારા લખાયેલી વાર્તાનો વિષય સુસંગત છે, પરંતુ ઘણા એપિસોડ બિનજરૂરી રીતે લાંબા લાગે છે. થ્રિલ સતત બનતું નથી અને ભાવનાત્મક દ્રશ્યો પણ અપેક્ષિત અસર છોડતા નથી. અંત સુધી સિરીઝ મનોરંજક તો રહે છે, પરંતુ યાદગાર બનતી નથી.

તકનીકી રીતે સિરીઝ મજબૂત છે. ગોવાના લોકેશન્સ, સિનેમેટોગ્રાફી, કેમેરા વર્ક અને પ્રોડક્શન વેલ્યુ પ્રભાવિત કરે છે. સાયબર ક્રાઈમ સાથે સંકળાયેલા વિઝ્યુઅલ્સ પણ વિશ્વસનીય લાગે છે, પરંતુ મજબૂત તકનીકી પાસું નબળા લેખનની ભરપાઈ કરી શકતું નથી.

અરશદ વારસીનો દમદાર અભિનય પણ ‘પ્રીતમ એન્ડ પેડ્રો’ની નબળી સ્ક્રીનપ્લેને બચાવી શકતો નથી.

સંગીત કેવું છે?

રાજકુમાર હિરાણીના પ્રોજેક્ટ્સમાં સંગીત હંમેશા એક મહત્વપૂર્ણ ભૂમિકા ભજવતું રહ્યું છે. ‘પ્રીતમ એન્ડ પેડ્રો’માં પણ કેટલાક ગીતો સામેલ કરવામાં આવ્યા છે. શાંતનુ મોઇત્રાનું સંગીત અને સ્વનાંદ કિરકિરેના ગીતો વાર્તા સાથે સુમેળ સાધે છે. શ્રેયા ઘોષાલના અવાજમાં રેટ્રો શૈલીનું ગીત સાંભળવામાં સારું લાગે છે, પરંતુ કોઈ પણ ગીત લાંબા સમય સુધી યાદ રહેતું નથી.

બેકગ્રાઉન્ડ સ્કોર ઘણી જગ્યાએ સસ્પેન્સ ઊભું કરે છે, પરંતુ વાર્તાની ધીમી ગતિ અને નબળા થ્રિલને કારણે તેની અસર મર્યાદિત રહી જાય છે.

અંતિમ નિર્ણય: જોવું કે નહીં?

જો તમે અરશદ વારસીના ચાહક છો અથવા સાયબર ક્રાઈમ પર હળવા-ફૂલકા અંદાજની સિરીઝ જોવા માંગો છો, તો ‘પ્રીતમ એન્ડ પેડ્રો’ એકવાર જોઈ શકો છો. પરંતુ જો તમે રાજકુમાર હિરાણીના નામથી તેમની ફિલ્મો જેવું દમદાર લેખન, ગહન ભાવનાઓ અને યાદગાર મનોરંજનની અપેક્ષા રાખશો, તો આ સિરીઝ નિરાશ કરી શકે છે.

દિવ્ય ભાસ્કરને Google પર મનપસંદ સોર્સ બનાવો