જસપ્રીત બુમરાહ, હાર્દિક પંડ્યા, રવીન્દ્ર જાડેજા અને સૂર્યકુમાર યાદવ એવા નામ છે, જે IPLમાં ચમક્યા અને ભારતીય ટીમમાં સ્થાન બનાવ્યું. પરંતુ કેટલાક ખેલાડીઓ એવા પણ રહ્યા, જેમને ચાહકો ધીમે ધીમે ભૂલી ગયા. IPLના અનસંગ હીરોઝ સિરીઝમાં આવા જ ક્રિકેટર્સની સ્ટોરી વાંચો… પહેલું નામ ગોવાના સ્વપ્નિલ અસનોદકરનું છે. સ્વપ્નિલ 2008માં પહેલું ટાઇટલ જીતનારી રાજસ્થાન રોયલ્સનો ભાગ રહ્યા. તેમને પહેલી જ મેચમાં પ્લેયર ઓફ ધ મેચનો એવોર્ડ મળ્યો. સ્વપ્નિલે કોલકાતા સામે 34 બોલમાં 60 રન બનાવ્યા, જેમાં 10 ચોગ્ગા અને 1 સિક્સર સામેલ હતી. સ્વપ્નિલે તે સિઝનની 9 મેચોમાં 311 રન બનાવ્યા અને ટીમને ચેમ્પિયન બનાવી. તે હાલમાં કેરળની અંડર-23 ટીમના મુખ્ય કોચ છે. સ્વપ્નિલ અસનોદકરે ભાસ્કર સાથે પોતાની કહાની શેર કરી. તેમણે પોતાની સફર, IPLની ચળકાટ અને ટીમમાંથી બહાર થવાનું દર્દ વર્ણવ્યું… ગોવામાં ફૂટબોલનો માહોલ, પણ ક્રિકેટનું ભૂત સવાર હતું સ્વપ્નિલ ગોવાથી છે, જ્યાં ફૂટબોલ સૌથી લોકપ્રિય રમત છે. તેમના પિતા અને કાકા ક્લબ લેવલ પર ફૂટબોલ અને ક્રિકેટ રમતા હતા. સ્વપ્નિલે જણાવ્યું- મારા પરિવારમાં પાંચેય ભાઈઓ સ્પોર્ટ્સમાં હતા. ફોઈ સ્ટેટ લેવલ એથ્લીટ હતા. ઘરમાં રમતગમતનું વાતાવરણ બાળપણથી જ હતું. સ્વપ્નિલે જણાવ્યું- મેં ટેનિસ બોલથી ગલી ક્રિકેટ શરૂ કર્યું અને ત્યાંથી ક્રિકેટનું ભૂત સવાર થઈ ગયું. 9મા ધોરણમાં સતત ત્રણ મેચમાં ત્રણ સદી ફટકારી, ત્યારે લાગ્યું કે હું લેધર બોલથી રમી શકું છું. પિતાએ કોચિંગ કેમ્પમાં મોકલ્યો અને ત્યાંથી કારકિર્દી બદલાઈ ગઈ. મેચના 4 કલાક પહેલા શેન વોર્ને કહ્યું- ‘તું આ મેચ રમી રહ્યો છે’ 2008ની પ્રથમ સિઝનને યાદ કરતાં સ્વપ્નિલે જણાવ્યું કે શરૂઆતની ચાર મેચોમાં તક મળી ન હતી. પરંતુ શેન વોર્ને કહ્યું હતું – ક્યારેક ને ક્યારેક તક આવશે, તૈયાર રહેજે. 1 મે 2008ના રોજ KKR સામે બપોરે 12 વાગ્યે મીટિંગ હતી. વોર્ને અચાનક કહ્યું – ‘યુ આર પ્લેઇંગ ટુડે’. સ્વપ્નિલ તૈયાર હતો. આ જ મેચમાં તેણે પોતાની પ્રથમ IPL ફિફ્ટી ફટકારી અને 60 રન બનાવ્યા.
ચેમ્પિયન બનાવવાનો શ્રેય વોર્નને આપ્યો, ‘ગોવાની તોપ’ નામ મળ્યું હતું રાજસ્થાન રોયલ્સ તે વર્ષે ચેમ્પિયન બની. સ્વપ્નિલને Goan Cannon નામ મળ્યું. તેણે 9 મેચમાં 2 ફિફ્ટી સાથે 311 રન બનાવ્યા. સ્વપ્નિલ અને ગ્રીમ સ્મિથની ઓપનિંગ જોડીએ 418 રન કર્યા, જે સિઝનની સૌથી શ્રેષ્ઠ પાર્ટનરશિપ હતી. સ્વપ્નિલે કહ્યું- ટીમમાં મોટા સ્ટાર નહોતા, પરંતુ શેન વોર્ન અને ડેરેન બેરીએ એવું વાતાવરણ બનાવ્યું કે- અમે બધાએ પોતાનું શ્રેષ્ઠ પ્રદર્શન કર્યું. પહેલા ત્રણ મેચ હાર્યા પછી અમે કમબેક કર્યું. નસીબ પણ સાથ આપ્યો અને અમે ચેમ્પિયન બન્યા. પૂરો શ્રેય વોર્ન અને સપોર્ટ સ્ટાફને જાય છે. આંગળીની ઈજાથી પરફોર્મન્સ બગડ્યું, તકો મળતી બંધ થઈ ગઈ પહેલી સિઝન શાનદાર રહી, પરંતુ બીજી સિઝનમાં ઈજાએ આંચકો આપ્યો. સાઉથ આફ્રિકામાં IPL દરમિયાન ફિલ્ડિંગમાં આંગળીમાં લિગામેન્ટ ટિયર થઈ ગયું. 10 દિવસના કેમ્પનો ફાયદો ન મળ્યો. બાઉન્સવાળી પિચો પર એડજસ્ટ ન થઈ શક્યા અને પ્રદર્શન પ્રભાવિત રહ્યું. 2009ની સિઝનમાં સ્વપ્નિલને 8 મેચમાં તક મળી, પરંતુ તે 98 રન જ બનાવી શક્યા. તે પછી 2010 અને 2011ની સિઝનમાં તેમને ઓછી તકો મળી. સ્વપ્નિલે 2011માં પોતાની છેલ્લી મેચ રમી. તેમણે કિંગ્સ XI પંજાબ (હવે પંજાબ કિંગ્સ) સામે 21 એપ્રિલે રમાયેલી મેચમાં 9 બોલમાં 9 રન બનાવ્યા હતા. આ ઇનિંગ્સમાં એક ચોગ્ગો સામેલ હતો. સ્વપ્નિલે પોતાની IPL કારકિર્દીમાં કુલ 20 મેચ રમી અને તેમાં બે ફિફ્ટીની મદદથી 423 રન બનાવ્યા. સ્વપ્નિલે કહ્યું- મારી મહેનત ચાલુ રહી, પણ સફળતાની કોઈ ગેરંટી નહોતી. હું પોઝિટિવ માઇન્ડેડ છું. લાખો લોકો IPL રમવાનું સપનું જુએ છે, મેં ત્યાં જઈને મારો જલવો બતાવ્યો. લોકો આજે પણ 2008ના કારણે મને યાદ કરે છે. આ જ મારા માટે સંતોષની વાત છે. 10 હજાર રન બનાવ્યા, છતાં સંભવિતોમાં સ્થાન ન મળ્યું ગોવા માટે 17 વર્ષ રમતા સ્વપ્નિલે જણાવ્યું- 2017-18માં હું ત્રણેય ફોર્મેટમાં સૌથી વધુ રન બનાવનાર બેટ્સમેન હતો. રણજી અને વનડેમાં સદી ફટકારી હતી, તેમ છતાં પછીના વર્ષે સંભવિત ખેલાડીઓમાં સ્થાન મળ્યું નહીં. હું ગોવાનો પહેલો ખેલાડી હતો, જેણે તમામ ફોર્મેટમાં કુલ 10 હજારથી વધુ રન બનાવ્યા હતા. આ નિર્ણય એસોસિએશનનો હતો, જેમાં હું કંઈ કરી શકતો ન હતો. 33 વર્ષની ઉંમરે આ નિર્ણય સમજાયો નહીં, પરંતુ મેં તેને સકારાત્મક રીતે લીધો. હવે કોચિંગથી ટીમ ઈન્ડિયાની રડારમાં સ્વપ્નિલ 2019માં સ્વપ્નિલે ખેલાડી તરીકે નિવૃત્તિ લીધી અને કોચિંગ શરૂ કર્યું. તેમણે ગોવાની અંડર-23 ટીમને 4 વર્ષ કોચિંગ આપ્યું. નાગાલેન્ડની સિનિયર ટીમના બેટિંગ કોચ રહ્યા, જ્યાં ટીમ પ્લેટ ગ્રુપમાંથી એલીટ ગ્રુપમાં પહોંચી. સ્વપ્નિલને BCCIના NCA અસાઇનમેન્ટ પણ મળી રહ્યા છે. તેણે કહ્યું- ક્રિકેટે મને જે આપ્યું છે, તે હું પાછું આપવા માગુ છું. ખેલાડીઓ સાથે મારો અનુભવ શેર કરવો છે. મારું લક્ષ્ય અંડર-19 ઇન્ડિયા અથવા તેનાથી આગળ કોચિંગ કરવાનું છે. મહેનત ચાલુ રહેશે.