પૂર્વ ક્રિકેટર વીવીએસ લક્ષ્મણે ખેલાડીઓના ધીમેથી ફિટ થવામાં સેન્ટર ઑફ એક્સેલન્સ (CoE)ને દોષી માનવાનો ઇનકાર કર્યો છે. તેમણે કહ્યું કે ‘ક્રિકેટર મશીન નથી. એવું નથી કે દર વખતે તેઓ ઝડપથી ઈજામાંથી સાજા થઈ જશે.’

લક્ષ્મણ BCCIના સેન્ટર ઑફ એક્સેલન્સના પ્રમુખ છે. તેમણે રવિવારે મીડિયા સાથેની વાતચીતમાં કહ્યું કે CoE અને મેન્સ-વુમન્સ બંને ટીમના મેનેજમેન્ટ વચ્ચે ઉત્તમ તાલમેલ છે. લક્ષ્મણનું નિવેદન એવા સમયે આવ્યું છે, જ્યારે દેશભરમાં ખેલાડીઓના ઈજાગ્રસ્ત થવા પર સવાલો ઉઠી રહ્યા છે.

લક્ષ્મણે કહ્યું- CoE માત્ર રિહેબ સેન્ટર નથી

લક્ષ્મણે કહ્યું- ‘CoE માત્ર રિહેબ સેન્ટર નથી. ક્રિકેટરોને વધુ સારા બનાવવામાં તેની મોટી ભૂમિકા છે. તેથી ઈજા માટે દોષ શબ્દનો ઉપયોગ કરવા માંગતા નથી, કારણ કે તેનાથી કોઈને બલિનો બકરો બનાવવામાં આવે છે.’

લક્ષ્મણે કહ્યું કે ફિટનેસના નિયમો કડક છે. સાથે જ બધા ખેલાડીઓના શરીરનો સ્વભાવ પણ અલગ હોય છે. આ કારણે કોઈ ખેલાડી નિર્ધારિત સમયમર્યાદામાં સંપૂર્ણપણે ફિટ થઈ શકતો નથી.

તેમણે જણાવ્યું કે ઈજાની જાણ થવાથી લઈને ખેલાડીના ફિટ થઈને જવા સુધી તેની મોનિટરિંગ થાય છે. આના આધારે તેનો વર્કલોડ વધારવામાં આવે છે.

BCCIનું સેન્ટર ઑફ એક્સેલન્સ સેન્ટર બેંગલુરુમાં છે.

લક્ષ્મણે ખેલાડીના ઈજાથી ફિટ થવા સુધીની પ્રક્રિયા સમજાવી

લક્ષ્મણે પોતાની વાત સમજાવવા માટે જસપ્રીત બુમરાહ અને સાઈ સુદર્શનનું ઉદાહરણ આપ્યું. તેમણે કહ્યું કે સિલેક્ટર્સ CoE પાસેથી ખેલાડીની ફિટનેસનો રિપોર્ટ માગે છે. CoE આ રિપોર્ટ સિલેક્શન કમિટીના પ્રેસિડેન્ટને મોકલે છે. તેની કોપી બંને ટીમના હેડ કોચ અને BCCIને પણ આપવામાં આવે છે.

લક્ષ્મણે કહ્યું- ‘બુમરાહ અને સુદર્શનના નામની આગળ હંમેશા એક સ્ટાર ચિહ્ન લાગેલો હોય છે. તેનો અર્થ છે- ફિટ રહેશે તો રમશે. જો ખેલાડીની પ્રગતિ ધીમી હોય, તો સિલેક્શન કમિટી પ્રેસિડેન્ટ અને હેડ કોચને જાણ કરવામાં આવે છે.

લક્ષ્મણે કહ્યું- ઈજા ચિંતાનું કારણ નથી

લક્ષ્મણે મોટી સંખ્યામાં ખેલાડીઓના સતત ઈજાગ્રસ્ત થવા પર કહ્યું- ‘મને નથી લાગતું કે આ ચિંતાનું કારણ છે. જ્યારે કોઈ ખેલાડી ઉચ્ચ સ્તરે રમે છે, ત્યારે તેની પાસેથી 100% થી વધુ આપવાની અપેક્ષા રાખવામાં આવે છે.’ તેમણે કહ્યું- ખેલાડીઓની ઈજાને જોવાનો બાહ્ય દુનિયાનો દૃષ્ટિકોણ બદલવો જોઈએ. CoE ના ફિટનેસ સ્ટાફ એડ્રિયન, નિક અને કમલેશ કામ કરી રહ્યા છે.

સિરીઝના 3-4 અઠવાડિયા પહેલા સિલેક્શન મિટિંગ થાય છે

BCCI સેક્રેટરી દેવજીત સૈકિયાએ સિરીઝ પહેલા ટીમની પસંદગી પ્રક્રિયા સમજાવી. તેમણે કહ્યું કે ટીમ રવાના થાય તેના ઓછામાં ઓછા 3થી 4 અઠવાડિયા પહેલા મીટિંગ થાય છે. તેથી તે સમયે ખેલાડીની સાચી સ્થિતિ જાણી શકાતી નથી. આ જ કારણ છે કે તેના નામની આગળ સ્ટાર લગાવવામાં આવે છે અને તેને સ્ક્વોડમાં રાખવામાં આવે છે.

દિવ્ય ભાસ્કરને Google પર મનપસંદ સોર્સ બનાવો