પૂર્વ ભારતીય ક્રિકેટર વસીમ જાફરે વિરાટ કોહલીના ટેસ્ટમાંથી નિવૃત્તિ લેવા માટે અજિત અગરકરની પસંદગી સમિતિને જવાબદાર ઠેરવી છે. જાફરે કહ્યું કે કોહલી પસંદગી પેનલના વર્તનથી નારાજ હતા. તેમણે એમ પણ કહ્યું કે કોહલી ઇંગ્લેન્ડ પ્રવાસની તૈયારી કરી રહ્યા હતા અને વધુ ટેસ્ટ મેચ રમી શક્યા હોત. ભારતના દિગ્ગજ ખેલાડીઓ વિરાટ કોહલી અને રોહિત શર્માએ ગયા વર્ષે એક અઠવાડિયાની અંદર ટેસ્ટ ક્રિકેટમાંથી નિવૃત્તિ લીધી હતી. ત્યાર બાદ ભારતીય ટીમે ઇંગ્લેન્ડ સામેની પાંચ ટેસ્ટ મેચોની સિરીઝ માટે જવાનું હતું. વિરાટ ટેસ્ટ ક્રિકેટ રમી શકતા હતા- વસીમ જાફર જાફરે અગરકરની આગેવાની હેઠળની પસંદગી સમિતિ પર કોહલી સાથે ખોટું વર્તન કરવાનો આરોપ લગાવ્યો. જાફરે કહ્યું, ‘એવું લાગ્યું કે વિરાટ સાથે જે રીતે વર્તન કરવામાં આવ્યું, તેનાથી તેઓ થોડા નારાજ હતા.’ તેમણે કહ્યું, ‘વિરાટ જેવા ખેલાડી દર્શકોને મેદાન સુધી લાવે છે. તેમના ઘણા બધા ફોલોઅર્સ છે. તેઓ નિશ્ચિતપણે વધુ ટેસ્ટ ક્રિકેટ રમી શક્યા હોત. જ્યાં સુધી આપણે વિરાટના મોઢેથી નહીં સાંભળીએ, ત્યાં સુધી ખબર નહીં પડે.’ આ પહેલાં પૂર્વ ભારતીય કોચ રવિ શાસ્ત્રીએ કોહલીના નિવૃત્તિ અંગે કહ્યું હતું- ‘કોહલી સતત જાહેર ટીકા-ટિપ્પણીઓથી માનસિક રીતે થાકી ગયા હતા.’ ટેસ્ટમાં અનેક મોટા રેકોર્ડની નજીક હતા કોહલી કોહલી 125 ટેસ્ટ મેચ પૂર્ણ કરવાથી માત્ર બે મેચ દૂર હતા. આવું કરવાથી તેઓ ટેસ્ટ મેચોની સંખ્યાના મામલે મહાન સુનીલ ગાવસ્કરની બરાબરી કરી લેત. કોહલી ટેસ્ટમાં 10 હજાર રન પૂરા કરવામાં પણ માત્ર 770 રન દૂર હતા. આ સિદ્ધિ હાંસલ કર્યા બાદ તેઓ ગાવસ્કર, સચિન તેંડુલકર અને રાહુલ દ્રવિડ પછી આવું કરનાર ચોથા ભારતીય બની જાત. ઓસ્ટ્રેલિયા પ્રવાસ પર કોહલી માત્ર 190 રન બનાવી શક્યા હતા કોહલીએ 2025ની શરૂઆતમાં ઓસ્ટ્રેલિયા પ્રવાસ પર ભારત માટે પોતાની છેલ્લી ટેસ્ટ સિરીઝ રમી હતી. તેમણે તે સિરીઝની પાંચ ટેસ્ટ મેચોમાં 23.75ની સરેરાશથી માત્ર 190 રન બનાવ્યા હતા.