વિશ્વના સૌથી લોકપ્રિય ઇન્સ્ટન્ટ મેસેજિંગ પ્લેટફોર્મ WhatsApp ની વેબ સેવાઓમાં આજે સવારથી મોટી ટેકનિકલ ખામી સર્જાઈ છે. ડેસ્કટોપ અને લેપટોપ પર WhatsApp વાપરતા વપરાશકર્તાઓ સંદેશા મોકલવા, પ્રાપ્ત કરવા અને લોગિન કરવા જેવી મૂળભૂત સુવિધાઓનો ઉપયોગ કરી શકતા નથી.

ઇન્ટરનેટ આઉટેજ પર નજર રાખતી વેબસાઇટ DownDetector ના ડેટા અનુસાર, આજે સવારે 11:48 વાગ્યાની આસપાસ આ સમસ્યા તેની ચરમસીમાએ હતી. આ આઉટેજની અસર અલગ-અલગ રીતે જોવા મળી રહી છે:

65% વપરાશકર્તાઓ વેબસાઇટ (Web Version) ઍક્સેસ કરવામાં અસમર્થ છે.

27% વપરાશકર્તાઓ એપ્લિકેશનમાં સમસ્યા અનુભવી રહ્યા છે.

7% વપરાશકર્તાઓ લોગિન પ્રક્રિયામાં અટવાઈ ગયા છે.

રિપોર્ટ અનુસાર, ખાસ કરીને iPhone યુઝર્સને આ સમસ્યા વધુ નડી રહી છે. જ્યારે તેઓ વેબ સંસ્કરણ માટે QR કોડ સ્કેન કરવાનો પ્રયાસ કરે છે, ત્યારે સ્ક્રીન હેંગ થઈ જાય છે. આ ઉપરાંત, ઘણા વપરાશકર્તાઓએ ફરિયાદ કરી છે કે તેમના જૂના ચેટ સિંક થઈ રહ્યા નથી અને સંદેશા પહોંચાડવામાં ઘણો વિલંબ થઈ રહ્યો છે. ઓફિસમાં કામ કરતા લોકો માટે આ આઉટેજ માથાના દુખાવા સમાન સાબિત થઈ રહ્યો છે.

હજુ સુધી WhatsApp ની પેરેન્ટ કંપની Meta તરફથી આ સમસ્યા અંગે કોઈ સત્તાવાર સ્પષ્ટતા કે નિવેદન બહાર પાડવામાં આવ્યું નથી. આ સમસ્યા વૈશ્વિક સ્તરે છે કે માત્ર ભારતીય પ્રદેશ પૂરતી મર્યાદિત છે, તે વિશે પણ સ્થિતિ હજુ અસ્પષ્ટ છે. વપરાશકર્તાઓ સોશિયલ મીડિયા પર હેશટેગ #WhatsAppDown સાથે પોતાનો રોષ ઠાલવી રહ્યા છે.