અફઘાનિસ્તાને બાંગ્લાદેશ સામે હારેલી ટેસ્ટ મેચ ડ્રો કરાવી. અબુ ધાબીમાં અફઘાનિસ્તાને બીજી ઇનિંગ્સમાં 142 ઓવર બેટિંગ કરી અને 8 વિકેટે 346 રન બનાવ્યા. બાંગ્લાદેશે પ્રથમ ઇનિંગ્સમાં 106 રનની લીડ લીધા બાદ બીજી ઇનિંગ્સ 7 વિકેટે 372 રન બનાવીને ડિક્લેર કરી હતી અને અફઘાનિસ્તાન સામે 479 રનનો લક્ષ્યાંક રાખ્યો હતો. સેદીકુલ્લાહ અટલે મંગળવારે સદી ફટકારી. તેણે 111 રનની ઇનિંગ્સ રમી. કૈસ અહમદે દિવસના છેલ્લા બોલ પર સિક્સ ફટકારી. તે 49 રન બનાવીને નોટઆઉટ રહ્યો. સેદીકુલ્લાહ અટલે 8 કલાક અને 34 મિનિટ સુધી બેટિંગ કરી છેલ્લી એક કલાકમાં બાંગ્લાદેશે તકો ગુમાવી બાંગ્લાદેશ પાસે મેચના છેલ્લા દિવસે અફઘાનિસ્તાનને ઓલઆઉટ કરવા માટે આખો દિવસ હતો. ટીમે બીજી ઇનિંગ્સમાં 142 ઓવર બોલિંગ કરી, પરંતુ અંતિમ બે વિકેટ મેળવી શકી નહીં. છેલ્લાં સેશનમાં કેચ અને રનઆઉટની તકો ગુમાવવી બાંગ્લાદેશને ભારે પડી. બાંગ્લાદેશના કેપ્ટન નઝમુલ હુસૈન શાંતો એ સ્વીકાર્યું કે તેની ટીમ નિરાશ છે, કારણ કે બોલરોએ તકો ઊભી કરી હતી, પરંતુ તેને વિકેટમાં ફેરવી શક્યો નહીં. તેણે કહ્યું કે અફઘાનિસ્તાને શાનદાર બેટિંગ કરી અને તેની ટીમે આ મેચમાંથી શીખવાની જરૂર છે. અફઘાનિસ્તાનના કેપ્ટન રહમત શાહે આ ડ્રોને જીત સમાન ગણાવ્યો. તેણે કહ્યું કે ટીમે પાંચ દિવસ સુધી બેટિંગ અને બોલિંગમાં પોતાની યોજનાને અમલમાં મૂકી. પ્રથમ ઇનિંગ્સમાં રહમત શાહની સદી બાંગ્લાદેશે ટૉસ જીતીને પહેલા બેટિંગ કરી અને પ્રથમ ઇનિંગ્સમાં 92.3 ઓવરમાં 346 રન બનાવ્યા. તન્ઝીદ હસન તમીમે 71 બોલમાં 83 રન બનાવ્યા, જ્યારે શાદમાન ઇસ્લામે 111 બોલમાં 67 રનની ઇનિંગ્સ રમી. બંનેએ પ્રથમ વિકેટ માટે 124 રનની ભાગીદારી કરી. મુમિનુલ હકે 39 રન બનાવ્યા અને લિટન દાસે 89 બોલમાં 53 રનનું યોગદાન આપ્યું. નીચલા ક્રમમાં નઈમ હસન 35 રન બનાવીને અણનમ રહ્યો. અફઘાનિસ્તાન તરફથી મોહમ્મદ સલીમ સફીએ 82 રન આપીને ચાર વિકેટ ઝડપી. યામિન અહમદઝાઈએ ત્રણ અને ઇસ્મત આલમે બે વિકેટ મેળવી. જવાબમાં અફઘાનિસ્તાનની પ્રથમ ઇનિંગ્સ 89.1 ઓવરમાં 240 રનમાં સમેટાઈ ગઈ. કેપ્ટન રહમત શાહે 216 બોલમાં 105 રન બનાવીને સંઘર્ષ કર્યો. અબ્દુલ મલિકે 120 બોલમાં 62 રન બનાવ્યા. બંનેએ ત્રીજી વિકેટ માટે 70 રનની ભાગીદારી કરી, પરંતુ અન્ય બેટર્સ મોટી ભાગીદારી કરી શક્યા નહીં. બાંગ્લાદેશના હસન મહમૂદે પાંચ વિકેટ ઝડપી અને આ દરમિયાન હેટ્રિક પણ મેળવી. એબાદત હુસૈને ચાર વિકેટ ઝડપી. લિટન દાસની સદીથી બાંગ્લાદેશે 372/7ના સ્કોર પર ઇનિંગ ડિક્લેર કરી બીજા દાવમાં બાંગ્લાદેશે 105.2 ઓવરમાં 7 વિકેટે 372 રન બનાવીને દાવ ડિકલેર કર્યો. લિટન દાસે 117 બોલમાં 102 રન બનાવ્યા. તેની ઇનિંગ્સમાં 14 ચોગ્ગા સામેલ હતા. કેપ્ટન નઝમુલ હુસૈન શાંતોએ 191 બોલમાં 82 રન અને મુશફિકુર રહીમે 148 બોલમાં 81 રન બનાવ્યા. મેહદી હસન મિરાજ 97 બોલમાં 52 રન બનાવીને અણનમ રહ્યો. શાંતો અને મુશફિકુરે ચોથા વિકેટ માટે 159 રનની ભાગીદારી કરી. ત્યારબાદ લિટને મેહદી સાથે સાતમા વિકેટ માટે 149 રન જોડ્યા. આ ઇનિંગ્સની મદદથી બાંગ્લાદેશે અફઘાનિસ્તાન સામે 479 રનનો મુશ્કેલ ટાર્ગેટ મૂક્યો. અફઘાનિસ્તાન માટે યામિન અહમદઝાઈ અને મોહમ્મદ સલીમ સફીએ બે-બે વિકેટ લીધી. જિયા-ઉર-રહમાન અકબરે પણ બે વિકેટ ઝડપી, જ્યારે કાઈસ અહમદને એક વિકેટ મળી. લિટન દાસ પ્લેયર ઑફ ધ મેચ, વિકેટકીપિંગમાં પણ બનાવ્યો રેકોર્ડ લિટન દાસને મેચમાં 53 અને 102 રનની ઇનિંગ્સ સાથે વિકેટ પાછળ 8 કેચ પકડવા બદલ પ્લેયર ઑફ ધ મેચ તરીકે પસંદ કર્યો. આ મુકાબલામાં તેણે એક ટેસ્ટમાં 150 રન બનાવવાનો અને વિકેટકીપર તરીકે નવ ડિસમિસલ કરવાનો રેકોર્ડ બનાવ્યો. તે આવું કરનાર પ્રથમ વિકેટકીપર બન્યો.