ભારતીય હોકી ટીમોએ રવિવારે એશિયન ગેમ્સ 2026માં જીત સાથે અભિયાનની શરૂઆત કરી. કાકામિગાહારામાં મહિલા ટીમે પૂલ-Bની મેચમાં ઉઝબેકિસ્તાનને 19-0થી હરાવ્યું. દીપિકાએ 8 ગોલ કર્યા, જ્યારે ઇશિકાએ હેટ્રિક નોંધાવી. બીજી તરફ, પુરુષ ટીમે પૂલ-Aની મેચમાં ઇન્ડોનેશિયાને 13-1થી હરાવ્યું. ભારત તરફથી દિલપ્રીત સિંહે સૌથી વધુ 4 ગોલ કર્યા. દીપિકા સૌથી વધુ ગોલ કરનાર ખેલાડી બની દીપિકા એશિયન ગેમ્સની એક મહિલા હોકી મેચમાં સૌથી વધુ ગોલ કરનાર ખેલાડી બની ગઈ છે. તેમણે 8મા, 22મા, 25મા, 33મા, 36મા, 38મા, 41મા અને 54મા મિનિટે ગોલ કર્યા. ભારત તરફથી ઇશિકાએ હેટ્રિક નોંધાવી. નવનીત કૌર અને લલથાંતલુઆંગીએ બે-બે ગોલ કર્યા, જ્યારે લાલરેમસિયામી, બલજીત કૌર, નેહા અને સાક્ષી રાણાએ એક-એક ગોલ કર્યો. પહેલાં હાફમાં 8 ગોલ થયા, લાલરેમસિયામીએ ખાતું ખોલ્યું ભારતે શરૂઆતથી જ ઉઝબેકિસ્તાન પર દબાણ બનાવ્યું. લાલરેમસિયામીએ 7મી મિનિટે નજીકથી ફિલ્ડ ગોલ કરીને ભારતનું ખાતું ખોલ્યું. તેના એક મિનિટ બાદ દીપિકાએ ગોલ કરીને ભારતની લીડ બમણી કરી દીધી. ઇશિકાએ 11મી મિનિટે સુનેલિતા ટોપ્પોના પાસ પર ગોલ કર્યો. તેના એક મિનિટ બાદ બલજીત કૌરે ભારતનો ચોથો ગોલ કર્યો. નેહાએ 18મી મિનિટે ફિલ્ડ ગોલ કરીને સ્કોર 5-0 કરી દીધો. દીપિકાએ 22મી મિનિટે પેનલ્ટી કોર્નર પર ડ્રેગ ફ્લિકથી પોતાનો બીજો ગોલ કર્યો. નવનીત કૌરે 23મી મિનિટે ગોલ કર્યો. દીપિકાએ 25મી મિનિટે વધુ એક પેનલ્ટી કોર્નરને ગોલમાં ફેરવીને ભારતને હાફ ટાઈમ સુધી 8-0ની લીડ અપાવી દીધી. બીજા હાફમાં પણ ગોલનો દોર ચાલુ રહ્યો હાફટાઇમ બાદ ભારતે હુમલા વધુ તેજ કરી દીધા. દીપિકાએ 33મી, 36મી, 38મી અને 41મી મિનિટમાં સતત ચાર ગોલ કર્યા. ત્યારબાદ ઇશિકાએ 42મી મિનિટે પોતાનો બીજો ગોલ કર્યો. લલથાંતલુઆંગી અને સાક્ષી રાણાએ 43મી મિનિટે એક-એક ગોલ કર્યો. નવનીત કૌરે 45મી મિનિટે પોતાનો બીજો ગોલ કર્યો. લલથાંતલુઆંગીએ 51મી મિનિટે બીજો ગોલ કર્યો. દીપિકાએ 54મી મિનિટે આઠમો ગોલ કર્યો અને આ જ મિનિટે ઇશિકાએ પણ પોતાનો ત્રીજો ગોલ કરીને ભારતનો સ્કોર 19-0 કરી દીધો. સવિતા પુનિયાની 320મી આંતરરાષ્ટ્રીય મેચ અનુભવી ગોલકીપર સવિતા પુનિયાએ પોતાની 320મી આંતરરાષ્ટ્રીય મેચ રમી. આ સાથે જ તે વંદના કટારિયા સાથે ભારત માટે સૌથી વધુ આંતરરાષ્ટ્રીય મેચ રમનારી મહિલા હોકી ખેલાડીઓમાં સંયુક્ત રીતે ટોચ પર પહોંચી ગઈ છે. ઉઝબેકિસ્તાનની ટીમ સમગ્ર મેચ દરમિયાન ભારતીય ગોલ સામે વધુ તકો ઊભી કરી શકી નહીં. ભારતે બોલ પર પોતાનું વર્ચસ્વ જાળવી રાખ્યું અને સતત આક્રમણ કર્યા.