અંડર-19 વર્લ્ડ કપના સુપર સિક્સ સ્ટેજમાં આજે ભારત અને ઝિમ્બાબ્વેની ટીમો આમને-સામને થશે. મેચ બપોરે 1 વાગ્યાથી બુલાવાયોના ક્વીન્સ સ્પોર્ટ્સ ક્લબમાં રમાશે. બંને ટીમો સુપર સિક્સના ગ્રુપ-2માં સામેલ છે અને આ સ્ટેજની આ છઠ્ઠી મેચ હશે.

ભારતીય ટીમ જ્યાં ગ્રુપ સ્ટેજમાં શાનદાર પ્રદર્શન કરતા અમેરિકા, બાંગ્લાદેશ અને ન્યુઝીલેન્ડને હરાવીને અજેય રહી, ત્યાં ઝિમ્બાબ્વેનો પ્રવાસ ઉતાર-ચઢાવ ભરેલો રહ્યો. તેને પાકિસ્તાન અને ઇંગ્લેન્ડ સામે હારનો સામનો કરવો પડ્યો, જ્યારે સ્કોટલેન્ડ સામેની તેની પ્રથમ મેચ વરસાદને કારણે રદ થઈ ગઈ.

આ મેચમાં 14 વર્ષનો વૈભવ સૂર્યવંશી ભારતીય કેપ્ટન શુભમન ગિલનો રેકોર્ડ તોડી શકે છે. વૈભવના યુથ વનડે કરિયરમાં અત્યાર સુધી 1087 રન છે અને તેની પાસે ભારતીય કેપ્ટન શુભમન ગિલના 1149 રનના રેકોર્ડને તોડવાની તક છે. જો વૈભવ આ મુકાબલામાં 62 રન બનાવી લે છે, તો તે ગિલને પાછળ છોડી દેશે.

વૈભવ સૂર્યવંશી યુથ વનડેમાં 3 સદી ફટકારી ચૂક્યા છે.

ઝિમ્બાબ્વે સામે ભારત અત્યાર સુધી હાર્યું નથી

યુથ વનડે ક્રિકેટમાં ટીમ ઈન્ડિયા આજ સુધી ઝિમ્બાબ્વે સામે એક પણ મેચ હારી નથી. બંને ટીમો વચ્ચે અત્યાર સુધી કુલ 6 મેચ રમાઈ છે અને તમામ 6 મેચ ભારતે જીતી છે. ઝિમ્બાબ્વેને હજુ પણ તેની પ્રથમ જીતની રાહ છે, જ્યારે ભારત આ રેકોર્ડને વધુ મજબૂત કરવાના ઈરાદા સાથે મેદાનમાં ઉતરશે.

હેનિલના નામે 9 વિકેટ

આ અંડર-19 વર્લ્ડ કપમાં ભારતના ઓપનરોનું પ્રદર્શન અત્યાર સુધી શાનદાર રહ્યું છે. છેલ્લા મુકાબલામાં લાંબા સમયથી આઉટ ઓફ ફોર્મ ચાલી રહેલા કેપ્ટન આયુષ મ્હાત્રેએ જોરદાર વાપસી કરતા માત્ર 27 બોલમાં 53 રનની ઝડપી ઇનિંગ રમી હતી. તેમની સાથે વૈભવ સૂર્યવંશીએ પણ 23 બોલમાં 40 રન બનાવ્યા હતા.

મિડલ ઓર્ડરમાં અભિજ્ઞાન કુંડુએ ટુર્નામેન્ટ દરમિયાન ભારતીય બેટિંગને મજબૂતી આપી છે. તેણે અત્યાર સુધી 3 મેચમાં 122 રન બનાવ્યા છે. તેનો સ્ટ્રાઈક રેટ 79.73 રહ્યો છે અને તે એક અડધી સદી પણ ફટકારી ચૂક્યો છે.

બોલિંગમાં હેનિલ પટેલ સૌથી સફળ બોલર રહ્યો છે. તેણે 9 વિકેટ ઝડપી છે, જેમાં 5/16નો શ્રેષ્ઠ પ્રદર્શન સામેલ છે. 2.97ની ઇકોનોમી સાથે તેમણે રન ગતિ પર પણ શાનદાર નિયંત્રણ રાખ્યું છે. જ્યારે ન્યુઝીલેન્ડ સામેની મેચમાં આરએસ અંબરીશને પ્લેયર ઓફ ધ મેચ તરીકે પસંદ કરવામાં આવ્યા હતા, જ્યાં તેણે 29 રન આપીને 4 વિકેટ લીધી હતી.

હલાબંગાનાના 59 રન

આ વર્લ્ડ કપમાં ઝિમ્બાબ્વેની ટીમ માટે અત્યાર સુધી ત્રણ મેચમાં કોઈ ખાસ પ્રદર્શન જોવા મળ્યું નથી. બેટિંગમાં નેથેનિયલ તડિવાનાશે હલાબંગાના ટીમનો સૌથી ભરોસાપાત્ર બેટર રહ્યો છે. તેણે 2 મેચમાં 59 રન બનાવ્યા છે. તેનો સ્ટ્રાઈક રેટ 67.04 રહ્યો છે અને ટુર્નામેન્ટમાં તેણે એક અડધી સદી પણ ફટકારી છે.

બોલિંગ વિભાગમાં શેલ્ટન હાર્બડજાન માઝવિટોરેરાએ ઝિમ્બાબ્વેનું નેતૃત્વ કર્યું છે. તેણે 2 મેચમાં 2 વિકેટ લીધી છે. તેનું શ્રેષ્ઠ પ્રદર્શન 2/54 રહ્યું છે, જોકે તેણે 8.62ની ઇકોનોમીથી રન ખર્ચ કર્યા છે.

પિચ રિપોર્ટ

બુલાવાયોની પિચ સવારના સમયે થોડી ધીમી રહે છે. નવી બોલ અહીં જલ્દી બેટ પર આવતી નથી, તેથી ઓપનર્સ માટે શરૂઆતની 25-30 બોલ ખૂબ જ મહત્વપૂર્ણ બની જાય છે. જો આ સમયગાળામાં બેટર સંભાળીને રમે, તો જેમ જેમ પિચ ખુલે છે, આગળની ઇનિંગ્સ રમવી ઘણી સરળ બની જાય છે.

અંડર-19 વર્લ્ડ કપમાં અત્યાર સુધી અહીં રમાયેલી મેચોનો ટ્રેન્ડ પણ આ જ દિશામાં ઇશારો કરે છે. ટોસ જીતનારી મોટાભાગની ટીમો પહેલા બોલિંગ કરવાનું પસંદ કરી રહી છે, જેથી શરૂઆતની ઓવરોમાં પિચની મદદનો ફાયદો ઉઠાવી શકાય અને પછી ટાર્ગેટ ચેઝ કરતી વખતે પરિસ્થિતિઓ તેમના પક્ષમાં રહે.

વેધર રિપોર્ટ

બુલાવાયોમાં મંગળવારે હવામાન ક્રિકેટ માટે અનુકૂળ રહેશે. દિવસભર આકાશ સ્વચ્છ રહી શકે છે. મહત્તમ તાપમાન લગભગ 28 ડિગ્રી સેલ્સિયસ રહેવાનો અંદાજ છે, જ્યારે લઘુત્તમ તાપમાન 18 ડિગ્રી સુધી જઈ શકે છે.

હવામાન વિભાગ અનુસાર વરસાદની સંભાવના માત્ર 10 ટકા છે. ભેજનું સ્તર લગભગ 49 ટકા રહી શકે છે, જ્યારે પવન લગભગ 13 કિલોમીટર પ્રતિ કલાકની ઝડપે ફૂંકાશે.

બંને ટીમોનો સ્ક્વોડ-

ભારત- આયુષ મ્હાત્રે (કેપ્ટન), વૈભવ સૂર્યવંશી, અભિજ્ઞાન કુંડુ (વિકેટકીપર), આરોન જ્યોર્જ, વેદાંત ત્રિવેદી, વિહાન મલ્હોત્રા, કનિષ્ક ચૌહાણ, આરએસ અમ્બ્રિશ, ખિલન પટેલ, હેનિલ પટેલ, દીપેશ દેવેન્દ્રન, હરવંશ પાંગલિયા, ઉધવ મોહન, કિશન કુમાર સિંહ અને મોહમ્મદ ઇનાન.

ઝિમ્બાબ્વે- સિમ્બારાશે મુડજેંગરેરે (કેપ્ટન), ​​​​​​કુપાક્વાશે મુરાદજી (વિકેટકીપર), નૈથનિયલ હલાબંગાના, કિયાન બ્લિગનોટ, ધ્રુવ પટેલ, લીરોય ચિવાઉલા, બ્રેન્ડન સેંજરે, માઇકલ બ્લિગનોટ, ટાટેન્ડા ચિમુગોરો, પનાશે માજાઈ, શેલ્ટન માજવિટોરેરા, તકુદ્જવા માકોની, , બ્રેન્ડન ન્ડિવેની, વેબ્સ્ટર માધિધી અને બેની જુજે.