ન્યૂઝીલેન્ડે બીજી T20 મેચમાં સાઉથ આફ્રિકાને 68 રનથી હરાવીને સિરીઝમાં વાપસી કરી છે. આ જીત સાથે 5 મેચની સિરીઝ હવે 1-1થી બરાબરી પર આવી ગઈ છે. પહેલી મેચમાં સાઉથ આફ્રિકાએ કિવીઝને 91 રન પર ઓલઆઉટ કરીને જીત મેળવી હતી. સિરીઝની ત્રીજી મેચ 20 માર્ચે ઓકલેન્ડમાં રમાશે. મંગળવારે હેમિલ્ટનમાં રમાયેલી મેચમાં સાઉથ આફ્રિકાએ ટૉસ જીતીને પહેલા બોલિંગ કરવાનો નિર્ણય કર્યો. ન્યૂઝીલેન્ડે 20 ઓવરમાં છ વિકેટે 175 રન બનાવ્યા. તેના જવાબમાં સાઉથ આફ્રિકાની ટીમ 15.3 ઓવરમાં 107 રન બનાવીને ઓલઆઉટ થઈ ગઈ. ડેવોન કોનવેએ 60 રન બનાવ્યા
ન્યૂઝીલેન્ડ માટે ટોમ લેથમે ઇનિંગ્સની શરૂઆત કરી, પરંતુ તે માત્ર 11 રન બનાવીને આઉટ થઈ ગયો. ત્યારબાદ ટિમ રોબિન્સન 1, નિક કેલી 21, કેપ્ટન મિચેલ સેન્ટનર 20 રન બનાવીને આઉટ થયા. જોકે, બીજા ઓપનર ડેવોન કોનવેએ અડધી સદી ફટકારી. તેણે 49 બોલમાં 5 ચોગ્ગા અને 2 છગ્ગાની મદદથી 60 રન બનાવ્યા. ત્યારબાદ અંતમાં કોલ મેકોન્ચી અને જોશ ક્લાર્કસને ટીમને 175 રન સુધી પહોંચાડી દીધી. ક્લાર્કસને 9 બોલમાં અણનમ 26 રન બનાવ્યા. સાઉથ આફ્રિકા માટે બ્યોર્ન ફોર્ટુઇને 2 વિકેટ લીધી. જ્યોર્જ લિન્ડે, કેશવ મહારાજ, બ્યોર્ન હેન્ડ્રિક્સ અને ઓટનીલ બાર્ટમેનને 1-1 વિકેટ મળી. સાઉથ આફ્રિકા 107 રન પર ઓલઆઉટ
176 રનના ટાર્ગેટને ચેઝ કરવા ઉતરેલી સાઉથ આફ્રિકાની શરૂઆત ખૂબ જ ખરાબ રહી. 67ના સ્કોર પર અડધી ટીમ પેવેલિયન પરત ફરી. જ્યોર્જ લિન્ડેએ સૌથી વધુ 33 રન બનાવ્યા, જ્યારે 6 બેટર્સ ડબલ ડિજીટ પણ પાર કરી શક્યા નહીં. સાઉથ આફ્રિકાની આખી ટીમ 15.3 ઓવરમાં 107 રન પર ઓલઆઉટ થઈ ગઈ. ન્યૂઝીલેન્ડ માટે બેન સિયર્સ અને લોકી ફર્ગ્યુસને 3-3 વિકેટ ઝડપી. આ ઉપરાંત મિચેલ સેન્ટનરે 2 વિકેટ લીધી. કોલ મેકોન્ચી અને જિમી નીશમને 1-1 વિકેટ મળી.