અમેરિકી વિદેશ મંત્રી માર્કો રુબિયોએ ગુરુવારે જણાવ્યું કે, ઈરાન યુદ્ધ દરમિયાન NATO દેશોના વલણથી રાષ્ટ્રપતિ ડોનાલ્ડ ટ્રમ્પ ખૂબ જ નિરાશ છે. રુબિયોએ ખાસ કરીને સ્પેનનો ઉલ્લેખ કરતા કહ્યું કે, તેણે અમેરિકાને પોતાના સૈન્ય મથકોનો (મિલિટરી બેઝ) ઉપયોગ કરવાની મંજૂરી ન આપી. તેમણે કહ્યું કે અમેરિકા NATO નો ભાગ એટલા માટે છે જેથી જરૂર પડ્યે તે યુરોપ અને મિડલ ઈસ્ટ (મધ્ય પૂર્વ) જેવા વિસ્તારોમાં પોતાના સૈન્ય મથકોનો ઉપયોગ કરી શકે. રુબિયોએ સવાલ ઉઠાવતા કહ્યું કે, જો કોઈ દેશ અમેરિકાને પોતાના બેઝનો ઉપયોગ કરવા નથી દેતો, તો પછી તે NATO માં કેમ છે? તેમણે કહ્યું કે ટ્રમ્પ NATO દેશોના સહયોગથી ખુશ નથી અને અમેરિકા આ મુદ્દાને ગંભીરતાથી જોઈ રહ્યું છે. છેલ્લા 24 કલાકના 5 મોટા અપડેટ્સ… ટ્રમ્પ બોલ્યા- યુદ્ધ સિવાય કોઈ બીજો વિકલ્પ નહોતો: ટ્રમ્પે કહ્યું કે ઈરાનને પરમાણુ હથિયાર મેળવતા રોકવા માટે અમેરિકા પાસે યુદ્ધ સિવાય કોઈ વિકલ્પ નહોતો. તેમણે દાવો કર્યો કે હોર્મુઝમાં ઉભેલા 1600 ઓઇલ ટેન્કરો (તેલના જહાજો) ટૂંક સમયમાં રવાના થશે, જેનાથી તેલની કિંમતો ઘટશે. ઈરાન બોલ્યું- અમારી પાસે હજુ પણ ઘણા સીક્રેટ હથિયારો બાકી: અમેરિકાની ધમકીઓ વચ્ચે ઈરાને દાવો કર્યો છે કે તેની પાસે ઘણા આધુનિક અને અનટેસ્ટેડ (જેનું પરીક્ષણ ન થયું હોય તેવા) હથિયારો મોજૂદ છે. ઈરાની સૈન્ય સૂત્રોએ જણાવ્યું કે આગામી વખતે જો હુમલો થયો તો જવાબ કોઈપણ પ્રકારના સંયમ રાખ્યા વિના આપવામાં આવશે. ઈરાન યુદ્ધ પર ટ્રમ્પ-નેતન્યાહૂ વચ્ચે મતભેદ: અહેવાલો અનુસાર, અમેરિકા ઈરાન સાથે તણાવ ઓછો કરવા અને સીઝફાયર (યુદ્ધવિરામ) જાળવી રાખવાનો પ્રયાસ કરી રહ્યું છે, જ્યારે ઇઝરાયેલ ફરીથી સૈન્ય કાર્યવાહી કરવાના પક્ષમાં છે. નેતન્યાહૂ સરકાર ઈરાન પર દબાણ બનાવી રાખવા માંગે છે. યુદ્ધ વચ્ચે ફરી મોંઘું થયું તેલ: ઈરાન યુદ્ધ અને સપ્લાય સંકટની આશંકા વચ્ચે બ્રેન્ટ ક્રૂડ પ્રતિ બેરલ 105 ડૉલરને પાર પહોંચી ગયું છે. હોર્મુઝ સ્ટ્રેટને લઈને તણાવ અને અમેરિકી તેલના ભંડારમાં ઘટાડો થવાથી બજારમાં ચિંતા વધી છે. અમેરિકા બોલ્યું- ઈરાન જો હોર્મુઝમાં ટોલ વસૂલશે તો ડીલ મુશ્કેલ: અમેરિકી વિદેશ મંત્રી માર્કો રુબિયોએ કહ્યું કે જો ઈરાન હોર્મુઝ જળડમરુમધ્યમાં (સ્ટ્રેટમાં) જહાજો પાસેથી ટોલ વસૂલશે, તો અમેરિકા-ઈરાન સમજૂતી મુશ્કેલ બની જશે. ટ્રમ્પે પણ કહ્યું કે હોર્મુઝ એક આંતરરાષ્ટ્રીય દરિયાઈ માર્ગ છે અને અહીં ટોલ મંજૂર રાખવામાં આવશે નહીં. ઈરાન યુદ્ધ સંબંધિત અપડેટ્સ માટે નીચે આપેલા બ્લોગને વાંચો…