ભારતે ટી-20 વર્લ્ડ કપ જીતી લીધો છે. ટીમે રવિવારે રાત્રે ન્યુઝીલેન્ડને 96 રનથી હરાવ્યું. જોકે, આ ટ્રોફી માટે તમામ ખેલાડીઓએ યોગદાન આપ્યું, પરંતુ કેટલાક ખેલાડીઓ એવા રહ્યા જેમણે મુશ્કેલ પરિસ્થિતિઓમાં પ્રદર્શન કરીને પોતાને સાબિત કર્યા. ભારતને વર્લ્ડ ચેમ્પિયન બનાવનારા 5 હીરો 1. મોટી મેચોમાં સેમસને ફિફ્ટી ફટકારી ભારતના વિકેટકીપર બેટર સંજુ સેમસન ભારત માટે ટ્રમ્પ કાર્ડ સાબિત થયા. તેમણે ટીમ માટે સતત 3 મેચમાં ફિફ્ટી ફટકારી. લીગ સ્ટેજમાં પ્લેઇંગ-11 માટે સંઘર્ષ કરી રહેલા સંજુને વેસ્ટ ઇન્ડિઝ સામે કોલકાતામાં તક મળી. અહીં ટીમને જીત જોઈતી હતી. સેમસને બેટિંગ માટે પડકારજનક પિચ પર અણનમ 97 રનની ઇનિંગ રમીને ભારતને ફાઇટિંગ ટોટલ સુધી પહોંચાડ્યું. એટલું જ નહીં, સેમિફાઇનલમાં ઇંગ્લેન્ડ સામે અને ફાઇનલમાં ન્યુઝીલેન્ડ સામે 89-89 રનની ઇનિંગ રમી. તેઓ આ ટુર્નામેન્ટમાં ભારતના ટોપ સ્કોરર રહ્યા. તેમને પ્લેયર ઓફ ધ ટુર્નામેન્ટ તરીકે પસંદ કરવામાં આવ્યા. 2. બુમરાહ આ ટૂર્નામેન્ટના ટોપ વિકેટ ટેકર જસપ્રીત બુમરાહ પ્લેયર ઓફ ધ ફાઇનલ રહ્યા. તેમણે ન્યુઝીલેન્ડ સામે પોતાની કોટાની ચાર ઓવરમાં 15 રન આપીને 4 વિકેટ ઝડપી. એટલું જ નહીં, તેઓ આ ટૂર્નામેન્ટના ટોપ વિકેટ ટેકર પણ બન્યા. તેમણે 8 મેચમાં 14 વિકેટ ઝડપી. સેમિફાઇનલમાં ઇંગ્લેન્ડ સામે બુમરાહની સચોટ બોલિંગે ભારતને જીત અપાવી. ગુરુવારે 254 રનના ટાર્ગેટને ચેઝ કરી રહેલા ઇંગ્લેન્ડે 15 ઓવરમાં 5 વિકેટે 185 રન બનાવી લીધા હતા. મેચ ઇંગ્લેન્ડના પક્ષમાં જતી દેખાઈ રહી હતી, ત્યારે જ કેપ્ટન સૂર્યકુમાર યાદવે જસપ્રીત બુમરાહને બોલ આપ્યો. તેમણે મિડલ ઓવર્સમાં 2 ઓવર ફેંકી અને માત્ર 14 રન આપીને ઇંગ્લેન્ડ પર દબાણ બનાવ્યું. અહીંથી ભારતે 7 રનથી મેચ જીતી લીધી. 3. ઈશાન કિશનના નામે 3 ફિફ્ટી ટી-20 વર્લ્ડ કપ પહેલાં છેલ્લી ઘડીએ ટીમમાં પસંદ કરાયેલા ઓપનર ઈશાન કિશને ટૂર્નામેન્ટમાં 3 ફિફ્ટી ફટકારી હતી. તેણે ફાઇનલમાં 21 બોલમાં 247.61ના સ્ટ્રાઈક રેટથી 52 રન બનાવ્યા હતા. કિશને સંજુ સેમસન સાથે 48 બોલમાં 105 રનની ભાગીદારી કરી હતી. આ પહેલા પાકિસ્તાન સામે ઈશાન ઓપનિંગ કરવા ઉતર્યો હતો, પરંતુ તેની સામે અભિષેક શર્મા શૂન્ય રને આઉટ થઈ ગયો હતો. આ પછી તેણે તિલક વર્મા સાથે બીજી વિકેટ માટે 88 રનની ભાગીદારી કરી હતી. આ ભાગીદારીએ ટીમને 175 રનના સ્કોર સુધી પહોંચાડવામાં મહત્વની ભૂમિકા ભજવી હતી. ઈશાને 77 રન બનાવ્યા હતા. ઈશાને નામિબિયા સામે પણ અડધી સદી ફટકારી. તેણે 9 મેચમાં 193.29ના સ્ટ્રાઈક રેટથી 317 રન બનાવ્યા. આમાં 3 અડધી સદીનો સમાવેશ થાય છે. તે ભારતનો બીજો ટોપ સ્કોરર રહ્યો. 4. હાર્દિકના નામે 217 રન સાથે 9 વિકેટ હાર્દિક પંડ્યાએ બેટ અને બોલ બંનેથી યોગદાન આપ્યું. તેણે 9 મેચમાં એક અડધી સદીની મદદથી 217 રન બનાવ્યા. 160.74ના સ્ટ્રાઈક રેટથી બેટિંગ કરી. આટલું જ નહીં, પંડ્યાએ 9 વિકેટ પણ લીધી. ઈંગ્લેન્ડ સામેની સેમિફાઇનલમાં હાર્દિક પંડ્યાએ ઓલરાઉન્ડ પ્રદર્શન કર્યું. તેણે 12 બોલમાં 225ના સ્ટ્રાઈક રેટથી 27 રન બનાવ્યા અને ટીમ ઈન્ડિયાનો સ્કોર 250ને પાર પહોંચાડી દીધો. બોલિંગ કરતા તેણે પહેલી જ બોલ પર ફિલ સોલ્ટની વિકેટ લીધી. તેણે 19મી ઓવરમાં માત્ર 9 રન આપ્યા અને જીત અપાવી. 5. શિવમ દુબેએ ફાઇનલમાં 225ના સ્ટ્રાઇક રેટથી રન બનાવ્યા ભારતે ફાઇનલમાં 15 ઓવરમાં 203 રન બનાવ્યા હતા. ત્યારે જિમી નીશમે 16મી ઓવરમાં સંજુ સેમસન (89 રન), ઈશાન કિશન (52 રન) અને સૂર્યકુમાર યાદવ (શૂન્ય)ને પેવેલિયન ભેગા કર્યા. ત્યારબાદ આગામી 24 બોલમાં 28 રન બન્યા. આવી સ્થિતિમાં ટીમ ઈન્ડિયા માટે 250 રન સુધી પહોંચવું પણ મુશ્કેલ લાગી રહ્યું હતું. શિવમ દુબેએ ઇનિંગ્સની 20મી ઓવરમાં જિમી નીશમ સામે બે છગ્ગા અને 3 ચોગ્ગા ફટકાર્યા. તેમની 8 બોલમાં 26 રનની ઇનિંગ્સને કારણે ટીમ ઇન્ડિયાએ ફાઇનલમાં 255 રનનો સ્કોર બનાવ્યો. તેમણે સેમિફાઇનલમાં ઇંગ્લેન્ડ સામે 25 બોલમાં 43 રનની ઇનિંગ્સ રમી હતી.