રાજસ્થાન રોયલ્સ IPL 2027 પહેલા ભારતીય ઓપનર યશસ્વી જયસ્વાલને રિલીઝ કરી શકે છે. મીડિયા રિપોર્ટ્સ અનુસાર, મુંબઈ ઈન્ડિયન્સના હાર્દિક પંડ્યા સાથે તેનો ટ્રેડ થઈ શકે છે.

સમાચાર છે કે રાજસ્થાનનું મેનેજમેન્ટ જયસ્વાલના વલણથી ખુશ નથી. તેનું મુખ્ય કારણ રિયાન પરાગને તેની પહેલા કેપ્ટનશીપ સોંપવામાં આવી હોવાનું કહેવાય છે. જોકે, ફ્રેન્ચાઈઝી કે ખેલાડી તરફથી આ અંગે કોઈ સત્તાવાર નિવેદન આવ્યું નથી.

IPL 2026માં જયસ્વાલનો સર્વોચ્ચ સ્કોર 77 રન રહ્યો હતો. જે તેણે મુંબઈ ઈન્ડિયન્સ સામે બનાવ્યો હતો.

વૈભવ સૂર્યવંશીએ રાજસ્થાનને વિકલ્પ આપ્યો

જયસ્વાલે IPL 2026ની 16 મેચમાં 427 રન બનાવ્યા હતા. તેણે 30.50ની એવરેજ અને 152.50ના સ્ટ્રાઈક રેટથી બેટિંગ કરી. તે સીઝનમાં માત્ર 3 ફિફ્ટી ફટકારી શક્યો.

આખી સીઝનમાં તેના ઓપનિંગ પાર્ટનર વૈભવ સૂર્યવંશી લાઈમલાઈટમાં રહ્યો. વૈભવે 16 મેચોમાં 237.30ના સ્ટ્રાઈક રેટથી 776 રન બનાવ્યા. તેણે ઓરેન્જ કેપ, સુપર સિક્સિસ અને સુપર સ્ટ્રાઈકરનો ખિતાબ જીત્યો.

રાજસ્થાનને ફાસ્ટ બોલિંગ ઓલરાઉન્ડરની જરૂર છે

રાજસ્થાન રોયલ્સને ફાસ્ટ બોલિંગ ઓલરાઉન્ડરની જરૂર છે. ગયા વર્ષે તેમણે ચેન્નઈ સુપર કિંગ્સ સાથેના ટ્રેડમાં સંજુ સેમસનના બદલે સેમ કરન અને રવીન્દ્ર જાડેજાને ટીમમાં સામેલ કર્યા હતા. જોકે, કરન ઈજાને કારણે સીઝનનો એક પણ મુકાબલો રમી શક્યા નહોતો.

હાર્દિકના ટ્રેડના સમાચાર પહેલા પણ આવી ચૂક્યા છે

તાજેતરમાં જ રિપોર્ટ આવ્યો હતો કે ભારતીય ઓલરાઉન્ડર હાર્દિક ચેન્નઈ સુપર કિંગ્સની ટીમમાં સામેલ થઈ શકે છે.

રાજસ્થાન રોયલ્સ, કોલકાતા નાઈટ રાઈડર્સ અને દિલ્હી કેપિટલ્સ પણ હાર્દિકને પોતાની ટીમમાં સામેલ કરવાના વિકલ્પ પર વિચાર કરી રહી છે.

સ્પોર્ટસ્ટાર સાથેની વાતચીતમાં મુંબઈ ઈન્ડિયન્સના પ્રવક્તાએ ખેલાડીઓના ટ્રેડના સંબંધમાં કોઈ વાતચીતથી ઇનકાર કર્યો હતો.

મુંબઈનું હાર્દિકની આગેવાનીમાં ખરાબ પ્રદર્શન

2020માં મુંબઈ ઈન્ડિયન્સે પોતાનો છેલ્લો IPL ટાઇટલ જીત્યું હતું. ત્યારથી ટીમ ફાઇનલમાં પહોંચી નથી. મુંબઈએ IPL 2024 માટે હાર્દિકને ગુજરાત ટાઇટન્સ પાસેથી ટ્રેડથી મેળવ્યો હતો. ત્યારે 5 વખત ટીમને IPL જીતાડનાર રોહિત શર્માને કેપ્ટનશીપ પરથી હટાવીને હાર્દિકને કેપ્ટનશીપ આપવામાં આવી હતી.

આમ છતાં ટીમની પરફોર્મન્સમાં કોઈ સુધારો આવ્યો નહીં. 2024માં ટીમ ગ્રુપ સ્ટેજમાંથી બહાર થઈ ગઈ હતી. 2025માં પ્લેઓફ સુધી પહોંચી. 2026માં ફરી એકવાર ટીમ ગ્રુપ સ્ટેજમાંથી બહાર થઈ ગઈ.

દિવ્ય ભાસ્કરને Google પર મનપસંદ સોર્સ બનાવો