લખનઉ સુપર જાયન્ટ્સે IPL 2026ની 59મી મેચમાં ચેન્નઈ સુપર કિંગ્સને 7 વિકેટે હરાવ્યું. ઇકાના સ્ટેડિયમમાં લખનઉએ 188 રનનો ટાર્ગેટ 16.4 ઓવરમાં જ હાંસલ કરી લીધો. મેચમાં અંશુલ કંબોજના બે અલગ-અલગ ઓવરમાં સતત 4-4 સિક્સર લાગી. પહેલા મિચેલ માર્શે પાવરપ્લેમાં અંશુલની ઓવરમાં 28 રન બનાવ્યા, પછી નિકોલસ પૂરને 17મી ઓવરની ચારેય બોલ પર સિક્સર ફટકારીને મેચ પૂરી કરી દીધી. જ્યારે, ફાસ્ટ બોલર આકાશ સિંહે 3 વિકેટ લીધા બાદ ખિસ્સામાંથી પર્ચી કાઢીને ઉજવણી કરી. લખનઉ-પંજાબ મેચની ટોપ મોમેન્ટ્સ-રેકોર્ડ્સ… 1. અંશુલે ચેન્નઈ માટે બીજો સૌથી મોંઘો સ્પેલ ફેંક્યો ફાસ્ટ બોલર અંશુલ કંબોજે ચેન્નઈ માટે બીજો સૌથી મોંઘો સ્પેલ ફેંક્યો. તેણે 2.4 ઓવરમાં 63 રન આપ્યા. IPLમાં ત્રણ કે તેથી ઓછી ઓવર ફેંકીને 60+ રન આપનાર તે બીજો બોલર બન્યો. તે પહેલા ખલીલ અહેમદે 2025માં RCB સામે 3 ઓવરમાં 65 રન આપ્યા હતા. અંશુલની 16માંથી 11 બોલ પર ચોગ્ગો કે છગ્ગો લાગ્યો. એટલે કે તેના 68.75% બોલ બાઉન્ડ્રી માટે ગયા. IPL ઇતિહાસમાં ઓછામાં ઓછા 2 ઓવરના સ્પેલમાં તેનાથી ખરાબ બાઉન્ડ્રી ટકાવારી માત્ર વોશિંગ્ટન સુંદરની રહી છે, જેના 2024માં દિલ્હી સામે 12માંથી 10 બોલ પર બાઉન્ડ્રી લાગી હતી. 2. માર્શે LSG માટે આ સિઝનમાં 31 છગ્ગા ફટકાર્યા મિચેલ માર્શ IPL 2026માં લખનઉ સુપર જાયન્ટ્સ માટે સૌથી વધુ છગ્ગા ફટકારનારા બેટ્સમેનોની યાદીમાં ચોથા સ્થાને પહોંચી ગયા છે. તેના નામે હવે 31 છગ્ગા થઈ ગયા છે. LSG માટે એક સિઝનમાં સૌથી વધુ છગ્ગા ફટકારવાનો રેકોર્ડ નિકોલસ પૂરનના નામે છે, જેમણે 2025માં 40 છગ્ગા ફટકાર્યા હતા. 3. માર્શ-ઇંગ્લિસે લખનઉ માટે ત્રીજી સૌથી મોટી ભાગીદારી કરી મિચેલ માર્શ અને જોશ ઇંગ્લિસે ચેન્નઈ સામે 135 રનની ભાગીદારી કરી. આ લખનઉ માટે IPLમાં કોઈપણ વિકેટ માટે ત્રીજી સૌથી મોટી ભાગીદારી છે. LSG માટે સૌથી મોટી ભાગીદારીનો રેકોર્ડ ક્વિન્ટન ડી કોક અને કેએલ રાહુલના નામે છે. બંનેએ 2022માં KKR સામે 210 રનની અણનમ ભાગીદારી કરી હતી. 4. પૂરન LSG માટે સૌથી વધુ આઉટફિલ્ડ કેચ લેનાર ફિલ્ડર લખનૌના નિકોલસ પૂરન ટીમ માટે સૌથી વધુ આઉટફિલ્ડ કેચ લેનાર ખેલાડી બની ગયા છે. તેમના નામે હવે 21 કેચ થઈ ગયા છે. તેમણે આ મામલે દીપક હુડ્ડા અને રવિ બિશ્નોઈને પાછળ છોડ્યા છે, જેમના નામે 20-20 કેચ છે. 5. CSK એ આ સિઝનમાં 21 ખેલાડીઓને તક આપી ચેન્નાઈએ IPL 2026માં તેના પ્લેઈંગ કોમ્બિનેશનમાં સતત ફેરફારો કર્યા છે. લખનઉ સામેની મેચમાં સ્પેન્સર જોન્સનને તક મળી, જે આ સિઝનમાં CSK માટે રમનાર 21મો ખેલાડી બન્યો. આ મામલે માત્ર લખનઉ સુપર જાયન્ટ્સ અને મુંબઈ ઈન્ડિયન્સે ચેન્નાઈ કરતાં વધુ ખેલાડીઓનો ઉપયોગ કર્યો છે. 6. અંશુલે પાવરપ્લેમાં CSK માટે સૌથી મોંઘી ઓવર ફેંકી ચેન્નાઈના ઝડપી બોલર અંશુલ કંબોજની એક ઓવરમાં મિચેલ માર્શે 28 રન ફટકાર્યા. આ સાથે જ IPL ઇતિહાસમાં પાવરપ્લે દરમિયાન CSK બોલરનો આ સૌથી મોંઘી ઓવર બની. આ પહેલા 2024માં મુકેશ ચૌધરીએ સનરાઈઝર્સ હૈદરાબાદ સામે બીજી ઓવરમાં 27 રન આપ્યા હતા. આ ઉપરાંત, માર્શે આ ઓવરમાં 28 રન બનાવીને લખનઉ સુપર જાયન્ટ્સ માટે IPLમાં એક ઓવરમાં સૌથી વધુ રન બનાવવાની બરાબરી પણ કરી લીધી. આ પહેલા નિકોલસ પૂરને 2025માં વિશાખાપટ્ટનમમાં ટ્રિસ્ટન સ્ટબ્સની ઓવરમાં 28 રન બનાવ્યા હતા. ટોપ-7 મોમેન્ટ્સ… 1. બંને ટીમો કાળી પટ્ટી પહેરીને મેદાન પર ઉતરી ઉત્તર પ્રદેશમાં આવેલા વાવાઝોડામાં જીવ ગુમાવનારા લોકોને શ્રદ્ધાંજલિ આપવા માટે મેચ શરૂ થતા પહેલા એક મિનિટનું મૌન પાળવામાં આવ્યું. સન્માનના પ્રતીક રૂપે બંને ટીમના ખેલાડીઓ અને મેચ ઓફિશિયલ્સ કાળી પટ્ટી બાંધીને મેદાન પર ઉતર્યા. 2. સંજુએ પહેલી ઓવરમાં 3 ચોગ્ગા ફટકાર્યા ચેન્નઈના સંજુ સેમસને મોહમ્મદ શમીની પહેલી ઓવરમાં ત્રણ ચોગ્ગા ફટકાર્યા. ઓવરના બીજા બોલ પર સંજુએ કવર ઉપર શાનદાર ડ્રાઇવ લગાવીને પહેલો ચોગ્ગો ફટકાર્યો. આ પછી ચોથા બોલ પર તેણે ઓફ સાઇડમાં દમદાર શોટ રમ્યો. પાંચમા બોલ પર સંજુને થોડો નસીબનો સાથ પણ મળ્યો, જ્યારે બોલ બેટનો અંદરનો કિનારો લઈને ફાઇન લેગ બાઉન્ડ્રી સુધી પહોંચી ગયો. 3. આકાશે 3 વિકેટ લઈને ત્રણ વખત કાઢી પર્ચી લખનૌના ઝડપી બોલર આકાશ સિંહે શાનદાર સ્પેલ નાખતા ઋતુરાજ ગાયકવાડ, સંજુ સેમસન અને ઉર્વિલ પટેલને આઉટ કર્યા. દરેક વિકેટ પછી આકાશે ખિસ્સામાંથી ચિઠ્ઠી કાઢીને ઉજવણી કરી. ચિઠ્ઠી પર લખ્યું હતું- “આકાશ જાણે છે કે તેને T20માં વિકેટ કેવી રીતે લેવી.” 3.5 ઓવરમાં આકાશે હાર્ડ લેન્થ બોલ પર ગાયકવાડને પુલ શોટ રમવા મજબૂર કર્યા. બોલ બેટના ઉપરના ભાગે લાગ્યો અને મિડ-ઓન પર કેચ આઉટ થયો. ત્યારબાદ 5.3 ઓવરમાં તેણે સંજુ સેમસનનો ડીપ સ્ક્વેર લેગ પર કેચ કરાવ્યો. પછી 7.2 ઓવરમાં આકાશે ઉર્વિલ પટેલને પણ પેવેલિયન ભેગો કરી દીધો. શોર્ટ બોલ પર ઉર્વિલે પુલ શોટ રમ્યો, પરંતુ બોલ સીધો ડીપ મિડવિકેટ પર ઉભેલા માર્કરમના હાથમાં ગયો. ત્રીજી વિકેટ લેતા જ આકાશે ફરીથી ચિઠ્ઠી કાઢીને ઉજવણી કરી. 4. કાર્તિકની સિક્સથી ફિફ્ટી ચેન્નઈના બેટ્સમેન કાર્તિક શર્માએ સિક્સ લગાવીને અડધી સદી પૂરી કરી. 14.2 ઓવરમાં મોહમ્મદ શમીએ ઓફ સ્ટમ્પની બહાર સ્લોઅર ફુલ બોલ નાખ્યો, જેને કાર્તિકે ફ્રન્ટ ફૂટ પર આવીને એક્સ્ટ્રા કવર ઉપરથી શાનદાર છગ્ગો ફટકાર્યો. 5. માર્શે સતત ચાર છગ્ગા ફટકાર્યા લખનૌના બેટ્સમેન મિચેલ માર્શે 5મી ઓવરમાં સતત 4 સિક્સર ફટકારી. અંશુલની બોલ પર પહેલી સિક્સ કવર ઉપરથી આવી, જ્યારે પછીની ત્રણ બોલ પર તેણે ડીપ મિડવિકેટ અને ડીપ સ્ક્વેર લેગની દિશામાં પુલ શોટ માર્યા. ઓવરની છેલ્લી બોલ પર માર્શે ચોગ્ગો ફટકારીને ઓવરમાં કુલ 28 રન બનાવ્યા. 6. મુકેશના હાથને અડીને માર્શ રનઆઉટ ચેન્નઈને 11.5 ઓવરમાં નસીબના સહારે મોટી વિકેટ મળી. મુકેશ ચૌધરીની ફુલ લેન્થ બોલ પર નિકોલસ પૂરને સીધો શોટ માર્યો, પરંતુ બોલ મુકેશના હાથને અડીને નોન-સ્ટ્રાઈકર એન્ડના સ્ટમ્પ પર લાગ્યો. મિચેલ માર્શ ક્રીઝની બહાર હતા અને રનઆઉટ થઈ ગયા. માર્શે 38 બોલમાં 90 રનની ઇનિંગ રમી, જેમાં 9 ચોગ્ગા અને 7 છગ્ગા સામેલ હતા. 7. પૂરને અંશુલની ઓવરમાં સતત 4 સિક્સર ફટકારી લખનૌના બેટ્સમેન નિકોલસ પૂરને અંશુલ કમ્બોજની ઓવરમાં સતત ચાર છગ્ગા ફટકારીને મેચ પૂરી કરી. 17મી ઓવરની ચારેય બોલ પર પૂરને બોલને બાઉન્ડ્રી પાર પહોંચાડ્યો. 16.1 ઓવરમાં તેણે 101 મીટર લાંબો છગ્ગો ફટકાર્યો. આગળના બોલ પર ડીપ મિડવિકેટ બાઉન્ડ્રી પર કાર્તિક શર્માએ તેનો કેચ છોડી દીધો અને બોલ છગ્ગા માટે જતો રહ્યો. આ પછી પૂરને સતત બે વધુ સિક્સર ફટકારીને મેચ પૂરી કરી. અંશુલ કમ્બોજ માટે આ ખૂબ જ ખરાબ દિવસ રહ્યો. તેણે 2.4 ઓવરમાં 63 રન આપ્યા. ——————————————– IPL સંબંધિત આ સમાચાર પણ વાંચો… સતત ત્રણ મેચ જીત્યા પછી ચેન્નઈ હાર્યું:લખનઉએ 7 વિકેટે મેચ જીતી, મિચેલ માર્શે 90 રન ફટકાર્યા; આકાશ સિંહે 3 વિકેટ ઝડપી લખનઉ સુપર જાયન્ટ્સે શાનદાર બેટિંગનું પ્રદર્શન કરતા ચેન્નઈ સુપર કિંગ્સને 7 વિકેટે પરાજય આપ્યો છે. લખનઉએ 188 રનનો ટાર્ગેટ 3 વિકેટના નુકસાને માત્ર 16.4 ઓવરમાં જ ચેઝ કરી લીધો હતો. લખનઉના એકાના સ્ટેડિયમમાં રમાયેલી આ મેચમાં લખનઉએ ટૉસ જીતીને પહેલા બોલિંગ કરવાનો નિર્ણય કર્યો હતો. ચેન્નઈએ નિર્ધારિત 20 ઓવરમાં 5 વિકેટ ગુમાવીને 187 રન બનાવ્યા હતા, જેના જવાબમાં લખનઉએ આક્રમક રમત બતાવીને સરળતાથી જીત મેળવી હતી. વાંચો સંપૂર્ણ સમાચાર