યુએસ રાષ્ટ્રપતિ ડોનાલ્ડ ટ્રમ્પે દાવો કર્યો કે ઈરાન યુદ્ધ બંધ કરવાનો કરાર ‘લગભગ ફાઇનલ’ થઈ ચૂક્યો છે. બંને દેશો વચ્ચે હજુ અંતિમ પ્રક્રિયાઓ પર કામ ચાલી રહ્યું છે. ખાડી દેશોના નેતાઓ અને ઇઝરાયલી વડાપ્રધાન સાથે વાતચીત બાદ આ કરાર ફાઇનલ થઈ રહ્યો છે. ટ્રમ્પે કહ્યું કે કરાર હેઠળ સ્ટ્રેટ ઓફ હોર્મુઝને ફરીથી ખોલવામાં આવશે. આ તે જ દરિયાઈ માર્ગ છે જ્યાંથી દુનિયાની કુલ તેલ સપ્લાયનો લગભગ પાંચમો ભાગ પસાર થાય છે. આ સમાચાર આવ્યા બાદ હવે સોમવારે ક્રૂડ ઓઇલની કિંમતોમાં ઘટાડો આવી શકે છે. ટ્રમ્પે ઓવલ ઓફિસથી ઘણા દેશોના નેતાઓ સાથે વાત કરી રાષ્ટ્રપતિ ટ્રમ્પે ઓવલ ઓફિસથી એક સંયુક્ત કોલ કર્યો. જેમાં તેમણે મુસ્લિમ દેશોના નેતાઓ સાથે વાત કરી. ઈરાનને અમેરિકા પર ભરોસો નથી, કહ્યું- વલણ બદલી નાખે છે એક તરફ જ્યાં પાકિસ્તાની પ્રતિનિધિમંડળ મતભેદો ઘટાડવા માટે તેહરાનમાં છે, ત્યાં ઈરાને ટ્રમ્પ પ્રશાસનની વિશ્વસનીયતા પર શંકા વ્યક્ત કરી છે. ઈરાની વિદેશ મંત્રાલયના પ્રવક્તા ઈસ્માઈલ બકાઈએ કહ્યું, “અમે કહી શકીએ કે અમે સમજૂતીથી બહુ દૂર પણ છીએ અને ખૂબ નજીક પણ. અમારી પાસે અમેરિકી પક્ષનો જૂનો અનુભવ છે, જે પોતાની જ વાતોનું ખંડન કરે છે અને વલણ બદલી નાખે છે. અમે સંપૂર્ણપણે ખાતરી આપી શકતા નથી કે તેમનો આ દૃષ્ટિકોણ ફરી નહીં બદલાય.” ન્યુક્લિયર પ્રોગ્રામ જેવા વિવાદાસ્પદ મુદ્દાઓ પર સ્થિતિ સ્પષ્ટ નથી ટ્રમ્પે યુદ્ધ સમાપ્ત કરવા અંગે અગાઉ પણ ઘણા દાવા કર્યા છે, પરંતુ આ વખતે પણ તે સ્પષ્ટ નથી કે ઈરાનના પરમાણુ કાર્યક્રમનો કોઈ ઉકેલ આવ્યો છે કે નહીં. 28 ફેબ્રુઆરીએ શરૂ થયું હતું યુદ્ધ, એપ્રિલમાં થયું હતું સીઝફાયર મિડલ ઇસ્ટમાં આ વિવાદ ત્યારે વધ્યો હતો, જ્યારે 28 ફેબ્રુઆરીએ અમેરિકા અને ઇઝરાયલે મળીને ઇરાન પર મોટા હવાઈ હુમલા કર્યા હતા. તેના જવાબમાં ઇરાને પણ ઇઝરાયલ અને ખાડી દેશોમાં હાજર અમેરિકી ઠેકાણાઓ પર હુમલા કર્યા. ત્યારબાદ એપ્રિલની શરૂઆતમાં બંને દેશો યુદ્ધવિરામ માટે રાજી થયા અને ત્યારથી પડદા પાછળથી શાંતિ સમજૂતીની વાતચીત ચાલી રહી છે. હોર્મુઝ સ્ટ્રેટ ખુલવાથી ક્રૂડ ઓઇલના ભાવ ઘટી શકે છે આ યુદ્ધને કારણે ઇરાને સ્ટ્રેટ ઓફ હોર્મુઝ બંધ કરી દીધું હતું. આ દરિયાઈ માર્ગ દુનિયા માટે લાઇફલાઇન જેવો છે, કારણ કે વૈશ્વિક સ્તરે કુલ તેલ સપ્લાયનો લગભગ પાંચમો (20%) ભાગ આ માર્ગેથી પસાર થાય છે. આ માર્ગ ફરીથી ખુલવાની આશાથી જ ક્રૂડ ઓઇલના બજારોમાં નરમાઈના સંકેતો મળવા લાગ્યા છે. 28 ફેબ્રુઆરીએ જ્યારે યુદ્ધ શરૂ થયું ત્યારે ક્રૂડ ઓઇલ 70 ડોલર પ્રતિ બેરલની આસપાસ ચાલી રહ્યું હતું. માર્ચ-એપ્રિલ સુધીમાં ભાવ વધીને 120 ડોલર પ્રતિ બેરલ સુધી પહોંચી ગયા. પછી યુદ્ધવિરામની જાહેરાત બાદ ભાવમાં ઉતાર-ચઢાવ રહ્યો અને તે 100 ડોલરથી નીચે આવી ગયા. હાલમાં બ્રેન્ટ ક્રૂડ ઓઇલ 103 ડોલર પ્રતિ બેરલની આસપાસ છે.