ઘણીવાર લોકોને લાગે છે કે ચેસ એક સસ્તી રમત છે, કારણ કે તેમાં અન્ય રમતોની જેમ મોંઘા સાધનો, મોટા સ્ટેડિયમ કે સ્પોર્ટ્સ સાયન્સ ટીમની જરૂર નથી હોતી. પરંતુ ભારતના નવા ચેસ ગ્રાન્ડમાસ્ટર્સની સફળતાની માન્યતાને સંપૂર્ણપણે તોડી નાખી છે. વાસ્તવિકતા એ છે કે આજે એક બાળકને ગ્રાન્ડમાસ્ટર બનાવવામાં 50થી 70 લાખ રૂપિયાનો મોટો ખર્ચ આવે છે. તાજેતરમાં ભારતના 95મા ગ્રાન્ડમાસ્ટર બનેલા આરોણ્યક ઘોષ અને 94મા ગ્રાન્ડમાસ્ટર મયંક ચક્રવર્તીના પરિવારોનો સંઘર્ષ તેનું જીવંત ઉદાહરણ છે. આરોણ્યકના પિતા મૃણાલ ઘોષ જણાવે છે કે તેમણે પોતાના પુત્ર પાછળ છેલ્લા 15 વર્ષમાં લગભગ 46 લાખ રૂપિયા ખર્ચ કર્યો. તેમનું માનવું છે કે ભારતમાં GM બનવા માટે કદાચ સૌથી ઓછી રકમ છે. બેંગકોક ચેસ ક્લબ ઓપનમાં ત્રીજો અને અંતિમ GM નોર્મ હાંસલ કરનાર આરોણ્યક માટે પિતાને વારસાગઈ જમીન અને માતા સંચિતાને લગ્નના ઘરેણાં વેચવા પડ્યા. ઇનામી રકમનો એક-એક પૈસો રમતમાં પાછો લગાવી દેવામાં આવ્યો. જ્યારે, પૂર્વોત્તર ભારતના એકમાત્ર GM મયંકની માતા મોનોમિતા ચક્રવર્તી કહે છે કે શરૂઆતથી GM બનવા સુધી માતા-પિતાએ 70 લાખ રૂપિયા તૈયાર રાખવા જોઈએ. આ ફક્ત GM બનવા સુધીનો ખર્ચ છે. 12 વર્ષીય ફિડે માસ્ટર (GMથી બે પગલાં પાછળ) આરવ સરબલિયાના પિતા યતિનનો અંદાજ છે કે ફક્ત 2025માં તેમણે આરવ પર 25-30 લાખ રૂપિયા ખર્ચ કર્યા. તે ટુર્નામેન્ટ માટે 4 મહિના સુધી વિદેશમાં રહ્યા. સ્પોન્સરશિપ ન મળતાં તેમણે કમાણી માટે સોશિયલ મીડિયા પર કન્ટેન્ટ બનાવવાનું શરૂ કરી દીધું. ચેસમાં સૌથી મોટો ખર્ચ કોચિંગ છે. ગ્રાન્ડમાસ્ટર કોચની ફી 10,000 થી 20,000 રૂપિયા પ્રતિ કલાક હોય છે અને એકથી વધુ કોચ રાખવા પડે છે. નોર્મ્સ માટે વર્ષમાં 6-8 યુરોપ પ્રવાસોનો ખર્ચ 15-20 લાખ રૂપિયા આવે છે. પ્રેક્ટિસ માટે ટ્રેનિંગ પાર્ટનર અને ‘સેકન્ડ્સ’ (જે મેચની તૈયારી કરાવે છે) ને કલાકના હિસાબે ભારે ફી ચૂકવવી પડે છે. ઘણીવાર આ કોચ ઇનામી રકમમાં પણ હિસ્સો માંગે છે. મૃણાલ ઘોષ કહે છે કે 2500 રેટિંગ પાર કરીને GM બનવા પર આયોજકો રહેવા અને ફ્લાઇટનો ખર્ચ ઉઠાવે છે, પરંતુ મારો દીકરો 2550 રેટિંગ પર છે. તેને 2650 સુધી લઈ જવામાં એટલા પૈસા લાગશે કે હું સપના જોતા પણ ડરું છું. સ્પોન્સરશિપ મુશ્કેલ, શેરિંગ એપાર્ટમેન્ટ્સમાં રહે છે – ચેસની રમતમાં સ્પોન્સર મળવા મુશ્કેલ છે. સ્પોર્ટ્સ ઓથોરિટી ઓફ ઇન્ડિયાની પ્રોત્સાહન રકમ પણ બંધ થઈ ગઈ છે. આવા સંજોગોમાં ગુવાહાટીથી આવતા મયંકને વિદેશી પ્રવાસ પર કનેક્ટિંગ ફ્લાઇટનો વધારાનો ખર્ચ ઉઠાવવો પડે છે. – ખર્ચ બચાવવા માટે પરિવાર યુરોપમાં સસ્તા શેરિંગ એપાર્ટમેન્ટમાં રોકાય છે અને ઘરનું ખાવાનું લઈ જાય છે.