દેશમાં લિક્વિફાઇડ નેચરલ ગેસ એટલે કે LNG નો પુરવઠો હવે સામાન્ય થઈ ગયો છે. કેન્દ્ર સરકારે અમેરિકા-ઇઝરાયલ અને ઇરાન યુદ્ધ દરમિયાન દેશમાં લાગુ કરાયેલા ‘ઇમરજન્સી નેચરલ ગેસ સપ્લાય રેગ્યુલેશન ઓર્ડર’ ના આદેશો પાછા ખેંચી લીધા છે. LNGનો ઉપયોગ ઉદ્યોગોમાં વધુ થાય છે, તેથી આ નિર્ણયથી ઉદ્યોગોને રાહત મળશે. આ નિર્ણય પશ્ચિમ એશિયામાં યુદ્ધવિરામ (સીઝફાયર) થવા અને ‘સ્ટ્રેટ ઓફ હોર્મુઝ’ માંથી લિક્વિફાઇડ નેચરલ ગેસ (LNG) ના જહાજોની અવરજવર ફરીથી સામાન્ય થયા પછી લેવામાં આવ્યો છે. પેટ્રોલિયમ અને નેચરલ ગેસ મંત્રાલયે આ સંબંધમાં શનિવારે નવું નોટિફિકેશન બહાર પાડ્યું છે. હોર્મુઝ રૂટ બંધ થવાથી સપ્લાય સંકટ આવ્યું, 9 માર્ચે ઇમરજન્સી ઓર્ડર લાગુ થયો હતો પેટ્રોલિયમ મંત્રાલયે જણાવ્યું કે 28 ફેબ્રુઆરીએ ઈરાન પર અમેરિકા અને ઈઝરાયલના હુમલાઓ અને ત્યારબાદ ઈરાનની જવાબી કાર્યવાહીને કારણે સ્ટ્રેટ ઓફ હોર્મુઝથી ગેસ અને તેલનો સપ્લાય સંપૂર્ણપણે ઠપ થઈ ગયો હતો. ત્યારબાદ ઘણા વિદેશી સપ્લાયર્સે ભારત આવતા ગેસ કાર્ગોને રોકી દીધા હતા અથવા અન્ય દેશો તરફ ડાયવર્ટ કરી દીધા હતા. આ સંકટનો સામનો કરવા માટે સરકારે 9 માર્ચ 2026ના રોજ એસેન્શિયલ કોમોડિટીઝ એક્ટ એટલે કે આવશ્યક વસ્તુ અધિનિયમ હેઠળ દેશમાં ગેસ સપ્લાયને નિયંત્રિત કરવા માટે કટોકટીનો આદેશ જારી કર્યો હતો. સંકટ ટળ્યા પછી સરકારે તમામ 3 ઇમરજન્સી નિર્ણયો પાછા ખેંચ્યા LNG સપ્લાય પરનો પ્રતિબંધ હટાવવો એ સરકારનું ત્રીજું મોટું પગલું છે. આ પહેલાં સરકાર બે અન્ય કટોકટીના નિર્ણયો પાછા ખેંચી ચૂકી છે. ભારત માટે શા માટે ખતરનાક છે હોર્મુઝ રૂટનું બંધ થવું? ભારત વિશ્વનો ત્રીજો સૌથી મોટો તેલ આયાતકાર અને ઉપભોક્તા દેશ છે. ભારત તેની જરૂરિયાતનો લગભગ 88% ક્રૂડ ઓઇલ અને લગભગ 50% નેચરલ ગેસ (LNG) અન્ય દેશો પાસેથી ખરીદે છે. ભારતના કુલ ક્રૂડ ઓઇલ ઇમ્પોર્ટનો 40-45% અને કુલ LNG સપ્લાયનો લગભગ 65% હિસ્સો પશ્ચિમ એશિયા એટલે કે ખાડી દેશોમાંથી આવે છે. મોટાભાગનો LNG કતારથી આવે છે, જેના જહાજોને સ્ટ્રેટ ઓફ હોર્મુઝમાંથી પસાર થવું પડે છે. આ જ કારણ છે કે આ રૂટ પર સહેજ પણ તણાવ થતાં જ ભારતમાં ઇંધણ સંકટનું જોખમ તોળાવા લાગે છે.