તમિલનાડુની રાજનીતિમાં વર્ષ 2026 એક નવા યુગની શરૂઆત લઈને આવ્યું છે. સુપરસ્ટાર વિજયની પાર્ટી TVKએ પોતાની પ્રથમ ચૂંટણીમાં જ જોરદાર પ્રદર્શન કરીને રાજકીય પંડિતોને ચોંકાવી દીધા છે. પરંતુ આ જીતની પાછળ માત્ર વિજયનો ક્રેઝ જ નહીં, પણ ચેન્નાઈ સુપર કિંગ્સ (CSK) અને એમએસ ધોની સાથે જોડાયેલું એક ખાસ કનેક્શન પણ ચર્ચામાં છે. શું ‘વ્હિસલ’એ પલટી નાખ્યો ખેલ? TVKનું ચૂંટણી ચિન્હ સીટી (Whistle) હતું. તમિલનાડુના ખૂણેખૂણે CSKનો નારો ‘વ્હિસલ પોડૂ’ અત્યંત લોકપ્રિય છે. ચૂંટણી પ્રચાર દરમિયાન જ્યારે પણ વિજયની રેલીઓમાં સીટીઓ વાગતી, ત્યારે લોકોને ચેપોક સ્ટેડિયમ જેવો માહોલ અનુભવાતો હતો. વિજયે પોતે પણ કહ્યું હતું કે, “જેમ ક્રિકેટમાં સીટી વગાડનાર તમિલનાડુ (CSK) છે, તેમ ચૂંટણીમાં સીટી વગાડનાર અમારી TVK હશે!” પ્રશાંત કિશોર અને ધોની ફેક્ટર રાજકીય વ્યૂહરચનાકાર પ્રશાંત કિશોરે જ્યારે આ પાર્ટી સાથે હાથ મિલાવ્યા ત્યારે તેમણે એક રસપ્રદ નિવેદન આપ્યું હતું. તેમણે કહ્યું હતું કે, ‘મારે તમિલનાડુનો સૌથી લોકપ્રિય બિહારી બનવું છે, અને તેના માટે મારે ધોની સાથે સ્પર્ધા કરવી પડશે.’ આ નિવેદને સાબિત કર્યું હતું કે તમિલનાડુના યુવાનોમાં ધોનીની જે લોકપ્રિયતા છે, તેને જ વિજયના પક્ષમાં વાળવાની રણનીતિ ઘડવામાં આવી હતી. ‘થાલા’ થી ‘થલાપતિ’ સુધીની સફર તમિલનાડુમાં એમએસ ધોનીને ફેન્સ પ્રેમથી ‘થાલા’ કહે છે, જ્યારે વિજયને ‘થલાપતિ’ તરીકે ઓળખવામાં આવે છે. રાજકીય વિશ્લેષકો માને છે કે જે યુવા વર્ગ મેદાનમાં ‘થાલા’ (ધોની) માટે ચીયર કરતો હતો, તે જ વર્ગ વોટિંગ બૂથ પર ‘થલાપતિ’ (વિજય) ની પડખે ઊભો રહ્યો. આ ઈમોશનલ જોડાણે વિજયને 100થી વધુ બેઠકો જીતવામાં મદદ કરી છે. સરકાર બનાવા ગઠબંધનની ગણતરીઓ શરૂ વિજયની પાર્ટીએ ભલે શાનદાર એન્ટ્રી કરી હોય, પણ બહુમતીના આંકડાથી તે હજુ થોડા દૂર છે. હવે સરકાર બનાવવા માટે ગઠબંધનની ગણતરીઓ શરૂ થશે. પરંતુ એક વાત તો નક્કી છે કે વિજયે સાબિત કરી દીધું છે કે જો મજબૂત રણનીતિ અને જનસમર્થન હોય, તો ફિલ્મી પડદાનો ‘હીરો’ રાજનીતિનો પણ ‘સુપરસ્ટાર’ બની શકે છે.