બાંગ્લાદેશે પાકિસ્તાનને ત્રીજી વન-ડેમાં 11 રનથી હરાવીને ત્રણ મેચની સિરીઝ 2-1થી પોતાના નામે કરી લીધી. ઢાકાના શેરે બાંગ્લા નેશનલ સ્ટેડિયમમાં રમાયેલી મેચમાં તંઝીદ હસન તમીમે શાનદાર સદી ફટકારીને ટીમને 50 ઓવરમાં 5 વિકેટે 290 રન સુધી પહોંચાડી. જવાબમાં પાકિસ્તાનની ટીમ 50 ઓવરમાં 279 રન બનાવીને ઓલઆઉટ થઈ ગઈ. પાકિસ્તાન માટે સલમાન આગાએ 106 રનની શાનદાર ઇનિંગ્સ રમી, પરંતુ તેમની સદી ટીમને હારથી બચાવી શકી નહીં. તમીમની સદીથી બાંગ્લાદેશનો મજબૂત સ્કોર ટોસ હારીને પ્રથમ બેટિંગ કરવા ઉતરેલા બાંગ્લાદેશની શરૂઆત સારી રહી. સૈફ હસન (36) અને તંઝીદ હસન તમીમે પ્રથમ વિકેટ માટે 105 રનની ભાગીદારી કરી. સૈફ આઉટ થયા પછી પણ તમીમે આક્રમક બેટિંગ ચાલુ રાખી અને 107 બોલમાં 107 રનની શાનદાર ઇનિંગ્સ રમી. તેમણે પોતાની ઇનિંગ્સમાં 6 ચોગ્ગા અને 7 છગ્ગા ફટકાર્યા. મિડલ ઓર્ડરમાં નઝમુલ હુસૈન શાંતો (27) અને લિટન દાસ (41)એ ટીમને સ્ટેબિલિટી આપી. છેલ્લા ઓવરોમાં તૌહીદે 44 બોલમાં અણનમ 48 રન બનાવી ટીમને 290 રન સુધી પહોંચાડી. પાકિસ્તાન તરફથી હારિસ રઉફે 3 વિકેટ લીધી, જ્યારે શાહીન આફ્રિદી અને અબરાર અહેમદને એક-એક વિકેટ મળી. પાકિસ્તાનની ખરાબ શરૂઆત 291 રનનો ટાર્ગેટ ચેઝ કરવા ઉતરેલી પાકિસ્તાનની શરૂઆત ખૂબ જ ખરાબ રહી. ટીમે માત્ર 17 રન પર 3 વિકેટ ગુમાવી દીધી. સાહિબઝાદા ફરહાન (6), માઝ સાદાકત (6) અને મોહમ્મદ રિઝવાન (4) જલ્દી આઉટ થઈ ગયા. ત્યારબાદ ગાઝી ઘોરી (29) અને અબ્દુલ સમદ (34)એ ઇનિંગ્સ સંભાળવાનો પ્રયાસ કર્યો, પરંતુ મોટી ભાગીદારી બનાવી શક્યા નહીં. સલમાન આગાની સદી મિડલ ઓર્ડરમાં સલમાન આગાએ શાનદાર બેટિંગ કરતા 98 બોલમાં 106 રન બનાવ્યા. તેણે 9 ચોગ્ગા અને 4 છગ્ગા ફટકાર્યા. તેની સાથે સાદ મસૂદે 38 રનની ઇનિંગ રમી અને બંને વચ્ચે 79 રનની મહત્વપૂર્ણ ભાગીદારી થઈ. આ પછી કેપ્ટન શાહીન આફ્રિદીએ પણ 38 બોલમાં 37 રન બનાવીને મેચને રોમાંચક બનાવી દીધી. છેલ્લી ઓવરોમાં પાકિસ્તાનને જીતવા માટે 12 રન જોઈતા હતા, પરંતુ બાંગ્લાદેશી બોલરોએ દબાણ જાળવી રાખ્યું અને આખી ટીમ 279 રન પર ઓલઆઉટ થઈ ગઈ. તસ્કીનને 4 વિકેટ બાંગ્લાદેશની જીતમાં તસ્કીન અહેમદે મહત્વની ભૂમિકા ભજવી હતી. તેણે 10 ઓવરમાં 49 રન આપીને 4 વિકેટ લીધી અને પાકિસ્તાનની બેટિંગને શરૂઆતના ઝટકા આપ્યા. મુસ્તફિઝુર રહેમાને 3 વિકેટ, નાહિદ રાણાએ 2 વિકેટ અને રિશાદ હુસૈને 1 વિકેટ લઈને પાકિસ્તાનની ઇનિંગ્સને સમેટી લીધી.