સેન્ટ્રલ બોર્ડ ઓફ ફિલ્મ સર્ટિફિકેશન (CBFC)એ બોલિવૂડ સ્ટાર સલમાન ખાનની ફિલ્મ ‘માતૃભૂમિઃ મે વોર રેસ્ટ ઇન પીસ’નું ક્લિયરન્સ સર્ટિફિકેટ આગામી આદેશ સુધી રોકી દીધું છે. આ ફિલ્મ વર્ષ 2020માં ભારત અને ચીનના સૈનિકો વચ્ચે ગલવાન ઘાટીમાં થયેલી સૈન્ય અથડામણ પર આધારિત છે.

પહેલા આ ફિલ્મનું નામ ‘બેટલ ઓફ ગલવાન’ રાખવામાં આવ્યું હતું. ફિલ્મને પહેલા 17 એપ્રિલે ઈદના અવસરે રિલીઝ કરવાની હતી, પરંતુ બાદમાં તેની રિલીઝ ડેટ વધારીને ઓગસ્ટ નક્કી કરવામાં આવી હતી. સેન્સર બોર્ડના આ નિર્ણય બાદ હવે ફિલ્મની ઓગસ્ટ રિલીઝ પણ ટળવાની આશંકા છે.

‘માતૃભૂમિઃ મે વોર રેસ્ટ ઇન પીસ’નું નામ અગાઉ ‘બેટલ ઓફ ગલવાન’ હતું.

સેન્સર બોર્ડે આગામી આદેશ સુધી સર્ટિફિકેટ રોક્યું NDTVના રિપોર્ટ અનુસાર, સેન્સર બોર્ડે ફિલ્મ ‘માતૃભૂમિ’ને સર્ટિફિકેટ આપવા પર હાલ પૂરતી રોક લગાવી દીધી છે. ફિલ્મના મેકર્સને આશા હતી કે, તેને સ્વતંત્રતા દિવસના વીકએન્ડ પર ઓગસ્ટમાં રિલીઝ કરવામાં આવશે, પરંતુ નવું સર્ટિફિકેટ ન મળવાને કારણે હવે આવું થવું મુશ્કેલ લાગી રહ્યું છે.

આ ફિલ્મનું નિર્માણ સલમાન ખાન ફિલ્મ્સના બેનર હેઠળ સલમા ખાને કર્યું છે અને તેના ડિરેક્ટર અપૂર્વ લાખિયા છે. ફિલ્મમાં સલમાન ખાન સાથે એક્ટ્રેસ ચિત્રાંગદા સિંહ, અભિલાષ ચૌધરી અને અંકુર ભાટિયા મુખ્ય ભૂમિકાઓમાં છે. ફિલ્મનું સંગીત હિમેશ રેશમિયાએ તૈયાર કર્યું છે.

ફિલ્મમાં સલમાન કમાન્ડિંગ ઓફિસર કર્નલ સંતોષ બાબુનો રોલ ભજવી રહ્યો છે.

ચીની સોશિયલ મીડિયા પર વિરોધ બાદ નામ બદલવામાં આવ્યું હતું આ ફિલ્મને લઈને રિલીઝ પહેલા જ વિવાદ શરૂ થઈ ગયો હતો. ગયા વર્ષે ડિસેમ્બરમાં જ્યારે ફિલ્મનું ટીઝર સામે આવ્યું હતું, ત્યારે ચીનના સોશિયલ મીડિયા પ્લેટફોર્મ વીબો (Weibo) પર તેને લઈને ઘણો વિરોધ જોવા મળ્યો હતો. ચીની યુઝર્સે મેકર્સ પર ગલવાન ઘાટીની ઘટનાને ખોટી રીતે દર્શાવવાનો આરોપ લગાવ્યો હતો.

આ વિવાદ બાદ મેકર્સે ફિલ્મનું નામ ‘બેટલ ઓફ ગલવાન’ થી બદલીને ‘માતૃભૂમિ’ કરી દીધું હતું. નામ બદલવાની સાથે જ ફિલ્મની સ્ક્રિપ્ટ અને દ્રશ્યોમાં પણ કેટલાક ફેરફારો કરવામાં આવ્યા હતા.

ફિલ્મ પર વિદેશ મંત્રાલયે સ્પષ્ટતા કરી હતી આ જ વર્ષે જાન્યુઆરીમાં ભારતના વિદેશ મંત્રાલય (MEA) ને પણ આ ફિલ્મ વિશે પ્રશ્ન પૂછવામાં આવ્યો હતો. ત્યારે એવા સમાચાર આવ્યા હતા કે, વિદેશ મંત્રાલયે ભારત અને ચીનના સૈનિકો વચ્ચે છ વર્ષ પહેલા થયેલી અથડામણ પર બની રહેલી આ ફિલ્મ સામે વાંધો ઉઠાવ્યો છે. આ અંગે સ્પષ્ટતા કરતા વિદેશ મંત્રાલયના પ્રવક્તા રણધીર જયસ્વાલે કહ્યું હતું કે, ‘ભારતમાં ફિલ્મ નિર્માણ સંબંધિત બાબતો સંબંધિત ઓથોરિટી જ જુએ છે. આવા કિસ્સાઓમાં વિદેશ મંત્રાલયની કોઈ ભૂમિકા હોતી નથી.’ તેમણે સ્પષ્ટ કર્યું હતું કે, મંત્રાલય દ્વારા ફિલ્મ પર કોઈ રોક લગાવવામાં આવી નથી.

કર્નલ સંતોષ બાબુની ભૂમિકામાં દેખાશે સલમાન ખાન ફિલ્મ ‘માતૃભૂમિ’નું ટીઝર 27 ડિસેમ્બર 2025ના રોજ સલમાન ખાનના 60મા જન્મદિવસ પર રિલીઝ કરવામાં આવ્યું હતું. આ ફિલ્મમાં સલમાન ખાન 16 બિહાર રેજિમેન્ટના કમાન્ડિંગ ઓફિસર કર્નલ સંતોષ બાબુનું પાત્ર ભજવી રહ્યો છે. કર્નલ સંતોષ બાબુએ જ ગલવાન ઘાટીમાં ચીની સૈનિકો સાથે થયેલી અથડામણ દરમિયાન ભારતીય ટુકડીનું નેતૃત્વ કર્યું હતું. આ અથડામણમાં તેઓ શહીદ થયા હતા.

દિવ્ય ભાસ્કરને Google પર મનપસંદ સોર્સ બનાવો