વર્તમાન સમયમાં ટેકનોલોજી માત્ર કામકાજ પૂરતી મર્યાદિત નથી રહી, પરંતુ તે હવે આપણા બેડરૂમ અને અંગત સંબંધો સુધી પહોંચી ગઈ છે. એક ચોંકાવનારા અહેવાલ મુજબ, માનવીય સંબંધોનું ભવિષ્ય હવે માણસો નહીં પણ AI નક્કી કરી રહ્યું હોય તેવું લાગી રહ્યું છે. ભાવનાત્મક ટેકા અને અંગત વિવાદો ઉકેલવા માટે લોકો હવે પરિવાર કે મિત્રોને બદલે ચેટબોટ્સ તરફ વળી રહ્યા છે, જેની નકારાત્મક અસર લગ્ન જીવન પર જોવા મળી રહી છે.

અગાઉ જ્યારે પતિ-પત્ની વચ્ચે વિવાદ થતો, ત્યારે વડીલો કે મિત્રો મધ્યસ્થી કરતા હતા. પરંતુ હવે લોકો પોતાની ખાનગી વાતો ડિજિટલ સ્પેસમાં શેર કરવાનું વધુ પસંદ કરે છે. ‘ફ્યુચરિઝમ’ અને ‘ધ વીક’ના અહેવાલ મુજબ, ચેટબોટ્સ ઘણા સંબંધોમાં “ત્રીજો અવાજ” બની રહ્યા છે. લોકો ચેટબોટના પ્રતિભાવોને નિષ્પક્ષ સલાહ માનીને તેને અંતિમ સત્ય સ્વીકારી લે છે. ભારતમાં પણ આ પ્રવાહ દેખાવા લાગ્યો છે. પ્રખ્યાત ડિવોર્સ લોયર વંદના શાહના જણાવ્યા મુજબ, હવે એવા કિસ્સાઓ સામે આવે છે જેમાં ક્લાયન્ટ્સ કહે છે કે, “ચેટબોટના મતે હવે આ સંબંધમાં કશું બચ્યું નથી.”

વાસ્તવિક સમસ્યા AIની કામ કરવાની પદ્ધતિમાં છે. ટેકનોલોજી નિષ્ણાત સાયરસ જોન સમજાવે છે કે મોટાભાગના AI મોડલ્સ યુઝરને ખુશ કરવા અથવા તેમની વાતો સાથે સહમત થવા માટે ડિઝાઇન કરવામાં આવ્યા હોય છે. જો કોઈ વ્યક્તિ તેના જીવનસાથીની બુરાઈ કરીને સલાહ માંગે છે, તો મશીન અપૂર્ણ માહિતીના આધારે તે વ્યક્તિની તરફેણમાં જવાબ આપે છે. આનાથી વ્યક્તિને લાગે છે કે પોતે જ સાચો છે, જેના કારણે સમજૂતીની તક ઘટી જાય છે અને વિખવાદ વધે છે. મશીનો પાસે માનવીય સંવેદના કે ‘વાર્તાની બીજી બાજુ’ જોવાની દ્રષ્ટિ હોતી નથી.

દિલ્હીના કાઉન્સેલર્સનું માનવું છે કે ચેટબોટ્સ સાથે વાત કરવી સરળ છે અને તેમાં કોઈ જજમેન્ટનો ડર હોતો નથી, તેથી લોકો આકર્ષાય છે. પરંતુ, વાસ્તવિક કાઉન્સેલિંગ દરેક પાસાને ધ્યાનમાં લે છે જે મશીન કરી શકતું નથી. જોકે કાયદેસર રીતે હજુ સુધી કોઈ ચેટબોટને સંબંધ તોડવા માટે સીધો જવાબદાર ઠેરવી શકાયો નથી, પરંતુ તેના કારણે જો કોઈ વ્યક્તિના વર્તનમાં ફેરફાર આવે અથવા તે ભાવનાત્મક નુકસાન પહોંચાડે, તો તેને માનસિક ક્રૂરતા ગણી શકાય.

Disclaimer: આ માહિતી સંશોધન અભ્યાસો અને નિષ્ણાતના મંતવ્ય પર આધારિત છે. તબીબી સલાહનો ઉપયોગ કરશો નહીં. કોઈપણ નવી પ્રવૃત્તિ અથવા કસરત શરૂ કરતા પહેલા હંમેશા તમારા ડૉક્ટર અથવા સંબંધિત નિષ્ણાતની સલાહ લો.