ઓસ્ટ્રેલિયામાં શરણ લેવાનો નિર્ણય કરનારી સાત ઈરાની મહિલા ફૂટબોલ ટીમની ત્રણ ખેલાડીઓએ પોતાનો નિર્ણય બદલી નાખ્યો છે અને હવે તેઓ પોતાના દેશ ઈરાન પરત ફરી રહી છે. ઓસ્ટ્રેલિયાના ગૃહ મંત્રી ટોની બર્કે રવિવારે જાહેર કરેલા નિવેદનમાં તેની પુષ્ટિ કરી. આ ત્રણ ખેલાડીઓના પરત ફર્યા પછી, હવે ફક્ત ચાર ખેલાડીઓ જ ઓસ્ટ્રેલિયામાં રહી ગઈ છે. હકીકતમાં, એશિયા કપ દરમિયાન સાઉથ કોરિયા સામેની મેચમાં ઈરાની ટીમે પોતાનું રાષ્ટ્રગાન ગાયું ન હતું. ત્યારબાદ ઈરાનમાં કેટલાક લોકોએ ટીમની સખત ટીકા કરી અને ખેલાડીઓ વિરુદ્ધ કડક કાર્યવાહીની માગ કરી. આ જ ડરને કારણે પહેલા પાંચ ખેલાડીઓએ અને પછી ટીમના અન્ય બે સભ્યોએ ઓસ્ટ્રેલિયન સરકાર પાસે શરણ માગી હતી. ઓસ્ટ્રેલિયાએ તેમને માનવીય આધાર પર વિઝા આપીને દેશમાં રહેવાની મંજૂરી આપી હતી. ટીમમાં કુલ 26 ખેલાડીઓ અને સ્ટાફ હાજર હતા, પરંતુ સાત ખેલાડીઓએ જ શરણ માગી હતી. ઓસ્ટ્રેલિયન સરકારે નિર્ણય પર ફરીથી વિચારવાનો મોકો આપ્યો
ગૃહમંત્રી ટોની બર્કે જણાવ્યું કે શનિવારે રાત્રે ઈરાની ટીમના ત્રણ સભ્યોએ બાકીની ટીમ સાથે જોડાવા અને ઈરાન પાછા જવાનો નિર્ણય કર્યો. બર્ક અનુસાર, જ્યારે આ ખેલાડીઓએ ઓસ્ટ્રેલિયન અધિકારીઓને પોતાના નિર્ણય વિશે જણાવ્યું, ત્યારે તેમને પોતાની પસંદ અને વિકલ્પો પર ફરીથી વિચાર કરવા માટે ઘણી તક આપી, જેથી તેઓ કોઈપણ દબાણ વિના નિર્ણય લઈ શકે. મલેશિયાના રસ્તે થશે ઈરાનની વાપસી
સરકારી અધિકારીઓ અનુસાર, શનિવારે રાત્રે ત્રણ સભ્યો સિડનીથી કુઆલાલંપુર (મલેશિયા) માટે રવાના થયા. ઈરાનની ટીમ ઓસ્ટ્રેલિયાથી નીકળ્યા પછી કુઆલાલંપુરમાં જ રોકાઈ છે. ઈરાનની તસ્નીમ ન્યૂઝ એજન્સીએ જણાવ્યું કે પરત ફરનારા આ ત્રણ સભ્યોમાં બે ખેલાડી અને એક સપોર્ટ સ્ટાફ સામેલ છે. ઈરાની મીડિયાએ તેને ‘પ્રોજેક્ટ’ની નિષ્ફળતા ગણાવી
ખેલાડીઓના પાછા ફરવાના નિર્ણય પર ઈરાનની ન્યૂઝ એજન્સીએ તીખી પ્રતિક્રિયા આપી છે. તસ્નીમ ન્યૂઝ એજન્સીએ તેને ‘અમેરિકી-ઓસ્ટ્રેલિયન પ્રોજેક્ટ’ની શરમજનક હાર ગણાવી છે. સાથે જ તેને ડોનાલ્ડ ટ્રમ્પ માટે વધુ એક નિષ્ફળતા ગણાવી છે. હાલમાં ઓસ્ટ્રેલિયામાં બચેલા ત્રણ સભ્યોના ભવિષ્ય અંગે હજુ કોઈ સ્પષ્ટ માહિતી સામે આવી નથી.