અમેરિકાના રાષ્ટ્રપતિ ડોનાલ્ડ ટ્રમ્પે એટલાન્ટિક અથવા પેસિફિક મહાસાગરનું નામ બદલીને ‘ટ્રમ્પ ઓશન’ અથવા ‘ઓશન ઓફ ધ અમેરિકા’ રાખવાનું સૂચન કર્યું છે. ટ્રમ્પે શનિવારે એક ચૂંટણી રેલી દરમિયાન કહ્યું કે 2028માં પોતાનો કાર્યકાળ પૂરો થાય તે પહેલાં તેઓ એક મહાસાગર અને એક મોટી નદીનું નામ બદલવા માંગે છે. તેમની આ વાત પર રેલીમાં હાજર લોકો હસવા લાગ્યા અને તાળીઓ પાડવા લાગ્યા. જોકે, તેમણે મહાસાગરનું નામ બદલવાનો કોઈ ઔપચારિક સત્તાવાર રજૂ કર્યો નથી. આ પહેલાં પણ ટ્રમ્પ પોતાના નામ પરથી અનેક સ્થળોનાં નામ રાખવાનું સૂચન કરી ચૂક્યા છે. તેમણે પોતાના સોશિયલ મીડિયા પર પોસ્ટ કરીને ઘણી વખત હોર્મુઝ સ્ટ્રેટને અમેરિકન વિસ્તાર ગણાવતા પૂછ્યું છે કે શું તેનું નામ બદલીને ‘ટ્રમ્પ સ્ટ્રેટ’ કરી દેવું જોઈએ. ટ્રમ્પ અગાઉ પણ અનેક સ્થળોનાં નામ બદલી ચૂક્યા છે ટ્રમ્પ અગાઉ પણ અમેરિકામાં અનેક સ્થળોનાં નામ બદલવા અથવા બદલવાનું સૂચન કરવા બદલ ચર્ચામાં રહ્યા છે. ગયા વર્ષે તેમણે મેક્સિકોના અખાતનું નામ બદલીને ‘ગલ્ફ ઓફ અમેરિકા’ કરી દીધું હતું. આ નિર્ણય બાદ મેક્સિકો સાથે રાજદ્વારી તણાવ વધી ગયો હતો. આ નામને લઈને ટ્રમ્પ પ્રશાસન અને અમેરિકન સમાચાર એજન્સી એસોસિયેટેડ પ્રેસ (એપી) વચ્ચે પણ વિવાદ થયો હતો. એપીએ ખાડીના નવા નામનો દરેક જગ્યાએ ઉપયોગ કરવાનો ઇનકાર કર્યો હતો. ત્યાર બાદ રાષ્ટ્રપતિના કાર્યક્રમોમાં એજન્સીની પહોંચને લઈને પ્રશાસન અને એપી વચ્ચે કાનૂની લડાઈ શરૂ થઈ ગઈ હતી. આ વર્ષે ઑગસ્ટમાં ટ્રમ્પે અમેરિકાના ન્યૂયોર્ક રાજ્ય અને કેનેડા વચ્ચે આવેલા લેક ઑન્ટારિયોનું નામ બદલીને ‘લેક અમેરિકા’ કરી દીધું હતું. ‘ધ વૉશિંગ્ટન પોસ્ટ’ અનુસાર, આ નિર્ણય કેનેડાના નેતાઓ સાથે વેપાર અને ટૅરિફને લઈને ચાલી રહેલા તણાવ વચ્ચે આવ્યો હતો. ટ્રમ્પે અમેરિકાના ન્યૂ મેક્સિકો રાજ્યનું નામ બદલીને ‘ન્યૂ અમેરિકા’ રાખવાનું સૂચન પણ કર્યું હતું. ગયા મહિને તેમણે આ વિચાર રજૂ કર્યો હતો. જોકે, બાદમાં તેમણે કહ્યું હતું કે આ અંગેનો નિર્ણય રાજ્યના લોકોએ જ લેવો પડશે. ‘ધ વૉશિંગ્ટન પોસ્ટ’ અનુસાર, ન્યૂ મેક્સિકોમાં રિપબ્લિકન પાર્ટીના એક ઉમેદવારના સમર્થનમાં વીડિયો સંદેશ આપતાં ટ્રમ્પે કહ્યું હતું, “હું આ અંગે આગ્રહ નહીં રાખું, પરંતુ ઘણા લોકોને આ નામ ખૂબ પસંદ છે.”