ડિફેન્ડિંગ ચેમ્પિયન ઇગા સ્વિયાતેક અને વર્લ્ડ નંબર-2 એલિના રાયબકિનાએ લંડનમાં રમાઈ રહેલી વિમ્બલ્ડન ટેનિસ ચેમ્પિયનશિપના ત્રીજા રાઉન્ડમાં સ્થાન મેળવી લીધું છે. લેડીઝ સિંગલ્સ કેટેગરીમાં પોલેન્ડની સ્ટાર ઇગાએ કેરોલિના પ્લિસકોવાને 69 મિનિટમાં સીધા સેટમાં 6-1, 6-3થી હરાવી. જ્યારે, કઝાકિસ્તાનની રાયબકિનાએ અમેરિકાની કેટી મેકનેલીને માત્ર 71 મિનિટમાં 6-1, 6-2થી હરાવી.

મેન્સ સિંગલ્સ કેટેગરીમાં આર્થર ફેરીએ ફિનલેન્ડના ઓટો વિર્તાનેનને 5-7, 7-6, 6-3, 6-3થી હરાવ્યો. તે રાઉન્ડ-3માં બ્રિટિશના એકમાત્ર ખેલાડી છે. બાકીના ખેલાડીઓ શરૂઆતના રાઉન્ડમાંથી જ બહાર થઈ ગયા છે. આ કેટેગરીની અન્ય મેચમાં બલ્ગેરિયાના ગ્રિગોર દિમિત્રોવે ચેક રિપબ્લિકના જાકુબ મેન્સિકને 4 સેટના કડક મુકાબલામાં હરાવ્યો. હવે તેનો સામનો ઇટાલીના માટ્ટેઓ બેરેટિની સામે થશે.

સ્વિયાતેકે કહ્યું- હું મારા પ્રદર્શનથી ખુશ છું

મેચ પછી સ્વિયાતેકે કહ્યું, ‘આજે હું ઘણી સ્થિરતા અનુભવી રહી હતી. પહેલો રાઉન્ડ ખૂબ ભાવનાત્મક હતો, પરંતુ આજે એવું લાગ્યું કે આ ઑફિસનો કોઈ સામાન્ય દિવસ હોય, જ્યાં મારે સાચા નિર્ણયો લેવાના હતા. હું મારા આ પ્રદર્શન અને ફોકસથી ખૂબ ખુશ છું.’

ઇગા સ્વિયાતેકે ભૂતપૂર્વ ફાઇનલિસ્ટ કેરોલિના પ્લિસકોવાને સીધા સેટમાં 6-1, 6-3 થી હરાવી દીધી.

રાયબકિનાનો મુકાબલો મર્ટન્સ સામે થશે

કઝાકિસ્તાનની 2022 વિમ્બલ્ડન ચેમ્પિયન એલેના રાયબકિનાએ સેન્ટર કોર્ટ પર અમેરિકાની કેટી મેકનેલીને માત્ર 71 મિનિટમાં હરાવી દીધી. તેને પહેલા રાઉન્ડની મેચમાં ફ્રાન્સની લોઈસ બોઈસન સામે 3 સેટ સંઘર્ષ કરવો પડ્યો હતો. પરંતુ તેણે બીજા રાઉન્ડમાં કોઈ ભૂલ કરી નહીં. હવે ત્રીજા રાઉન્ડમાં તેનો સામનો બેલ્જિયમની એલિસ મર્ટન્સ સામે થશે.

રાયબકિનાએ અમેરિકાની કેટી મેકનેલીને માત્ર 71 મિનિટમાં 6-1, 6-2થી હરાવી.

આર્થર ફેરી બ્રિટનની છેલ્લી આશા

23 વર્ષીય આર્થર આ ચેમ્પિયનશિપમાં બ્રિટનની છેલ્લી આશા છે. તેનો જન્મ પેરિસમાં ફ્રેન્ચ માતા-પિતાના ઘરે થયો હતો, પરંતુ જ્યારે તે ખૂબ નાનો હતો, ત્યારે તેનો પરિવાર વિમ્બલ્ડનમાં આવીને વસ્યો હતો.

ફેરીએ બાળપણમાં લગભગ 10 વર્ષની ઉંમર સુધી ફ્રાન્સનું પ્રતિનિધિત્વ કર્યું હતું, પરંતુ તે પછી તે બ્રિટનની ટેનિસ સિસ્ટમ (LTA)માં સામેલ થઈ ગયો. કેલિફોર્નિયાની સ્ટેનફોર્ડ યુનિવર્સિટીમાંથી સાયન્સ અને ટેકનોલોજીનો અભ્યાસ કરનાર ફેરી હવે સંપૂર્ણપણે બ્રિટિશ બની ચૂક્યો છે.

ફેરીએ પોતાની આ સફળતા પર કહ્યું- ‘હું આ જ વિમ્બલ્ડન ટુર્નામેન્ટ જોઈને મોટો થયો છું. બાળપણમાં ખેલાડીઓની નકલ કરતો હતો અને આજે અહીં મેચ જીતી રહ્યો છું, આ અહેસાસ અદ્ભુત છે. હવે હું પોતાને દિલથી સંપૂર્ણપણે બ્રિટિશ અનુભવું છું.’ ફેરીની માતા ઓલિવિયા પોતે ફ્રાન્સની પૂર્વ ફેડ કપ ખેલાડી રહી છે અને પિતા લોઈક ફ્રાન્સના ફૂટબોલ ક્લબ લોરિયન્ટના માલિક છે.

23 વર્ષના આર્થર ફેરીનો જન્મ પેરિસમાં ફ્રેન્ચ માતા-પિતાના ઘરે થયો હતો, પરંતુ જ્યારે તે ખૂબ નાનો હતો, ત્યારે તેનો પરિવાર વિમ્બલ્ડનમાં આવીને વસી ગયો હતો.

ગ્રિગોર દિમિત્રોવે જાકુબ મેન્સિકને હરાવીને આગલા રાઉન્ડમાં સ્થાન મેળવ્યું

35 વર્ષના ગ્રિગોર દિમિત્રોવે 15મી ક્રમાંકિત જાકુબ મેન્સિકને 7-6, 4-6, 7-5, 6-3 થી હરાવીને આગલા રાઉન્ડમાં સ્થાન મેળવી લીધું. મેચ દરમિયાન વરસાદને કારણે કોર્ટની છત બંધ કરવી પડી. આ દરમિયાન દિમિત્રોવને ગયા વર્ષની યાદ આવી ગઈ, જ્યારે તે સેન્ટર કોર્ટ પર જેનિક સિનર સામેની મેચમાં ઈજાગ્રસ્ત થઈને બહાર થઈ ગયો હતો.

જીત બાદ દિમિત્રોવે કહ્યું, ‘મેં ચાર-પાંચ વાર ઉપર છત તરફ જોયું. મને લાગ્યું કે ઇતિહાસ પોતાને પુનરાવર્તિત કરી શકે છે, પરંતુ હવે તે બધું પાછળ છૂટી ગયું છે. વિમ્બલડનમાં મને જે પ્રેમ મળે છે, તે જ તેને મારા માટે ખાસ બનાવે છે.

બ્રિટિશ ડબલ્સ જોડીઓનું નિરાશાજનક પ્રદર્શન

જ્યાં સિંગલ્સમાં આર્થર ફેરીએ બ્રિટનની આશાઓ જીવંત રાખી, ત્યાં ડબલ્સ કોર્ટમાંથી સ્થાનિક ચાહકો માટે નિરાશા હાથ લાગી. કેટી બુલ્ટર અને હીથર વોટસનની જોડીએ બીજા સેટના ટાઈ-બ્રેકરમાં 4 મેચ પોઇન્ટ બચાવ્યા, પરંતુ આખરે તે પોલેન્ડની કતારઝાઈના પીટર અને ચેક રિપબ્લિકની અન્ના સિસ્કોવા સામે 6-4, 6-7, 6-3 થી હારી ગઈ. આ ઉપરાંત, ઓલિવિયા નિકોલ્સ, જોડી બરેજ અને હેરિયટ ડાર્ટ સહિતની તમામ 6 બ્રિટિશ મહિલા ડબલ્સ જોડીઓ પહેલા જ રાઉન્ડમાં હારીને બહાર થઈ ગઈ. જોકે મેન્સ ડબલ્સમાં હેનરી પેટન અને નીલ સ્કુપ્સકી જેવા ટોચના ખેલાડીઓએ બીજા રાઉન્ડમાં સ્થાન બનાવી લીધું છે.

દિવ્ય ભાસ્કરને Google પર મનપસંદ સોર્સ બનાવો