દેશમાં ડીઝલ એસયુવી અને સ્ટ્રોંગ હાઇબ્રિડ કાર ખરીદવી મોંઘી પડશે. પ્લેટિનમ પર અસરકારક આયાત ડ્યુટી 6.4%થી વધીને 15.4% થવું તેનું કારણ છે. તેની અસર એવી ગાડીઓ પર થશે, જેમાં પ્રદૂષણ નિયંત્રણ માટે કિંમતી મેટલનો ઉપયોગ થાય છે. ઓટો કંપનીઓ વધેલા ખર્ચનો બોજ સીધો ગ્રાહકો પર નાખી શકે છે. આનાથી મિડ-સાઇઝ ડીઝલ એસયુવીના ભાવ 12 હજાર અને સ્ટ્રોંગ હાઇબ્રિડ કારની કિંમતો 18 હજાર સુધી વધી શકે છે. એન્ટ્રી-લેવલ પેટ્રોલ કાર પણ 4 હજાર સુધી મોંઘી થઈ શકે છે. પ્લેટિનમનો ઉપયોગ ગાડીઓમાં BS-6 ધોરણો પૂરા કરવા માટે થાય છે. નીતિ આયોગના પૂર્વ નિર્દેશક રણધીર સિંહના મતે, પ્લેટિનમ પર ડ્યુટી વધવાથી પ્રદૂષણ નિયમોના પાલનનો ખર્ચ વધી જશે. ટાટા મોટર્સ જેવી કંપનીઓ સૌથી વધુ પ્રભાવિત થશે. સ્કોર્પિયો-એન, થાર, XUV-700 જેવા મોડેલો પર મહિન્દ્રાનો ખર્ચ વધશે. ટોયોટા અને મારુતિની સ્ટ્રોંગ હાઇબ્રિડ કારની કિંમત પણ વધશે. હાઇબ્રિડ ગાડીઓમાં એન્જિન વારંવાર સ્ટાર્ટ થાય છે. તેમના ફિલ્ટરમાં વધુ પ્લેટિનમ લાગે છે. ભારે વાહનોમાં પ્લેટિનમનો વપરાશ વધુ હોય છે એન્જિનમાં પ્રદૂષણ રોકવા માટે પ્લેટિનમનો ઉપયોગ થાય છે. ભારે વાહનોમાં તેની માત્રા વધુ હોવાથી તેમની ઉત્પાદન કિંમત પર સૌથી વધુ અસર પડશે. વાહનની કેટેગરી- પ્લેટિનમનો વપરાશ
કોમર્શિયલ વાહન – 20+
હાઇબ્રિડ કાર – 10-15
મધ્યમ ડીઝલ એસયુવી – 6-10
પેટ્રોલ કાર – 2-4
(આંકડા ગ્રામમાં) રાહત- જૂના સાયલેન્સરથી નીકળશે સસ્તું પ્લેટિનમ
સાયલેન્સર ફિલ્ટર માટે વિદેશી પ્લેટિનમ પર 7.5% ટેક્સ જ લાગશે. સરકારે હવે વિદેશથી જૂના અને ખરાબ ફિલ્ટર મંગાવવા પર ટેક્સ ઘટાડીને 4.35% કરી દીધો છે. આનાથી ખરાબ સાયલેન્સરથી પ્લેટિનમ કાઢીને તેનો ફરીથી ઉપયોગ કરવો સસ્તો થશે. આ નિર્ણયથી દેશમાં રિસાયક્લિંગને પ્રોત્સાહન મળશે. જોકે, પ્લેટિનમ મોંઘું થવાથી વેન્ડર હવે ઓટો કંપનીઓ પાસેથી વધુ કિંમતો વસૂલશે. અસર- EVમાં ગ્રાહકોની રુચિ વધી શકે છે
પ્લેટિનમ મોંઘું થવાથી ઇલેક્ટ્રિક કારની માગ વધી શકે છે. આમાં પ્રદૂષણ નિયંત્રણ માટે કેટાલિટીક કન્વર્ટરની જરૂર નથી હોતી. કંપનીઓ હાઇડ્રોજન ટેકનોલોજી પર પણ ફોકસ વધારી શકે છે. રિસર્ચ વધવાથી ભવિષ્યમાં આ કાર સસ્તી થઈ શકે છે. કંપનીઓ હાલમાં ડ્યુટી વધવાની અસર આંકી રહી છે.