આજના ડિજિટલ યુગમાં વોટ્સએપ (WhatsApp) આપણા જીવનનું અભિન્ન અંગ બની ગયું છે, પરંતુ તેની લોકપ્રિયતાની સાથે સુરક્ષાના જોખમો પણ વધ્યા છે. ખાસ કરીને અજાણ્યા નંબરો પરથી આવતા કોલ્સ લોકો માટે મોટી મુસીબત બની રહ્યા છે. ઘણા કિસ્સાઓમાં આ કોલ્સ સ્પામ અથવા સાયબર કૌભાંડ (Scam) ના ભાગરૂપે હોય છે. આવા ફ્રોડ કોલ્સથી બચવા અને તમારી પ્રાઈવસી જાળવવા માટે વોટ્સએપે એક ખૂબ જ અસરકારક ફીચર આપ્યું છે: ‘Silence Unknown Callers’

અજાણ્યા નંબરો કોલ્સને કરે છે સાયલન્ટ

આ ફીચરની સૌથી મોટી ખાસિયત એ છે કે તે તમારા ફોનમાં આવતા અજાણ્યા નંબરો પરથી આવતા કોલ્સને આપમેળે સાયલન્ટ કરી દે છે. આનાથી તમારા ફોનની રીંગ વાગતી નથી અને તમને વારંવાર આવતી પરેશાનીમાંથી મુક્તિ મળે છે. જો કોઈ મહત્વનો વ્યક્તિ તમને કોલ કરે અને તેનો નંબર તમારી કોન્ટેક્ટ લિસ્ટમાં નથી, તો પણ તમને કોલની માહિતી ‘કોલ્સ’ ટેબમાં જોવા મળી જશે. આમ, તમારો કોઈ જરૂરી કોલ ચૂકી જવાનો ડર પણ રહેતો નથી અને તમે સુરક્ષિત પણ રહો છો.

આ સુવિધા કેવી રીતે ચાલુ કરવી?

તમે એન્ડ્રોઈડ (Android) અથવા આઈફોન (iOS) ગમે તે ફોન વાપરતા હોવ, આ ફીચર એક્ટિવેટ કરવું ખૂબ જ સરળ છે:

1. સૌ પ્રથમ તમારા ફોનમાં વોટ્સએપ એપ ઓપન કરો.

2. ઉપરના જમણા ખૂણે આવેલા ત્રણ ટપકાં (થ્રી-ડોટ મેનૂ) પર ક્લિક કરો.

3. ત્યારબાદ ‘સેટિંગ્સ’ (Settings) મેનૂમાં જાઓ.

4. અહીં ‘ગોપનીયતા’ (Privacy) વિભાગમાં જઈને થોડા નીચે સ્ક્રોલ કરો.

5. તમને ત્યાં ‘કોલ્સ’ (Calls) નો વિકલ્પ દેખાશે.

6. ‘સાયલન્સ અનનોન કોલર્સ’ (Silence Unknown Callers) વિકલ્પ પર ક્લિક કરીને તેને એક્ટિવેટ (On) કરી દો.

આ સુવિધા ચાલુ કર્યા પછી તે પૃષ્ઠભૂમિમાં સક્રિય રહેશે અને તમને સ્કેમર્સથી સુરક્ષિત રાખશે. સાયબર ગુનેગારો ઘણીવાર અજાણ્યા નંબરો પરથી કોલ કરીને લોકોને જાળમાં ફસાવવાનો પ્રયાસ કરે છે, અને ઘણીવાર તમે કોલનો જવાબ આપો ત્યારે જ તેમની છેતરપિંડીની યોજના શરૂ થાય છે. આ ફીચરની મદદથી તમે કોલને સાયલન્ટ રાખીને આવા જોખમોથી બચી શકો છો. આ એક નાનું પણ અત્યંત ઉપયોગી પગલું છે જે તમારી ડિજિટલ સુરક્ષામાં મોટો વધારો કરે છે. તમારા પોતાના અને તમારા પરિવારના ફોનમાં આ સેટિંગ આજે જ ચેક કરી લો અને સુરક્ષિત રહો.

આ પણ વાંચોઃ America માં ભારતીય વિદ્યાર્થીઓના અભ્યાસ પર જોખમ? નવા વિઝા નિયમોથી ચિંતા વધી