બાંગ્લાદેશે પાકિસ્તાનને પહેલી વન-ડેમાં 8 વિકેટે હરાવીને ત્રણ મેચની સિરીઝમાં 1-0ની લીડ મેળવી લીધી. ઢાકાના શેર-એ-બાંગ્લા નેશનલ સ્ટેડિયમમાં રમાયેલી મેચમાં પાકિસ્તાનની ટીમ 114 રન પર ઓલઆઉટ થઈ ગઈ હતી. બાંગ્લાદેશી પેસર નાહિદ રાણાએ 5 વિકેટ લીધી હતી. જવાબમાં બાંગ્લાદેશે 115 રનનો ટાર્ગેટ માત્ર 15.1 ઓવરમાં 2 વિકેટ ગુમાવીને ચેઝ કરી લીધો. તન્ઝીદ હસન તમીમે અણનમ 67 રનની ઝડપી ઇનિંગ્સ રમી. તન્ઝીદ હસનની ફિફ્ટી 115 રનના ટાર્ગેટને ચેઝ કરતા બાંગ્લાદેશની શરૂઆત બહુ સારી રહી ન હતી અને સૈફ હસન 4 રન બનાવીને શાહીન આફ્રિદીનો શિકાર બન્યો હતો. ત્યારબાદ તન્ઝીદ હસન તમીમ અને નઝમુલ હુસૈન શાંતોએ બીજી વિકેટ માટે 82 રનની ભાગીદારી કરીને મેચને લગભગ એકતરફી બનાવી દીધી હતી. તન્ઝીદ હસને 42 બોલમાં 7 ચોગ્ગા અને 5 છગ્ગાની મદદથી અણનમ 67 રન બનાવ્યા હતા. જ્યારે નઝમુલ હુસૈન શાંતોએ 33 બોલમાં 27 રન બનાવ્યા હતા. અંતે લિટન દાસ 3 રન બનાવીને અણનમ પરત ફર્યો અને ટીમે 15.1 ઓવરમાં ટાર્ગેટ ચેઝ કરી લીધો. નાહિદ રાણાની 5 વિકેટ આ પહેલા ટૉસ હારતા પહેલી બેટિંગ કરવા ઉતરેલી પાકિસ્તાનની ટીમ 30.4 ઓવરમાં 114 રન બનાવી ઓલઆઉટ થઈ ગઈ. બાંગ્લાદેશના ઝડપી બોલર નાહિદ રાણાએ શાનદાર બોલિંગ કરતા 7 ઓવરમાં 24 રન આપીને 5 વિકેટ ઝડપી. કેપ્ટન મેહદી હસન મિરાજે પણ 10 ઓવરમાં 29 રન આપીને 3 વિકેટ લીધી. આ ઉપરાંત તસ્કીન અહેમદ અને મુસ્તફિઝુર રહેમાનને એક-એક વિકેટ મળી. સારી શરૂઆત બાદ પાકિસ્તાનની ઇનિંગ્સમાં બેટર્સનો ધબડકો થયો પાકિસ્તાનની શરૂઆત સારી રહી અને પહેલી વિકેટ માટે સાહિબઝાદા ફરહાન અને માઝ સાદાકતે 41 રન જોડ્યા. ફરહાને 27 અને સાદાકતે 18 રન બનાવ્યા, પરંતુ તે પછી ટીમ સતત વિકેટ ગુમાવતી રહી. નાહિદ રાણાએ ફરહાનને આઉટ કરીને પાકિસ્તાનને પહેલો ઝટકો આપ્યો. તે પછી તેણે શામિલ હુસૈન, મોહમ્મદ રિઝવાન અને સલમાન આગાને પણ પેવેલિયન મોકલી દીધા. તેની બોલિંગ સામે પાકિસ્તાનનો ટૉપ અને મિડલ ઓર્ડર સંપૂર્ણપણે વેરવિખેર થઈ ગયો. ફહીમ અશરફના 37 રન પાકિસ્તાનના મધ્યમક્રમના બેટર્સ મોટી ઇનિંગ્સ રમી શક્યો નહીં. હુસૈન તલત 4, અબ્દુલ સમદ 0 અને કેપ્ટન શાહીન આફ્રિદી 4 રન બનાવીને આઉટ થયો. અંતે, ઓલરાઉન્ડર ફહીમ અશરફે 47 બોલમાં 6 ચોગ્ગા અને એક છગ્ગાની મદદથી 37 રન બનાવ્યા, જે ટીમ તરફથી સૌથી મોટી ઇનિંગ્સ હતી. છેલ્લી વિકેટ માટે 32 રનની ભાગીદારી પાકિસ્તાનની ટીમ એક સમયે 82 રન પર 9 વિકેટ ગુમાવી ચૂકી હતી. ત્યારબાદ ફહીમ અશરફ અને અબરાર અહેમદે છેલ્લી વિકેટ માટે 32 રનની ભાગીદારી કરીને ટીમનો સ્કોર 114 સુધી પહોંચાડ્યો. અબરાર અહેમદ 10 બોલમાં ખાતું ખોલ્યા વિના અણનમ રહ્યો. પાકિસ્તાનના ચાર ખેલાડીઓનું વન-ડે ડેબ્યૂ આ મેચમાં પાકિસ્તાન તરફથી ચાર ખેલાડીઓએ વન-ડે ડેબ્યૂ કર્યું. ટીમ માટે અબ્દુલ સમદ, માઝ સાદાકત, સાહિબઝાદા ફરહાન અને શામિલ હુસૈને પહેલીવાર વન-ડે મેચ રમી. જોકે, ડેબ્યૂ મેચમાં આ ખેલાડીઓ મોટી ઇનિંગ્સ રમી શક્યા નહીં. ફરહાને 27 રન બનાવીને ટીમ તરફથી સૌથી વધુ રન બનાવ્યા, જ્યારે માઝ સાદાકતે 18 રન બનાવ્યા. જ્યારે શામિલ હુસૈન 4 રન અને અબ્દુલ સમદ ખાતું ખોલાવ્યા વગર આઉટ થઈ ગયો. બહિષ્કાર બાદ પહેલી મેચ રમી રહેલી બાંગ્લાદેશ ટીમ બાંગ્લાદેશની ટીમ T20 વર્લ્ડ કપના બહિષ્કાર બાદ પહેલીવાર કોઈ ઈન્ટરનેશનલ મેચમાં ઉતરી છે. ટુર્નામેન્ટ પહેલાં બાંગ્લાદેશ ક્રિકેટ બોર્ડ અને ખેલાડીઓએ સુરક્ષા ચિંતાઓને કારણે ભારત પ્રવાસનો ઇનકાર કર્યો હતો. ટીમનું કહેવું હતું કે વર્તમાન પરિસ્થિતિઓમાં ખેલાડીઓની સુરક્ષા અને પ્રવાસને લઈને ચિંતાઓ છે, તેથી ટુર્નામેન્ટમાં ભાગ લેવો શક્ય નથી. ત્યારબાદ બાંગ્લાદેશને વર્લ્ડ કપમાંથી હટાવી દેવામાં આવ્યું અને તેની જગ્યાએ સ્કોટલેન્ડને સામેલ કરવામાં આવ્યું. પાકિસ્તાન સામે ઢાકામાં રમાયેલી આ વન-ડે મેચ તે જ નિર્ણય પછી બાંગ્લાદેશનો પ્રથમ આંતરરાષ્ટ્રીય મુકાબલો હતો.