ભારતમાં અબજો લોકો સંદેશાવ્યવહાર માટે WhatsAppનો ઉપયોગ કરે છે, પરંતુ આ સરળતા સાથે સાયબર છેતરપિંડીનું જોખમ પણ વધ્યું છે. સ્કેમર્સ હવે નકલી નોકરીઓ, લોભામણી ઓફર્સ, ઇનામો અને બેંક અપડેટ્સના બહાને લોકોને નિશાન બનાવી રહ્યા છે. જો તમે થોડી જાગૃતિ અને સાવચેતી રાખશો, તો તમે તમારી મહેનતની કમાણી અને વ્યક્તિગત ડેટાને સુરક્ષિત રાખી શકો છો.

અજાણ્યા મેસેજ અને લિંક્સથી સાવધ રહો

જો તમને કોઈ અજાણ્યા નંબર પરથી અચાનક કોઈ મોટું ઈનામ કે નોકરીની ઓફર મળે, તો તરત જ સાવધાન થઈ જાવ. સ્કેમર્સ ઘણીવાર અસલી લાગતી નકલી વેબસાઇટ્સની લિંક્સ મોકલીને તમને KYC અપડેટ કરવા અથવા લોગિન કરવાનું કહે છે. આવી શંકાસ્પદ લિંક્સ પર ક્યારેય ક્લિક ન કરો. જો કોઈ મેસેજ તમને ઉતાવળમાં કંઈક કરવા માટે દબાણ કરતું હોય, તો તે ફ્રોડ હોવાની શક્યતા સૌથી વધુ છે. આવા નંબરોનો જવાબ આપવાને બદલે તેને તાત્કાલિક બ્લોક અને રિપોર્ટ કરો.

OTP અને સ્ક્રીન શેરિંગ: ક્યારેય ન ભૂલવી આ વાત

યાદ રાખો, બેંક કે કોઈ પણ સરકારી સંસ્થા ક્યારેય WhatsApp પર OTP માંગતી નથી. જો કોઈ OTP માટે વિનંતી કરે, તો સમજી લેવું કે તે તમને લૂંટવાનો પ્રયાસ કરી રહ્યા છે. આ ઉપરાંત, અજાણી વ્યક્તિના કહેવાથી તમારી મોબાઈલ સ્ક્રીન શેર કરવી એ ખૂબ જોખમી છે. સ્ક્રીન શેર કરવાથી સ્કેમર તમારી બેંકિંગ એપ્લિકેશન અને અન્ય ખાનગી માહિતી સરળતાથી મેળવી શકે છે.

પરિવારના નામે થતી છેતરપિંડી

આજકાલ સ્કેમર્સ પરિવારના સભ્ય બનીને મેસેજ કરે છે અને કટોકટીના બહાને પૈસા માંગે છે. આવા કિસ્સામાં, પૈસા મોકલતા પહેલા જે-તે વ્યક્તિના જૂના અને સાચા નંબર પર કૉલ કરીને સત્યતાની ખાતરી ચોક્કસ કરો.

સુરક્ષા સેટિંગ્સને બનાવો મજબૂત

WhatsAppની ગોપનીયતા સેટિંગ્સનો પૂરો ઉપયોગ કરો. તમારા પ્રોફાઇલ ફોટો અને સ્ટેટસને માત્ર ‘કોન્ટેક્ટ્સ’ માટે જ મર્યાદિત રાખો. અજાણ્યા નંબરો પરથી આવતા કોલ્સને રોકવા માટે ‘સાયલન્સ અનનોન કોલર્સ’ (Silence Unknown Callers) ફીચર ચાલુ કરો. સાથે જ, તમારા એકાઉન્ટને વધુ સુરક્ષિત બનાવવા માટે ‘ટુ-સ્ટેપ વેરિફિકેશન’ (Two-Step Verification) અવશ્ય સેટ કરો.

સાયબર ગુનેગારો તમારી ઉતાવળ અને ગભરાટનો લાભ લે છે. તેથી જ, કોઈપણ સંદેશ પર વિશ્વાસ કરતા પહેલા ઠંડા કલેજે વિચારો. થોડી જાગૃતિ જ તમને અને તમારા પરિવારને મોટી આર્થિક છેતરપિંડીથી બચાવી શકે છે.

આ પણ વાંચોઃ Ujjain: ભારે વરસાદને કારણે ક્ષિપ્રા નદીના પાણી ઘાટ પર ફરી વળ્યા, મંદિરો ડૂબ્યા