સોફી ડિવાઇનના ઓલરાઉન્ડ પ્રદર્શનને કારણે વુમન્સ પ્રીમિયર લીગમાં ગુજરાત જાયન્ટ્સે પોતાની ત્રીજી મેચ જીતી લીધી. ગુરુવારે વડોદરાના કોટંબી સ્ટેડિયમમાં રમાયેલી મેચમાં યુપી વોરિયર્સે ટૉસ જીતીને પ્રથમ બોલિંગ કરવાનો નિર્ણય કર્યો. પહેલી બેટિંગ કરતા ગુજરાતે 20 ઓવરમાં 8 વિકેટ ગુમાવીને 153 રન બનાવ્યા, જેમાં સોફી ડિવાઇનની અડધી સદીની ઇનિંગ્સ મહત્વની રહી. ટાર્ગેટને ચેઝ કરવા ઉતરેલી યુપી વોરિયર્સની ટીમ 17.3 ઓવરમાં માત્ર 108 રનમાં ઓલઆઉટ થઈ ગઈ. આ જીત સાથે ગુજરાત પોઈન્ટ ટેબલમાં બીજા સ્થાને પહોંચી ગયું છે. ટીમે અત્યાર સુધી 6 મેચમાં 3 જીત અને 3 હાર નોંધાવી છે. જ્યારે યુપીને છઠ્ઠી મેચમાં ચોથી હારનો સામનો કરવો પડ્યો. ગુજરાતની શરૂઆત ખરાબ રહી
ગુજરાતની શરૂઆત સારી રહી ન હતી અને ટીમે 23 રન પર પહેલી વિકેટ ગુમાવી દીધી. ઓપનર ડેની વાયટ હોજ 14 રન બનાવીને આઉટ થઈ. બીજી તરફ બેથ મૂનીએ ઇનિંગ્સને સંભાળતા 34 બોલમાં 5 ચોગ્ગાની મદદથી 38 રન બનાવ્યા. ત્યારબાદ અનુષ્કા શર્મા (14) અને કેપ્ટન એશ્લે ગાર્ડનર (5) ઝડપથી આઉટ થઈ ગયા. ડિવાઇનની ફિફ્ટી
મિડલ ઓર્ડરમાં ઉતરેલી સોફી ડિવાઇને ઝડપી બેટિંગ કરતા 42 બોલમાં 50 રન બનાવ્યા. તેની ઇનિંગ્સમાં 2 ચોગ્ગા અને 3 છગ્ગા સામેલ હતા. જોકે, બીજા છેડેથી વધુ સહયોગ મળ્યો ન હતો અને ભારતી ફૂલમાળી (5), કનિકા આહુજા (6) અને કાશવી ગૌતમ (11) સસ્તામાં પેવેલિયન પરત ફર્યા. યુપી તરફથી ક્રાંતિ ગૌડ અને સોફી એકલસ્ટોને 2-2 વિકેટ લીધી, જ્યારે દીપ્તિ શર્મા અને ક્લો ટ્રાયોનને એક-એક સફળતા મળી. લેનિંગ માત્ર 14 રન જ બનાવી શકી
154 રનના ટાર્ગેટને ચેઝ કરતા યુપી વોરિયર્સની શરૂઆત ખરાબ રહી. ટીમે 2 રન પર પહેલી વિકેટ ગુમાવી દીધી, જ્યારે કિરણ નવગિરે ખાતું ખોલ્યા વિના આઉટ થઈ ગઈ. આ પછી કેપ્ટન મેગ લેનિંગ પણ 10 બોલમાં 14 રન બનાવીને પેવેલિયન પરત ફરી. નંબર ત્રણ પર બેટિંગ કરવા આવેલી ફીબી લિચફિલ્ડે કેટલાક આકર્ષક શોટ લગાવ્યા અને 5 ચોગ્ગાની મદદથી 32 રન બનાવ્યા, પરંતુ તેના આઉટ થતા જ ટીમ દબાણમાં આવી ગઈ. હરલીન 3 રન બનાવીને આઉટ
શાનદાર ફોર્મમાં ચાલી રહેલી હરલીન દેઓલ પણ આ મેચમાં કંઈ ખાસ કરી શકી નહીં અને 3 રન બનાવીને આઉટ થઈ ગઈ. ક્લો ટ્રાયોને અણનમ 30 રન બનાવ્યા, પરંતુ ટીમને જીત સુધી પહોંચાડી શકી નહીં. રાજેશ્વરીના નામે 3 વિકેટ
ગુજરાતની બોલિંગમાં રાજેશ્વરી ગાયકવાડ સૌથી સફળ રહી અને તેણે 3 વિકેટ ઝડપી. રેણુકા સિંહ ઠાકુર અને સોફી ડિવાઇનને 2-2 વિકેટ મળી, જ્યારે કાશવી ગૌતમ અને એશ્લે ગાર્ડનરે એક-એક બેટરને આઉટ કરી.