ટેમ્બા બાવુમાની કેપ્ટનશીપ પ્રથમ વખત સાઉથ આફ્રિકા કોઈ ટેસ્ટ મેચ હારી ગયું છે. ટીમને ડરબનમાં રમાયેલી પહેલી મેચમાં ઓસ્ટ્રેલિયાએ 214 રનથી હરાવ્યું. આ સાથે જ ઓસ્ટ્રેલિયાએ ત્રણ મેચની સિરીઝમાં 1-0ની લીડ મેળવી લીધી. ટૉસ જીતીને પ્રથમ બેટિંગ કરતા ઓસ્ટ્રેલિયાએ પહેલી ઇનિંગમાં 390 રન બનાવ્યા હતા. જવાબમાં સાઉથ આફ્રિકાની ટીમ 284 રન પર ઓલઆઉટ થઈ ગઈ. ઓસ્ટ્રેલિયાને પ્રથમ દાવમાં 106 રનની લીડ મળી. ત્યારબાદ ટીમે બીજી ઇનિંગ્સ 6 વિકેટે 314 રન બનાવીને ડિક્લેર કરી અને 421 રનનો ટાર્ગેટ આપ્યો. પાંચમા દિવસે સાઉથ આફ્રિકાની બીજી ઇનિંગ્સ 206 રનમાં સમેટાઈ ગઈ. ઓસ્ટ્રેલિયા તરફથી જોશ હેઝલવુડે મેચમાં 8 વિકેટ ઝડપી. સિરીઝની બીજી ટેસ્ટ 18 ઓક્ટોબરથી ગકેબેરામાં રમાશે. 12 ટેસ્ટ સુધી બાવુમા હાર્યા નહોતા ટેમ્બા બાવુમાની કેપ્ટનશીપ હેઠળ સાઉથ આફ્રિકાએ 12 ટેસ્ટ રમ્યા. આ દરમિયાન ટીમે 11 મેચ જીતી. કેપ્ટન તરીકે પ્રથમ હાર પહેલાં સૌથી વધુ ટેસ્ટ જીતવાના મામલે બાવુમાએ ઇંગ્લેન્ડના ભૂતપૂર્વ કેપ્ટન માઇક બ્રિયરલીને પણ પાછળ છોડી દીધા. બ્રિયરલીએ ઇંગ્લેન્ડની કેપ્ટનશીપ કરતા પોતાના શરૂઆતના 15 ટેસ્ટમાં 10 જીત નોંધાવી હતી. સાઉથ આફ્રિકાને ઘરઆંગણે નવેમ્બર 2024 બાદ પ્રથમ વખત ટેસ્ટમાં હાર મળી છે. આ પહેલાં ટીમે પોતાના ઘરઆંગણે સતત ચાર ટેસ્ટ જીત્યા હતા. માર્કરમે સૌથી વધુ 75 રન બનાવ્યા સાઉથ આફ્રિકાએ પાંચમા દિવસની શરૂઆત 102/4ના સ્કોરથી કરી હતી. એડન માર્કરમ 45 અને વિયાન મુલ્ડર 5 રન સાથે ઇનિંગ્સને આગળ વધારી રહ્યા હતા. મુલ્ડર 29 રન બનાવીને આઉટ થયો. છઠ્ઠી વિકેટ કાઇલ વેરેનેની પડી. તેણે 1 રન બનાવ્યો. ત્યારબાદ માર્કો યાન્સેન 35, સિમોન હાર્મર 0, માર્કરમ 75 અને એનરિક નોર્કિયાએ 4 રન બનાવ્યા. કેશવ મહારાજ 1 રન બનાવીને અણનમ પરત ફર્યો. ઓસ્ટ્રેલિયા માટે બીજી ઇનિંગ્સમાં જોશ હેઝલવુડે 6 વિકેટ ઝડપી. તેણે પહેલી ઇનિંગ્સમાં 2 વિકેટ લીધી હતી. ડરબનમાં ઓસ્ટ્રેલિયાની સતત ચોથી ટેસ્ટ જીત ઓસ્ટ્રેલિયાએ ડરબનના કિંગ્સમીડ સ્ટેડિયમમાં સતત ચોથી ટેસ્ટ જીતી છે. ટીમે આ મેદાન પર 2006 પછીથી પોતાની જીતનો સિલસિલો જાળવી રાખ્યો છે. કેપ્ટન પેટ કમિન્સે જીત બાદ રેનશોની પ્રથમ ઇનિંગ્સની પ્રશંસા કરી. તેણે કહ્યું કે રેનશોની ઇનિંગ્સે ટીમને શરૂઆતની મુશ્કેલ પરિસ્થિતિમાંથી બહાર આવવામાં અને મેચમાં લીડ જાળવી રાખવામાં મદદ કરી. ઓસ્ટ્રેલિયા WTCમાં ટોચ પર ઓસ્ટ્રેલિયા વર્લ્ડ ટેસ્ટ ચેમ્પિયનશિપ (WTC)માં 81.82% પોઇન્ટ્સ પર્સેન્ટેજ (PCT) સાથે ટોચ પર છે. ભારત 51.52% સાથે પાંચમા અને સાઉથ આફ્રિકા 60% સાથે ત્રીજા સ્થાને છે.